بۇگىن, 18 قىركۇيەك كۇنى قىزىلوردا قالاسىندا قازاق فۋتبولىنىڭ 100 جىلدىعىنا ارنالعان رەسپۋبليكالىق ۆەلوشەرۋ قىزىلوردادان باستالدى. بۇل تۋرالى قالا اكىمىنىڭ ءباسپاسوز حاتشىسى بالدىرعان مامەن حابارلادى.
«قىزىلوردا قالاسىندا «سىر سۇلەيلەرى» الاڭىندا قازاقستان فۋتبولىنىڭ 100 جىلدىعىنا ارنالعان رەسپۋبليكالىق ۆەلوشەرۋ باستالدى. اتالمىش شاراعا استانا قالاسى, قاراعاندى, پاۆلودار, شىعىس قازاقستان جانە قىزىلوردا وبلىستارىنىڭ ۆەلوشاباندوزدارى مەن سپورت ارداگەرلەرى قاتىسۋدا», - دەلىنگەن حابارلامادا.
ءباسپاسوز حاتشىسى بۇدان ءارى وسىعان ارنالعان سالتاناتتى جيىندا قىزىلوردا قالاسىنىڭ اكىمى نۇرلىبەك نالىباەۆ پەن فۋتبول سپورت ارداگەرى ۆلاديمير الەينيكوۆتىڭ سپورتشىلارعا ساتتىلىك تىلەپ, قازاق فۋتبولىنىڭ 100 جىلدىق مەرەيتويىمەن قۇتتىقتاعانىن ايتادى.
قىزىلوردا قالاسىنان سورە تارتقان ۆەلوشەرۋ قاراعاندى وبلىسى, استانا جانە پاۆلودار قالالارى ارقىلى شىعىس قازاقستان وبلىسىنىڭ سەمەي قالاسىندا 21 قىركۇيەكتە جەتەدى. ۆەلوشەرۋگە قاتىسۋشىلار قىزىلوردا جانە شىعىس قازاقستان وبلىستارىنىڭ ەستەلىك سىيلىقتارىمەن ماراپاتتالادى.
قازىرگى تاڭدا قىزىلوردا قالاسىندا قازاقستان فۋتبولىنىڭ 100 جىلدىعىنا ارنالعان بىرنەشە سپورتتىق شارالار وتۋدە.
ايتا كەتەيىك, 9 قازان كۇنى ع.مۇراتباەۆ اتىنداعى ورتالىق ستاديوندا قازاقستان قۇراماسى مەن «قايسار» قۇراماسى ارداگەرلەرى اراسىندا جولداستىق كەزدەسۋمەن قاتار, جاسوسپىرىمدەر فۋتبول فەستيۆالىنىڭ اقتىق ويىندارى وتەدى.
دامير قوجامقۇل.
