قاجىمۇقان اۋىلىنداعى «زەرەندى» ەشكى شارۋاشىلىعى ءتورت جىلدان بەرى تابيعي تازا ەشكى ءسۇتىن ءوندىرىپ, تۇتىنۋشىلارىنا ۇسىنۋدا. تاڭسىق استى تالعاپ ىشەتىن كىرپياز تۇتىنۋشى دا بۇرىن ەمىس-ەمىس ەستىگەنىمەن, ەشكى ءسۇتى تاڭدايىنا تيمەگەندىكتەن, العاشقىدا توسىرقاعاندارى دا راس. كەيىن اعزاعا پايداسى تۋرالى ەستىگەن سوڭ سۇرانىس ارتا ءتۇستى.
كوروناۆيرۋس ىندەتى ادامدى عانا ەمەس, شارۋاشىلىقتاردى دا قىرىنا العان. ىندەت ەكپىنىنە شىداي الماعان كەيبىرەۋلەرى السىزدىگىن مويىنداسا, بۇل شارۋاشىلىق ءوندىرىس جەلىلەرىن قايتا جاساقتاپ, ىقشامدالعان كۇيى جاعالارىنا جارماسقان قيىندىققا توتەپ بەرۋدە. نەگىزگى قولبايلاۋ, دايىن ءونىمدى وتكىزۋدەگى قيىندىق. بۇرىن ەشكى سۇتىنەن دايىندالعان ءونىم نۇر-سۇلتان, الماتى, كوكشەتاۋ, قاراعاندى, جەزقازعان, قوستاناي قالالارىنىڭ ساۋدا سورەلەرىنە قويىلاتىن ەدى.
– امال جوق, قازىردىڭ وزىندە ءبىرشاما شىعىنعا باتىپ وتىرمىز. – باستى قيىنشىلىق تاۋاردى تۇتىنۋشىعا جەتكىزۋ, – دەيدى جوبا جەتەكشىسى ازامات تۇرماعامبەتوۆ.
ەشكى فەرماسى نۇر-سۇلتان قالاسىن ازىق-ت ۇلىكپەن قامتۋ بەلدەۋىنە ەنگەن. كاسىپورىن وسى ۋاقىتقا دەيىن الەۋمەتتىك ماڭىزى بار نىسانداردى شيپاسى مول تاعاممەن قامتاماسىز ەتىپ كەلدى. ءسۇت قادىرىن بىلەتىن جاماعات ەپسەكتى جاندار دايىنداعان ەشكى سۇتىمەن سابيلەردى دە تاماقتاندىرادى.
اسىل تۇقىمدى ەشكى شارۋاشىلىعىندا ءوندىرىس كولەمى بۇرىنعىعا قاراعاندا ازايعانىمەن, ەندى ساقتاۋ مەرزىمى ۇزاق ءونىم دايىنداۋعا كوبىرەك كوڭىل اۋدارىپ وتىر. سوندا وندىرگەن ونىمدەرى ىسىراپ بولمايدى عوي. ۇجىم باسشىسىنىڭ ايتۋىنا قاراعاندا, شارۋاشىلىقتى جۇرگىزۋدىڭ العىشارتى – تۇتىنۋشىنىڭ كوڭىلىنەن شىعۋ. سوندىقتان تاپسىرىستى ۋاقىتىندا ورىنداپ, ەل سەنىمىنە يە بولۋعا ۇمتىلادى.
بۇگىنگى تاڭدا كاسىپورىن بالمۇزداق شىعارۋدى قولعا الدى. وعان قوسا, ماي, سۇزبە, ىرىمشىك, قۇرت تا وندىرىلەدى. حالقىمىزدىڭ سان عاسىر بويى اق داستارقانىنان ارىلماعان ۇلتتىق تاعامنىڭ قۋاتى ىندەتتىڭ بەتىن قايتارۋعا سەپتەسىپ جاتسا, عانيبەت ەمەس پە؟!
اقمولا وبلىسى,
تسەلينوگراد اۋدانى
