قازاقستاندا قىركۇيەكتىڭ 6-8-ءى ارالىعىندا مەملەكەتتىك ساپارمەن بولعان قىتاي حالىق رەسپۋبليكاسىنىڭ توراعاسى سي تسزينپين ەكى ەل حالىقتارى اراسىنداعى ادامگەرشىلىك قارىم-قاتىناستىڭ ءبىر ۇلگىسى رەتىندە اۋىزعا الىپ, مىسالعا كەلتىرگەن اسپاناستى ەلىندە وقىپ جاتقان قازاقستاندىق ستۋدەنت رۋسلان تولەنوۆتىڭ اتاعى مەن داڭقى ءبىر عانا پاستە كۇللى الەمگە جايىلىپ, ەكى ەلدىڭ بىردەي جۇلدىزى بولىپ شىعا كەلدى.
قازاقستاندا قىركۇيەكتىڭ 6-8-ءى ارالىعىندا مەملەكەتتىك ساپارمەن بولعان قىتاي حالىق رەسپۋبليكاسىنىڭ توراعاسى سي تسزينپين ەكى ەل حالىقتارى اراسىنداعى ادامگەرشىلىك قارىم-قاتىناستىڭ ءبىر ۇلگىسى رەتىندە اۋىزعا الىپ, مىسالعا كەلتىرگەن اسپاناستى ەلىندە وقىپ جاتقان قازاقستاندىق ستۋدەنت رۋسلان تولەنوۆتىڭ اتاعى مەن داڭقى ءبىر عانا پاستە كۇللى الەمگە جايىلىپ, ەكى ەلدىڭ بىردەي جۇلدىزى بولىپ شىعا كەلدى.
قحر توراعاسى ءبىزدىڭ ەلىمىزدە بولعان كەزىندە حاينان ۋنيۆەرسيتەتىنىڭ 21 جاسار قازاق ستۋدەنتى تۋرالى وتە تارتىمدى دا ءجۇرەكجاردى اڭگىمە ايتىپ بەردى. ونىڭ بايانداۋىنشا, وتە سيرەك كەزدەسەتىن قاننىڭ يەسى رۋسلان وقۋ ورداسىندا وتە جاقسى وقۋمەن بىرگە, ناۋقاس جانداردى اجالدان اراشالاپ قالۋعا ايرىقشا كومەك كورسەتكەن ەكەن.
كەيىن انىقتاي كەلگەندە, بۇل جىگىتتىڭ اتىراۋ قالاسىنىڭ تۋماسى ەكەنى بەلگىلى بولدى. رۋسلان وسى مۇنايلى استانانىڭ اۆانگارد دەگەن جەرىندەگى №30 ورتا مەكتەپتى ءبىتىرىپتى. مەكتەپتەن كەيىن كاسپي ءوڭىرىنىڭ زاماناۋي كوللەدجىنە وقۋعا تۇسكەن. بىراق كەيىن قىتايعا بارىپ وقۋعا بەل بۋادى. بۇل تالابى دا ورىندالادى. ال حاينان ارالىنداعى ۋنيۆەرسيتەتكە قابىلدانعاننان كەيىن اسپاناستى ەلىندە «پاندا قانى» دەپ اتالاتىن تەرىس رەزۋس-فاكتورلى ءوز قانىن تاپسىرىپ دونور بولا باستاعان.
– حاينان ۋنيۆەرسيتەتىنە وقۋعا ءتۇسۋ ءۇشىن رۋسلان ەكى جىل قىتاي ءتىلىن ۇيرەندى. قازىر ول سونداعى «بيزنەستى اكىمشىلەندىرۋ جانە باسقارۋ» ءبولىمىنىڭ 3-كۋرسىندا وقيدى. كوپ ۋاقىتى مەن كۇشىن وقۋعا ارنايدى, – دەپ اڭگىمەلەيدى رۋسلاننىڭ اناسى فاريدا ەرجانوۆا قازىر. – وقۋدان باسقا ۋنيۆەرسيتەتتە باسكەتبول جانە ۆولەيبول وينايدى, سول جەردەگى كۆن-گە ۇقساس ويىنعا قاتىسادى. قىتاي باق-تارى رۋسلان تۋرالى قحر توراعاسىنىڭ ءسوزىن جارىسا تاراتقاننان كەيىن, ونى حاينان پروۆينتسياسىنىڭ مادەنيەت جانە ءبىلىم ءمينيسترى ءوزىنىڭ قابىلداۋىنا شاقىردى. ال ۋنيۆەرسيتەتتىڭ رەكتورى ونىڭ قۇرمەتىنە تۇسكى اس ۇيىمداستىردى. وعان ۋنيۆەرسيتەتتە 1-كۋرستان باستاپ وقىعانى ءۇشىن تولەگەن اقشالارى قايتارىپ بەرىلدى. ديپلوم العانشا تەگىن وقۋ گرانتىن ءبولىپ, ماگيستراتۋرا مەن دوكتورانتۋرا كۋرستارىن تەگىن وقۋدى ۇسىنىپتى.
مىنە, قىتاي توراعاسىنىڭ اۋزىمەن بۇكىل الەمگە قاس-قاعىم ساتتە اتى تانىمال بولا كەتكەن قازاقستاندىق ستۋدەنتتىڭ قازىرگى احۋالى وسىنداي.
مۇرات ايتقوجا.
