وندا وبلىس ورتالىعىنان 260 شاقىرىمداي قاشىقتىقتا ورنالاسقان اقتەرەك اۋىلىنداعى ستۋدەنت جاستاردىڭ جانايقايى ايتىلعان ەدى. اتاپ ايتقاندا, الىستاعى اۋىلدا ۇيالى بايلانىس پەن ينتەرنەت جەلىسىنىڭ جوقتىعىنان قاراعاندىنىڭ كوللەدجدەرىندە وقيتىن جاستاردىڭ توتەنشە جاعداي رەجيمىنىڭ ءتارتىبى بويىنشا قاشىقتان وقي الماي وتىرعانى ماقالاعا ارقاۋ بولعان-دى. سونداي-اق, ول جازبادا اتالعان اۋىلدىڭ 41 تۇرعىنى قول قويىپ, قارقارالى اۋدانىنىڭ اكىمى ەلدار دۇيسەتاەۆقا جولداعان ءوتىنىش حات تۋرالى دا ءسوز قوزعالعان ەدى. حاتتا اقتەرەكتىك اتا-انالار ينتەرنەتتىڭ يگىلىگىنە قول جەتكىزە الماي, سول سەبەپتى وقۋشى جانە ستۋدەنت بالالارىنىڭ قاشىقتان وقي الماي وتىرعانىن جازىپ, اۋدان باسشىسىنان شيەلەنىسكەن ماسەلەنىڭ ءتۇيىنىن شەشۋگە كومەكتەسۋىن سۇراعان بولاتىن.
تاياۋدا, «جازىلعان جايدىڭ جاڭعىرىعى» بولىپ, اتالعان ماقالاعا جاۋاپ حات كەلدى. قارقارالى اۋدانى اكىمىنىڭ ورىنباسارى س.ءالي ۇلى قول قويعان بۇل قۇجاتتا اۋداندىق ءبىلىم ءبولىمىنىڭ باستىعى, قاراعايلى كەنتىنىڭ اكىمى جانە «قازاقتەلەكوم» مەكەمەسىنىڭ وكىلدەرى اقتەرەك اۋىلىندا تۇراتىن كوللەدج ستۋدەنتتەرىنىڭ اتا-انالارىمەن كەزدەسكەنى جانە ماسەلەنىڭ شەشۋ جولدارىنىڭ قالاي قاراستىرىلىپ جاتقانى ەگجەي-تەگجەي باياندالعان.
جالپى, اقتەرەك اۋىلىنداعى №26 جالپى ورتا ءبىلىم بەرەتىن مەكتەپتە بارلىعى 37 وقۋشى وقيدى ەكەن. ونىڭ ىشىندە 23 وقۋشى تومەنگى سىنىپتاردا ءبىلىم السا, قالعانى 5-9-سىنىپتاردىڭ وقۋشىلارى.
«مەكتەپتە SkyEdge 4 مبيت/س سپۋتنيكتىك ينتەرنەت جۇيەسى بار, ول وقۋ پروتسەسسى مەن ەلەكتروندىق جۋرنالدى تولتىرۋ پروتسەسسىن قامتاماسىز ەتىپ تۇر.
قازاقستان رەسپۋبليكاسى ءبىلىم جانە عىلىم مينيسترلىگىنىڭ №123, 04/01/2020 جانە №135, 04.08.08 ج. بۇيرىقتارى جانە وبلىستىق مەملەكەتتىك باسقارمانىڭ 04.06.2010 جىلعى №80-1/نق بۇيرىقتارى نەگىزىندە وسى مەكتەپتىڭ وقۋشىلارى ءۇشىن ارنايى دايىندالعان جوسپارلاردى تاراتۋ تۇرىندە قاشىقتىقتان وقىتۋ ۇيىمداستىرىلدى. وقۋشىلارعا قاعاز جۇزىندەگى تاپسىرمالاردى مەكتەپ قىزمەتكەرلەرى جەتكىزىپ, بايلانىس ورناتىلعان», دەپ جازىلعان جاۋاپ حاتتا.
سونىمەن قاتار, اۋىل بالالارى «بالاپان» جانە «قازاقستان» تەلەارنالارىنىڭ تەلەديدارلىق باعدارلامالارى ارقىلى دا ساباق وقيدى ەكەن. ال اۋىلداعى ستۋدەنتتەرگە مەكتەپتەگى ينتەرنەتتى پايدالانۋعا مۇمكىندىك بەرىلىپتى. تەك, قاشىقتان وقىتۋ, تاپسىرمالاردى ورىنداۋ جانە كەرى بايلانىس ورناتۋ ءۇشىن قولدانىستاعى ينتەرنەت جىلدامدىعى جەتكىلىكسىز كورىنەدى. اۋىلداعى ستۋدەنتتەردىڭ ينتەرنەت تولقىنىن قۋىپ, تاۋعا ورمەلەپ كەتكەنى دە سودان بولسا كەرەك.
ەسكەرە كەتەتىن ءبىر جايت, اقتەرەك اۋىلىنداعى 14 تەرمينالدىڭ سەگىزى ىستەن شىعىپ, جوندەۋگە كەلمەگەندىكتەن ءۇي يەلەرى ينتەرنەت جەلىسىن اعىتىپ تاستاعان. ال اۋداندىق اكىمدىكتەگىلەردىڭ سوزىنە قاراعاندا, مۇنداي قوندىرعىلار وندىرىستە جوق ەكەن...
«قازىرگى تاڭدا «قازاقتەلەكوم» بۇل ماسەلەنى شەشۋدىڭ جولدارىن قاراستىرۋدا. ازىرشە, اۋىلدا ستۋدەنتتەرى بار ءتورت ۇيگە «قازاقتەلەكوم» ءوز كۇشىمەن ءتورت تەرمينال تاۋىپ, ولاردى ورناتۋ جۇمىستارىن قاراستىرىپ جاتىر. سوندا, اۋىلدا 10 ۇيدە جانە مەكتەپتە ينتەرنەت بولادى. ياعني, جالپى سۇرانىستى قاناعاتتاندىرۋعا مۇمكىندىك جاسالادى. قوسىلعان ينتەرنەت قوندىرعىلاردىڭ تەحنيكالىق مۇمكىندىگى ستۋدەنتتەردىڭ تاپسىرمالارىن ورىنداۋعا جانە WatsApp, باسقا مەسسەندجەرلەر ارقىلى كەرى بايلانىستى قامتاماسىز ەتۋگە مۇمكىندىك بەرەدى», دەيدى جەرگىلىكتى اكىمدىك وكىلدەرى.
بۇدان بولەك, اكىمدىك تاراپىنان بولعان ۇسىنىس بويىنشا كوللەدجدەردىڭ اكىمشىلىگى ستۋدەنتتەرگە قاشىقتان وقىتۋعا ارنالعان تاپسىرمالاردى «قازپوشتا» جانە №26 مەكتەپكە ەلەكتروندى پوشتا ارقىلى جىبەرۋگە كەلىسكەن ەكەن. حاتتا ايتىلعانداي, اتا-انالار مەن وقۋشىلار بۇل ماسەلەنىڭ ۇسىنىلعان شەشىمدەرىمەن تولىقتاي كەلىسىپتى.
جوعارىدا اتالعان ماقالا جارىق كورگەننەن كەيىن قارقارالى اۋدانىنىڭ اكىمى ەلدار دۇيسەتاەۆتىڭ «ەگەمەندى قازاقستان» گازەتىنىڭ وبلىستاعى قوسىنىنا حابارلاسىپ, ءمان-جايعا ءوز تاراپىنان تولىققاندى تۇسىنىك بەرگەنىن دە ايتا كەتكەن ءلازىم. كارانتيننىڭ جاعدايىندا عانا ەمەس, جالپى الداعى ۋاقىتتا اۋدانداعى اۋىلدىق جەرلەردىڭ بارلىعىن ينتەرنەتپەن قامتاماسىز ەتۋ – ءبىزدىڭ باسىم باعىتتاعى مىندەتىمىز. وسى باعىتتا ءبىز ناقتى ناتيجە بەرەتىن جوبالاردى قاراستىرۋ ۇستىندەمىز. ال اقتەرەككە كەلسەك, ول اۋىلدىڭ ماسەلەسى تولىقتاي شەشىلگەنشە ءبىزدىڭ ءجىتى نازارىمىزدا بولادى», دەپ سەندىردى قارقارالى اۋدانىنىڭ اكىمى.
