قازاق حالقى – تاعدىرى تالايلى حالىق. الىمساقتان كەڭپەيىلدىلىك پەن مەيىرباندىقتى جانىنا سەرىك ەتكەن بابا ءداستۇرى بۇگىنگى كۇنگە دەيىن ۇزىلگەن جوق. بۇل – مۇراتتى مۇراگەرلەردىڭ اماناتقا ادالدىعى.
ءبىرتۇتاس قازاقستان مەملەكەتى تاۋەلسىزدىك جىلدارىندا دا نەبىر تاريحي وقيعالاردىڭ كۋاسى بولىپ, داۋىرلەردىڭ تاماشا ۇلگىسىن تانىتتى جاھانعا. داعدارىس بولعانىن جاسىرۋ مۇمكىن ەمەس. الايدا, ءبىزدىڭ الەمدىك ارەناداعى ەڭ باستى ارتىقشىلىعىمىز – تولقۋ بولعان جوق. ۇلتتار مەن ۇلىستار اراسىنداعى بەرىك ىنتىماق پەن مىزعىماس دوستىق ءبىزدىڭ ەلدىڭ تاريحي قۇندىلىعىنا اينالدى.
ءداۋىر تىنىسى كورسەتىپ وتىرعانداي, بولماشى قارجى داعدارىسىن ەڭسەرە الماي, ەسەڭگىرەپ قالعان كورشىلەرىمىز بار. ولاردىڭ وسالدىعى سول – ىشكى ىمىراسىنىڭ جوقتىعى. اۋىزبىرلىك كەمشىن تۇسكەن جەردە كەمەلدەنۋ تۇرماق, كوشكە ۇلەسۋ مۇمكىن ەمەس ەكەندىگىن الەمدى اۋزىنا قاراتىپ, التى قۇرلىقتىڭ تاڭدايىن قاقتىرعان «نازارباەۆ نۇسقاسى» الدەقاشان دالەلدەپ بەرگەن.
ول ارينە, ەلباسىنىڭ باستاماسىمەن ومىرگە كەلگەن, اسقاق مۇراتتار الاڭىنا اينالعان قازاقستان حالقى اسسامبلەياسى. مۇنداي ينستيتۋت الەمنىڭ ءبىر مەملەكەتىنىڭ دامۋ ۇردىسىندە بولعان ەمەس. بىرجاقتى ەكونوميكالىق باعىت ۇستانىپ, تاريحتىڭ ۇرىمتال ساتتەرىندەگى سىن مەن قاتەرلەرگە توتەپ بەرە الماي جاتقان ەلدەردەگى داعدارىس ءبىزدىڭ دانالىقتى قازىق ەتكەن دارا دامۋىمىزدى اينالىپ وتكەنىن كوزىمىز كورىپ وتىر. بۇل قالاي مۇمكىن بولدى؟ تاريح تەپەرىشىمەن قازاقستان ازاماتىنا اينالعان وزگە ۇلتتتار مەن ۇلىستاردىڭ وكىلدەرى ءبىر وتباسىنىڭ مۇشەلەرىندەي ورتاق مۇددەگە جۇمىلۋ ارقىلى سىندارلى ساتتەن سۇرىنبەي ءوتتى. ولاردىڭ ءوز تىلدەرى مەن مادەنيەتىن, ۇلتتىق قۇندىلىقتارىن دارىپتەۋگە ەشقانداي كەدەرگى بولعان جوق. كەرىسىنشە, مەملەكەت تاراپىنان قولداۋ كورسەتىلىپ, گرانتتار ءبولۋ ارقىلى ۇلتارالىق تاتۋلىقتى ناسيحاتتايتىن اۋقىمدى جوبالار جۇزەگە اسىرىلدى. وسىنىڭ بارلىعى – ەلباسى ساياساتىنىڭ كوشباستار كورەگەندىلىگى ەدى.
مەنىڭ تۋعان تۇعىرىم سارىارقا – ەلىمىزدىڭ يندۋستريالدى جۇرەگى عانا ەمەس, جۇزدەگەن ۇلتتىڭ تاتۋ-ءتاتتى تىرلىگى مەن بىرلىگى سالتانات قۇرعان التىن بەسىك. ۇلان-عايىر اۋماعىنا ساي كەڭپەيىلدى حالقى بار. وسى ءبىر قۇنارلى دا, كيەلى توپىراقتى الۋان ۇلت پەن ۇلىس وكىلدەرى قاسيەتتى وتانى سانايدى. تاعدىرى سارىارقامەن تامىرلاسقان قازاقستاندىقتاردىڭ ورتاق مۇددەسى وراسان يگىلىكتىڭ باستاۋىنا اينالىپ, ورتاق ماقساتتار توڭىرەگىنە توپتاستى. ەلباسىنىڭ ەڭبەك وتانى, كوشباسشىلىق قادامدارىنىڭ باستاۋى بولعان قاراعاندى وڭىرىندەگى ورەلى ىستەردى جالعاستىرۋدا ەل تىزگىنىن بەرىك ۇستاعان ازاماتتار اراسىندا دا بىرنەشە ۇلت وكىلدەرى بار. بۇگىنگىدەي ەلىمىزدى الاڭداتىپ, ىندەت تاراپ تۇرعان ۋاقىتتا جۇمىلىپ جۇدىرىق بولىپ, ولاردىڭ بارلىعى – قاراقان باسىنىڭ قامى ءۇشىن ەمەس, قاراورمانداي قازاقستاندىقتاردىڭ ورتاق تاعدىرى ءۇشىن الاڭداۋلى. ء«بىر جەڭنەن – قول, ءبىر جاعادان – باس شىعارا» ىنتىماقتاسقان مۇددەلەستەر, قيىندىقتى بىرگە ەڭسەرىپ, تاتۋلىقتى ساقتاپ, ەل ىرىسىن ەسەلەۋ جولىندا ايانباي ەڭبەك ەتۋدە. دەنى – مەنىڭ ورتاق ىستەگى سەنىمدى سەرىكتەرىم.
سارىارقا توسىندەگى ەتنوس وكىلدەرىنىڭ باسىم بولىگى – كەڭەستىك جۇيەنىڭ سولاقاي ساياساتى سالدارىنان تاريحي وتانىنا اۋا كوشكەندەر. سانالارىنداعى ساعىنىش سالماعىن, جۇرەكتەرىندەگى ءوز وتانىنا دەگەن سەزىمدەرىن سارىارقاداعى سالتاناتى جاراسقان جايدارى تىرلىككە جەڭدىرگەن. كەشەگى سولاقاي ساياساتتىڭ سالقىنىن بۇگىنگى كەمەل كوشباسشىلىقتىڭ كوشەلى ۇلگىسى ىعىستىرعان. ولاردىڭ كوبىمەن دوسپىن. سىرلاسامىز, ورتاق پىكىرگە توقايلاسقان ساتتەرىمىز دە جەتەرلىك. سول ساتتەردە مەنىڭ كەۋدەمدە ماقتانىش سەزىمى كەرنەيدى. ءبىز بىرگەمىز!
بارشا قازاقستاندىقتاردى 1 مامىر – قازاقستان حالقىنىڭ بىرلىگى كۇنىمەن قۇتتىقتايمىن. ەل ىرگەسى سوگىلمەي, بىرلىگىمىز بەكەم, ارمان-ماقساتتارىمىز ورىندالعاي!
بەكزات التىنبەكوۆ,
قاراعاندى وبلىسى قحا توراعاسىنىڭ ورىنباسارى,
قاراعاندى وبلىسى قوعامدىق كەلىسىم كەڭەسىنىڭ توراعاسى
