قازىرگى تاڭدا باسشىلىق قۇرامعا ارنالعان بۇل قاتاڭ تالاپتىڭ ورىندالۋى ءار-ءار جەردەن كورىنىس تاۋىپ جاتىر. ماسەلەن, قاراعاندى وبلىسىنداعى ساتباەۆ قالاسىندا جەرگىلىكتى تۇرعىن ءۇي-كوممۋنالدىق شارۋاشىلىق ءبولىمىنىڭ باستىعى جىل باسىندا قىلمىستىق كودەكستىڭ ەكى بىردەي بابىمەن جاۋاپكەرشىلىككە تارتىلعان ەدى. ناقتىراق ايتقاندا, باسشىلىق قىزمەتتە بولعان بۇرىنعى لاۋازىمدى تۇلعا ۇلىنىڭ فيرماسى ورىنداماعان جۇمىستىڭ اكتىسىنە قول قويىپ, سىبايلاستىق جەمقورلىق سيپاتى بار قىلمىسقا جول بەرگەن ەدى.
وسى جىلدىڭ باسىندا ساتباەۆ قالالىق سوتىنىڭ ۇكىمىنە ساي تۇرعىن ءۇي-كوممۋنالدىق شارۋاشىلىق, جولاۋشىلار كولىگى جانە اۆتوموبيل جولدارى ءبولىمىنىڭ بۇرىنعى باستىعى كىنالى بولىپ تانىلعان-تۇعىن.
مىنە, قول استىنداعى قىزمەتشىسى وسىنداي زاڭبۇزۋشىلىققا بارىپ, ابىرويدى ايرانداي توككەن كەزدە ساتباەۆ قالاسىنىڭ اكىمى اسقار ىدىرىسوۆ وتستاۆكا سۇراپ وبلىس اكىمى جەڭىس قاسىمبەكتىڭ اتىنا ءوتىنىش جازعان بولاتىن. ءوڭىر باسشىسى قالا اكىمىن قىزمەتتەن بوساتپادى. بىراق جازاسىز دا قالدىرمادى.
جالپى, «مەملەكەتتىك قىزمەت تۋرالى» زاڭعا 2019 جىلدىڭ 10 جەلتوقسانىندا ەنگىزىلگەن وزگەرىستەرگە ساي, قول استىنداعى قىزمەتكەرى سىبايلاس جەمقورلىق قىلمىسىنا بارعان ساياسي قىزمەتشى وتستاۆكاعا كەتۋى ءتيىس. جاسىراتىنى جوق, قاراعاندى وبلىسىندا بولعان بۇل ءىس كەزىندە اجەپتاۋىر اڭگىمەنىڭ, پىكىرتالاستىڭ تۋىنداۋىنا سەبەپشى بولدى. بۇل تۋرالى وڭىرلىك كوممۋنيكاتسيالار قىزمەتىندە ارنايى بريفينگ تە ۇيىمداستىرىلعان. سول بريفينگتە قاراعاندى وبلىستىق مەملەكەتتىك قىزمەت ىستەرى جونىندەگى دەپارتامەنتتىڭ باسشىسى ايگۇل بايحانوۆا وسى جاعدايدى مىسالعا الا وتىرىپ, زاڭعا ەنگىزىلگەن وزگەرىستەر تۋرالى ەگجەي-تەگجەيلى ءتۇسىندىرىپ بەرگەن ەدى. «جالپى, وتستاۆكانى قابىلداۋ نەمەسە قابىلداماۋ – ءتيىستى وكىلەتتى لاۋازىمدى تۇلعانىڭ قۇقىعىنداعى شارۋا. وتستاۆكا ماسەلەسى ءبىر اي ۋاقىتتىڭ ىشىندە قارالادى. ول قابىلدانباعان جاعدايدا, مەملەكەتتىك قىزمەتشى ءوزىنىڭ لاۋازىمدىق وكىلەتتىكتەرىن اتقارا بەرۋى ءتيىس», دەپ اتاپ ءوتتى ول.
البەتتە, باسشىنىڭ جاۋاپكەرشىلىگىن تارازىلاۋ بارىسىندا, تەكسەرۋ كەزىندە قاراماعىنداعى قىزمەتكەر جاساعان سىبايلاس جەمقورلىق قىلمىس پەن ونىڭ قۇقىقبۇزۋشىلىقتى الدىن الا ەسكەرتۋ بويىنشا لاۋازىمدىق مىندەتتەرىن دۇرىس ورىنداماعاندىعىنىڭ اراسىنداعى بايلانىستىڭ بار-جوعىنا ەرەكشە ماڭىز بەرىلەدى.
جالپى, جوعارىدا ايتىلعان زاڭعا ەنگىزىلگەن وزگەرىستەر جايىندا قوعامدىق پىكىردىڭ قولداۋشىلىق باعىتتا بولعانىن ايتقان ءجون.
قاراعاندى وبلىسى
