مونيتورينگتەردىڭ ناتيجەسى بويىنشا 26 ۇسىنىس بەرىلىپ, سىبايلاس جەمقورلىقتى انىقتاۋ ماقساتىندا 17 مەملەكەتتىك ورگان مەن كۆازيمەملەكەتتىك سەكتور سۋبەكتىلەرىنىڭ قىزمەتىنە تالداۋ جۇرگىزىلىپ, 47 ۇسىنىس ەنگىزىلگەن. ماسەلەن, جامبىل وبلىستىق اۋىل شارۋاشىلىعى باسقارماسىنا جۇرگىزىلگەن تالداۋ ناتيجەسىندە بىرقاتار شارۋاشىلىق سۋبەكتىلەرى سۋبسيديا الۋ ءۇشىن ۇسىنعان وتىنىمدەرىندە دۇرىس ەمەس مالىمەتتەر كورسەتىپ, سۋبسيديا العاندىعى انىقتالعان. بۇگىندە سۋبسيديا العان شارۋاشىلىق سۋبەكتىلەرىنەن 1 ميلليون تەڭگە بيۋدجەتكە كەرى قايتارىلعان. ال سىبايلاس جەمقورلىق سيپاتىندا قىلمىس جاساعانى ءۇشىن جاۋاپكەرشىلىككە تارتىلعان 9 تۇلعا قىزمەتىنەن بوساتىلعان. الايدا ولار وسى ۋاقىتقا دەيىن مەملەكەتتىك مەكەمەلەر مەن كاسىپورىنداردا باسشىلىق لاۋازىمدا بولعان.
«ەڭبەك جانە سىبايلاس جەمقورلىق زاڭناماسىن ساقتاۋ بويىنشا مونيتورينگ بيىل دا جۇرگىزىلىپ, كۆازيمەملەكەتتىك سەكتور سۋبەكتىلەرىندە باسشىلىق لاۋازىمداعى 8 تۇلعانىڭ بۇرىن سىبايلاس جەمقورلىق قىلمىس جاساعاندىعى انىقتالىپ وتىر», دەيدى ءادىلحان اشىرباەۆ. ماسەلەن, «قىزمەت وكىلەتتىگىن تەرىس پايدالانۋ», «قىزمەتتىك جالعاندىق جاساۋ», «قىزمەتتەگى ارەكەتسىزدىك» سياقتى قىلمىستىق كودەكستىڭ بىرنەشە باپتارى بويىنشا سوتتى بولعان تۇلعا قازىر مەملەكەتتىك ۇلەسى بار «جاسىل ەل-تاراز» جاۋاپكەرشىلىگى شەكتەۋلى سەرىكتەستىگىنىڭ ديرەكتورى بولىپ جۇمىس ىستەيدى ەكەن.
بۇگىنگى تاڭدا جەرگىلىكتى اتقارۋشى ورگانداردىڭ باسقارمالارى مەن بولىمدەرىنە باعىنىستى 900 مەكەمە ءوز بيۋدجەتتەرىن ەنگىزىپ, جاريالاعان. سونىمەن قاتار وڭىردە ەلىمىزدىڭ سىبايلاس جەمقورلىققا قارسى ءىس-قيمىل اگەنتتىگىمەن «بيزنەستى جانە ينۆەستيتسيالاردى قورعاۋ» جوباسى جۇزەگە اسىرىلۋدا. وبلىستا جەرگىلىكتى جانە شەتەلدىك ينۆەستورلارمەن بىرگە 372 ميلليارد تەڭگەنى قۇرايتىن 30 كەلىسىمگە قول قويىلىپ, جوبانى ىسكە اسىرۋ ۋاقىتىندا 21 ءوتىنىش تۇسكەن. الايدا دەپارتامەنت بەرگەن مالىمەتكە سۇيەنسەك, وبلىستا سىبايلاس جەمقورلىق قۇقىقبۇزۋشىلىقتارىن انىقتاۋ جانە تەرگەۋ باعىتىنداعى جۇمىستاردىڭ ناتيجەسى وتكەن كەزەڭمەن جانە ورتاشا رەسپۋبليكالىق كورسەتكىشتەرمەن سالىستىرعاندا وسكەن. وتكەن جىلى سوتقا 70 ءىس جولدانىپ, سىبايلاس جەمقورلىق سيپاتىنداعى قىلمىس جاساعانى ءۇشىن 90 تۇلعا قىلمىستىق جاۋاپتىلىققا تارتىلعان. سونداي-اق وتكەن جىلى 1,2 ميلليارد تەڭگە كولەمىندە زالال انىقتالسا, بۇگىندە ونىڭ 930 ميلليون تەڭگەسى وندىرىلگەن.
جالپى, جۇيەلى سىبايلاس جەمقورلىق دەرەكتەرى 5-7 پايىزعا, شاعىن جانە ورتا بيزنەس جۇمىسىنا ارالاسۋ 16-20 پايىزعا, مەملەكەتتىك باعدارلامالار اياسىندا بولىنگەن قاراجاتتى ۇرلاۋ 11-17 پايىزعا دەيىن ۇلعايعان. مەملەكەتتىك ورگانداردىڭ اراسىندا سىبايلاس جەمقورلىق سيپاتىندا جاسالعان قىلمىستار ءۇشىن اتقارۋشى ورگانداردىڭ لاۋازىمدى ادامدارىنا قاتىستى 56 قىلمىستىق ءىس قوزعالعان. ونىڭ ىشىندە ءبىلىم, دەنساۋلىق ساقتاۋ, اۋىلشارۋاشىلىق, قۇرىلىس, مادەنيەت جانە تاعى دا باسقا ۇلكەن سالالار بار. ودان كەيىن ىشكى ىستەر ورگاندارىنىڭ قىزمەتكەرلەرىنە قاتىستى 29 قىلمىستىق ءىس بولعان. ال اعىمداعى جىلدىڭ ءۇش ايىندا 27 قىلمىستىق ءىس سوتقا جولدانىپ, سىبايلاس جەمقورلىق سيپاتىنداعى قىلمىس جاساعانى ءۇشىن 28 تۇلعا قىلمىستىق جاۋاپكەرشىلىككە تارتىلعان. ەسەپتىك كەزەڭدە 236,7 ميلليون تەڭگە كولەمىندە زالال كەلتىرىلگەن بولسا, ونىڭ 80,8 ميلليون تەڭگەسى ءوندىرىلىپ, 122,3 ميلليون تەڭگە كولەمىندەگى م ۇلىككە تىيىم سالىنعان.
جامبىل وبلىسى
