بۇگىن نۇر-سۇلتان قالاسى اكىمىنىڭ ورىنباسارى باقتيار ماكەن ءبىلىم بەرۋ ۇيىمدارىنىڭ باسشىلارىمەن كەڭەس وتكىزىپ, ونىڭ اياسىندا جاڭا وقۋ جىلىندا ءبىرىنشى سىنىپقا قابىلداۋ, قورىتىندى اتتەستاتتاۋ, ۇبت وتكىزۋ ءتارتىبى, سونداي-اق كادرلىق قامتاماسىز ەتۋ جونىندە تۇسىنىكتەمە بەرىلدى. كەڭەس بارىسىندا قالالىق ءبىلىم باسقارماسىنىڭ باسشىسى شولپان قادىروۆا قاشىقتان وقىتۋ كەزىندە قورىتىندى اتتەستاتتاۋ قالاي جۇرگىزىلەتىنىن ايتتى.
«9 (10) سىنىپ وقۋشىلارى ءۇشىن ءبىتىرۋ ەمتيحاندارى مەن 11 (12) سىنىپ وقۋشىلارىنىڭ مەملەكەتتىك ەمتيحاندارى توقتاتىلدى. قورىتىندى باعالار جىلدىق باعالار نەگىزىندە قويىلادى. سونداي-اق IV توقساندا ءبولىم ءۇشىن جيىنتىق باعالاۋ ءبىر رەت (4-11 مامىر 2020 ج.) وتەدى. توقسان بويىنشا جيىنتىق باعالاۋ ءبىر رەت (18-22 مامىر 2020 ج.) وتەدى», – دەپ ءتۇسىندىردى ش.قادىروۆا.
بۇل رەتتە ۇلتتىق بىرىڭعاي تەستىلەۋدى (ۇبت) وتكىزۋ فورماتى وزگەرمەيدى.
«بيىل تۇلەكتەر ۇبت-نى 11-ءشى سىنىپتىڭ ءتورتىنشى توقسانىنىڭ باعدارلاماسىنداعى سۇراقتارسىز تاپسىرادى (ياعني 5-ءشى سىنىپتان 11-ءشى سىنىپتىڭ ءۇش توقسانىنا دەيىن). تەستىلەنۋشىلەر اراسىنداعى قاشىقتىق ۇلعايتىلادى. سونىمەن قاتار, بارلىق وقۋشىلاردىڭ تەمپەراتۋراسىن جەرگىلىكتى جەرلەردە تەكسەرەتىن بولادى. قوسىمشا سانيتارلىق شەكتەۋ شارالارى قابىلدانادى», – دەدى ول.
مەكتەپ تۇلەكتەرىنىڭ ۇبت-عا قاتىسۋعا ونلاين-ءوتىنىم بەرۋى 1 ساۋىردەن 10 مامىرعا دەيىن جۇرگىزىلەدى. ەلوردا اكىمىنىڭ ورىنباسارى باقتيار ماكەن شەكتەۋ شارالارى بويىنشا وقۋشىلار اراسىندا ءتۇسىندىرۋ جۇمىستارىن جۇرگىزۋدى جانە وقۋ جىلىن تابىستى اياقتاۋ ءۇشىن قاجەتتى شارالار قابىلداۋدى تاپسىردى.
