«الەۋمەتتىك مەديتسينالالىق ساقتاندىرۋ قورى» كەاق نۇر-سۇلتان قالاسى بويىنشا فيليالى ءباسپاسوز قىزمەتىنىڭ بىزگە بەرگەن اقپاراتى بويىنشا, ەلوردادا قايتا قۇرىلعان №3 كوپبەيىندى اۋرۋحانا – ساقتاندىرۋ قورىنىڭ مەديتسينالىق قىزمەت جەتكىزۋشىلەرىنىڭ ءبىرى. ونىڭ قۇرامىنا №3 پەريناتالدىق ورتالىق پەن دەرماتولوگيا بولىمشەسى (بۇرىنعى تەرى-ۆەنەرولوگيا ديسپانسەرى) كىرەدى.
كوروناۆيرۋستىق ينفەكتسيانىڭ ورشۋىنە بايلانىستى مۇندا 220 پروۆيزورلىق توسەك-ورىن جاساقتالىپتى. قازىرگى ۋاقىتتا وندا پاتسيەنتتەر ەمدەلىپ جاتىر. باس دارىگەردىڭ ايتۋىنشا, وسى پروۆيزورلىق ستاتسيوناردا قىزمەت كورسەتىپ جۇرگەن دارىگەرلەرگە بولەك تاريف بەلگىلەنگەن, ياعني ولار ەڭبەگىنە وراي جالاقىسىنىڭ ۇستىنە ۇكىمەت بەلگىلەگەن ۇستەمەاقىسىن الادى.
– اۋرۋحانانىڭ قۇرامىنا كىرەتىن پەريناتالدىق ورتالىق بۇرىنعىداي جۇمىس ىستەپ جاتىر. ەگەر جۇكتى ايەلدەردىڭ بىرىندە جەدەل رەسپيراتورلىق ۆيرۋستىق ينفەكتسيانىڭ بەلگىسى بايقالسا, ولار جەكە ەمدەلەدى. ولارعا ارنالعان قوسىمشا وبسەرۆاتسيالىق توسەكتەر ازىرلەپ قويدىق, – دەيدى ج.دانباەۆا.
ال تەرى اۋرۋلارى بار سىرقاتتارعا دارىگەرلەر قاشىقتان كەڭەس بەرەدى. مۇنداي پاتسيەنتتەر ءۇشىن ستاتسيونار مەن ەمحانادا ەكى-ەكىدەن, ءتورت كەزەكشى دارىگەر جۇمىس ىستەيدى. دەگەنمەن دە شۇعىل مەديتسينالىق كومەكتى قاجەت ەتەتىن جاعدايلار دا بولماي تۇرمايدى. ولار بىردەن بولىمشەگە جەتكىزىلىپ, جەدەل تالداۋلار جاسالىپ, قاجەت بولعان جاعدايدا, اۋرۋحاناعا جاتقىزىلادى ەكەن.
باس دارىگەردىڭ ايتۋىنشا, كوروناۆيرۋستىڭ تارالۋىنا بايلانىستى دارىگەرلەر مەن مەدبيكەلەردىڭ جۇمىسى بۇرىنعىدان دا قاۋىرت بولىپ كەتكەن. بۇل اۋرۋحانانىڭ اقجەلەڭدىلەرى – كوروناۆيرۋس ءورشىپ تۇرعان ەلدەردەن ۇشىپ كەلگەن حالىقارالىق رەيستەردى قابىلداعان العاشقى دارىگەرلەر.
– 21 ناۋرىزدان باستاپ, ەلورداعا ۇشىپ كەلگەن حالىقارالىق اۋە رەيستەرىن قابىلداپ, جولاۋشىلاردى كوروناۆيرۋسقا تەكسەرۋ ءبىزدىڭ كوماندانىڭ ەنشىسىنە ءتۇستى. جۇمىس تاۋلىك بويى جالعاستى. دارىگەرلەرىمىزدە تىنىم بولعان جوق. ولار ءۇيىن, وتباسىن اپتالاپ, ايلاپ كورمەي, تىكەسىنەن تىك تۇرىپ قىزمەت ەتتى. كەيىن «رامادا پلازا» وتەلىن كارانتيندە جاتقان ازاماتتارعا ارناپ جاساقتاعان سوڭ, ونداعى 800 ورىندىق ستاتسيوناردا دا مەديتسينالىق قىزمەت كورسەتتىك, – دەيدى باس دارىگەر.
جۇلدىز سەيىتقامزاقىزىن ءبىز جوعارى ساناتتى بىلىكتى دارىگەر رەتىندە جاقسى بىلەمىز. ەل باسىنا تۇسكەن قيىن كەزەڭدە ول باس دارىگەرمىن دەپ قول قۋسىرىپ وتىرعان جوق. ءوزى دە كوروناۆيرۋس جۇقتىرعان ازاماتتاردى ەمدەۋمەن اينالىسىپ, ولاردى پسيحولوگيالىق-مورالدىق تۇرعىدان قولداپ, اقىل-كەڭەسىن ايتىپ وتىردى.
كوروناۆيرۋسپەن كۇرەسىپ جۇرگەن مەديتسينالىق قىزمەتكەرلەردىڭ ءتيىستى دەڭگەيدە قورعانىس قۇرالدارىمەن قامتاماسىز ەتىلمەۋى كەيىنگى كەزدە كوپ سىنعا ءىلىنىپ ءجۇر. ال ءبىزدىڭ اڭگىمەمىزگە ارقاۋ بولىپ وتىرعان №3 كوپبەيىندى اۋرۋحانانىڭ ماماندارى جەكە قورعانىس جابدىقتارىمەن 100 پايىز تولىق قامتاماسىز ەتىلگەن. اۋرۋحانانىڭ وزىندە دە ىندەتتى جۇقتىرعانداردى ەمدەۋگە ارنالعان قۇرىلعىلاردىڭ ءبارى بار.
ءسوزىنىڭ سوڭىندا باس دارىگەر تۇرعىنداردى ساق بولۋعا شاقىرىپ, قولدى سابىنداپ ءجيى جۋ, ادام كوپ شوعىرلانعان جەرگە بارماۋ, ارا قاشىقتىق پەن تازالىقتى ساقتاۋ – ۆيرۋستى جۇقتىرىپ الماۋدىڭ ەڭ باستى شارتى ەكەنىن ەسكە سالدى.
قىمبات توقتامۇرات
