بۇگىندە اۋدان, اۋىل-ايماقتاردا جۇمىسى توقتاپ قالعان كاسىپورىندار مەن جوبالار وتە كوپ. مىنە, وسىلارعا ينۆەستيتسيا تارتىپ, قايتا جانداندىرۋ ماقساتىندا جاقىندا «وڭتۇستىكتىڭ ينۆەستيتسيالىق جوبالارى» اتتى بەسىنشى كورمە وتكىزىلدى.
بۇگىندە اۋدان, اۋىل-ايماقتاردا جۇمىسى توقتاپ قالعان كاسىپورىندار مەن جوبالار وتە كوپ. مىنە, وسىلارعا ينۆەستيتسيا تارتىپ, قايتا جانداندىرۋ ماقساتىندا جاقىندا «وڭتۇستىكتىڭ ينۆەستيتسيالىق جوبالارى» اتتى بەسىنشى كورمە وتكىزىلدى.
وعان شىمكەنت قالاسى مەن ورداباسى جانە سايرام اۋداندارىنداعى 30-عا جۋىق ينۆەستيتسيالىق جوبالار كورسەتىلىپ, ءوز كەزەگىندە ءار اۋدان اكىمدەرى جوبالاردى تانىستىرىپ ءوتتى. تاعى ءبىر ەرەكشەلىك – ينۆەستورلارعا جوبالار تۋرالى عانا ەمەس, اۋداندارداعى پايدالى قازبا كەن ورىندارى تۋرالى دا تولىق اقپاراتتار جاريا ەتىلدى.
– بۇل كورمە وبلىس اۋماعىندا كاسىپكەرلىك نىسانداردىڭ كوبەيۋىنە ىقپالىن تيگىزىپ وتىر, – دەيدى وبلىس اكىمىنىڭ ورىنباسارى ساپاربەك تۇياقباەۆ. – بۇگىنگى كۇنى ۇدەمەلى يندۋستريالىق-يننوۆاتسيالىق دامۋ مەملەكەتتىك باعدارلاماسىنا قاتىسۋعا نيەت بىلدىرگەن كاسىپكەرلەر سانى 101-گە جەتتى, بۇل رەسپۋبليكا بويىنشا ءوتىنىش بەرۋشىلەردىڭ 40 پايىزىن قۇراپ وتىر. بىلتىرعى جىلى بىزگە تەك 102 ءوتىنىش كەلىپ تۇسكەن بولاتىن. قازىر اۋداندارداعى پايدالى قازبالار قورلارى يگەرىلە باستادى, مىسالى, بايدىبەك اۋدانىندا تراۆەنتين تاسى كەن ورنىن يگەرۋگە 7 كاسىپكەردەن ءوتىنىش ءتۇسىپ وتىر. بۇگىنگى كۇنى سول كەن ورنىنىڭ اۋماعىن يندۋستريالىق ايماققا اينالدىرۋ قاراستىرىلۋدا.
ال, وبلىستىق كاسىپكەرلەرگە قىزمەت كورسەتۋ ورتالىعىنىڭ ديرەكتورى نۇرجان التاەۆ «ءبىر اي كولەمىندە ينۆەستورلارعا ءتيىمدى ءارى ماڭىزدى دەگەن 30-40 جوبالار ۇسىنىلعان بولاتىن. وتكەن كورمەلەردەگى جوبالارعا قىزىعۋشىلىق تانىتىپ, مەموراندۋمعا قول قويعان ينۆەستورلارعا ءبىزدىڭ ورتالىق پەن اۋىل اكىمدىكتەرى تاراپىنان جان-جاقتى كومەك كورسەتىلۋدە. مىسالى, تۇلكىباس, تولە بي اۋداندارى مەن تۇركىستان قالاسىنىڭ اكىمدىكتەرى كاسىپكەرلەرگە جوبالاردى ىسكە اسىرۋعا قاجەتتى جەر تەلىمدەرىن ءبولىپ بەردى. ءتۇلكىباس اۋدانىندا 100 گەكتار اۋماقتا ينتەنسيۆتى باۋ-باقشا وتىرعىزىلىپ, 5 گەكتارعا «جەرقۇلاق» ساڭىراۋقۇلاعى ءوسىرىلەتىن بولدى. تۇركىستاندا كاسىپكەرلەرگە يندۋستريالىق ايماقتان كىرپىش زاۋىتىن سوعۋعا, بالىق شارۋاشىلىعىنا ارنالعان ايماق, شىنىدان جاسالعان شولمەك شىعاراتىن زاۋىت سالۋعا جەر بولىنگەن. ايتىپ ءوتۋ كەرەك, اتالعان جوبالاردىڭ قارجىلاندىرۋ ماسەلەسى وسى ءبىزدىڭ ورتالىق ارقىلى جۇزەگە اسۋدا», دەپ بۇل كورمەنىڭ قول جەتكىزگەن جەتىستىگى كوپ ەكەنىن ايتىپ ءوتتى.
كورمەدە سايرام اۋدانىندا قۇراماجەم شىعاراتىن زاۋىت قۇرىلىسى, «جاسىل» تەحنولوگيانى قولدانۋ ارقىلى جىبەك ءجىبىن وندىرەتىن شارۋاشىلىقتى ۇيىمداستىرۋ, كىلەم شىعاراتىن فابريكا قۇرىلىسى, ينتەنسيۆتى الما باق ءوسىرۋ, ورداباسى اۋدانىندا شۇجىق تسەحىن سالۋ, بالىق شارۋاشىلىعىن دامىتۋ جانە وندەۋ جوباسى, شىمكەنت قالاسىنداعى «وڭتۇستىك» ارنايى ەكونوميكالىق ايماقتا» ۇسىنىلاتىن شارتتار, قۋاتتىلىعى 10 مۆت جىلۋ جانە ەلەكتر ستانساسىن سالۋ, تۇرمىستىق قالدىقتاردى قايتا وڭدەۋ, سۋدى تازالايتىن قوندىرعىلار دايىندايتىن زاۋىتتارىن سالۋ سەكىلدى بىرقاتار جوبالاردى ۇسىندى.
ءسويتىپ, ينۆەستورلار مەن اكىمدىكتەر اراسىندا 23 مەموراندۋمعا قول قويىلدى. ەگەر بۇل جوبالار قولعا الىنسا جالپى سوماسى 37,6 ملرد. تەڭگەگە ينۆەستيتسيالىق جوبالار ىسكە اسىرىلىپ, اتالعان اۋدانداردا 3 مىڭعا جۋىق جاڭا جۇمىس ورىندارى اشىلادى دەگەن ءۇمىت بار. ال, «وڭتۇستىكتىڭ ينۆەستيتسيالىق جوبالارى كورمەسىنىڭ» جالپى قورىتىندىسى بويىنشا قۇنى 110,9 ملرد. تەڭگەنى قۇرايتىن 70 مەموراندۋمعا قول قويىلىپ, وبلىستا 6 مىڭ جاڭا جۇمىس ورنى اشىلادى دەپ جوسپارلانۋدا.
ورالحان ءداۋىت,
«ەگەمەن قازاقستان».
وڭتۇستىك قازاقستان وبلىسى.
