ماڭعىستاۋ وبلىسى پەريناتالدىق ورتالىعىنىڭ مەڭگەرۋشىسى ءۇمىد راشيدوۆتىڭ ايتۋىنشا, 29 جاسار انانىڭ جۇكتىلىگى ءتۇرلى قيىندىقتارمەن وتكەن. 27 اپتا 4 كۇن دەگەندە كەسىر تىلىگى ارقىلى جۇكتى كەلىنشەكتى شۇعىل تۇردە بوساندىرىپ الۋ جونىندە شەشىم قابىلدانعان. سەبەبى قاۋىپ تەك اناسى ەمەس, ومىرگە كەلمەگەن نارەستەگە دە تونگەن بولاتىن.
مۇنداي جاعدايدا جۇكتىلىكتىڭ مەرزىمىنە قاراماستان انا مەن بالانى امان الىپ قالۋ ءۇشىن مىندەتتى تۇردە وتا جاسالادى. وسىلايشا شۇعىل ارەكەت ەتۋدىڭ ناتيجەسىندە ۇستىمىزدەگى جىلدىڭ 17 ناۋرىزىندا جەرگىلىكتى ۋاقىتپەن 17 ساعات 23 مينۋتتا سالماعى 1000 گرامم جانە بويىنىڭ ۇزىندىعى 32 سم شاقالاق دۇنيەگە كەلدى.
ءسابي جاڭا تۋعان بالالاردىڭ جان ساقتاۋ بولىمشەسىنە اۋدارىلىپ, «رەسپيراتورلىق ديسترەسس-سيندروم» اتتى الدىن-الا دياگنوزى قويىلعان. باسقاشا ايتقاندا مەرزىمىنەن بۇرىن دۇنيەگە كەلگەن بالانىڭ وكپەسى دۇرىس قالىپتاسپاعان. ونىڭ ۇستىنە قۇرساقىشىلىك جۇقپانىڭ قاۋىپ-قاتەرى بولعان. سول سەبەپتى العاشىندا نارەستەنى جاساندى تىنىس الۋ اپپاراتىنا قوسىپ قويعان, سونىمەن قاتار رەنتگەن جانە ۋلترادىبىستىق زەرتتەۋدەن وتكىزگەن. ناتيجەسىندە, العاشقى ۋلترادىبىستىق زەرتتەۋ شاقالاقتا كۇرەتامىرلى وزەكتىڭ 16 ميلليمەترگە دەيىن اشىق ەكەندىگىن كورسەتكەن, ال بۇل نەگىزىنەن 15 ميلليمەتردەن اسپاۋى ءتيىس.
ء«بىز بالالار كارديولوگى جانە كارديوحيرۋرگتىڭ كەڭەسىنە جۇگىنگەن بولاتىنبىز. تۋا بىتكەن جۇرەك كەمىستىگى دەگەن دياگنوز قويىلدى. بالالار كارديوحيرۋرگى ورداباۆ ەرنۇر احان ۇلى وتا جاسادى. ال وتانىڭ ۇزاقتىعى 30 مينۋتقا جالعاستى. ءسابي قازىر سيپاپ اپپاراتىندا جاتىر, باسقاشا ايتقاندا تىنىستىق قولداۋدا. بۇل دەگەنىمىز جاساندى تىنىس الۋ ەمەس, مۇندا بالا وزدىگىنەن دەمالا الادى. جالپى مۇنداي وتالار وبلىستىق پەريناتالدىق ورتالىقتا 2019 جىلدان بەرى جاسالىپ كەلەدى. اناسى مەن قىزىنا بارلىق جاعداي جاسالعان. وسى وتاعا قاتىسقان ءاربىر اق حالاتتى ابزان جاننىڭ ورنى ەرەكشە, بارلىعىنا ريزاشىلىعىمىزدى بىلدىرەمىز, دەيدى ءۇمىد راشيدوۆ.
قازىرگى ۋاقىتتا نارەستە ءوزىن جاقسى سەزىنۋدە. سالماق قوسىپ كەلەدى. 8 ميلليگرامنان ءسۇت بەرىلىپ وتىر. تۋعان كەزىندەگى سالماعى 1000 گرامم بولسا, قازىرگى سالماعى 1240 گرامم. ءبىر ايدان استى. ءسابي وزدىگىنەن دەمالىپ باستاعاسىن ەكىنشى كەزەڭگە وتەدى. ازىرگە اناسى مەن قىزى پەريناتالدىق ورتالىقتا بولادى. سالماعى 1800 گراممنان اسقان سوڭ, ەكپە جاسالۋى ءتيىس. سودان سوڭ اناسى مەن قىزى ۇيىنە قايتادى.
ماڭعىستاۋ وبلىسى
