حاميت ءبىرجان ۇلى 1930 جىلدىڭ 2 مامىرىندا سولتۇستىك قازاقستان وبلىسى شال اقىن اۋدانىنىڭ قاراتال اۋىلىندا دۇنيەگە كەلدى. 1947 جىلى ورتا مەكتەپتى كۇمىس مەدالمەن اياقتاعاننان كەيىن الماتىداعى شەت تىلدەر ينستيتۋتىندا وقىدى. ديپلوم العاننان سوڭ ءبىراز ۋاقىت ايتۋلى ءبىلىم وشاعىندا ۇستازدىق ەتتى.
جاڭالىق اتاۋلىعا قۇشتار جان. 1954 جىلدان بەرى جۋرناليستيكا سالاسىنا مىقتاپ دەن قويدى. بىرقاتار اۋداندىق, وبلىستىق جانە رەسپۋبليكالىق باسىلىم مەن باسپادا ەڭبەك ەتتى. سولاردىڭ اراسىندا «سوتسياليستىك قازاقستان» گازەتى دە بار. رەسپۋبليكامىزدىڭ باس باسىلىمىندا پارتيا تۇرمىسى ءبولىمىنىڭ ءتىلشىسى جانە قوستاناي وبلىسىنداعى مەنشىكتى ءتىلشى قىزمەتتەرىن اتقاردى. ءوز كاسىبىنە ادال ازامات قوستاناي وڭىرىندە بولىپ جاتقان ءار وقيعانى قاز-قالپىندا بايانداپ, ءوز ماقالالارىن وقىرماندارعا دەر كەزىندە جەتكىزە ءبىلدى. سونىمەن قاتار ول استىقتى ايماقتاعى تىڭ باستامالار مەن يگى ءىس-شارالار, جاعىمدى جاڭالىقتار مەن جاڭاشىلدىقتار جايىندا تەبىرەنە جازىپ قانا قويماي, شەشىمىن تاپپاي قوردالانىپ قالعان كۇردەلى ماسەلەلەردى دە ءوز نازارىنان تىس قالدىرعان جوق.
– «سوتسياليستىك قازاقستاننىڭ» ارداقتى اتى تالاي رەت قىسىلتاياڭدا جول تابۋعا كومەكتەستى, – دەپ باستادى ءوز اڭگىمەسىن حاميت ءبىرجان ۇلى. – 1962 جىلى قوستانايعا دىنمۇحامەد قوناەۆ كەلدى. سول كەزدەرى نيكيتا حرۋششەۆتىڭ سولاقاي ساياساتىنىڭ كەسىرىنەن ديمەكەڭ رەسپۋبليكامىزدىڭ ءبىرىنشى حاتشىلىعىنان ءتۇسىپ قالىپ, مينيسترلەر كەڭەسىنىڭ توراعالىعىنا ىعىستىرىلعان ەدى. وسىنداي اسىل ازاماتپەن جۇزدەسىپ, سىرلاسۋدىڭ دا ءساتى ءتۇستى. بىردە قوناەۆتان كولىك سۇراۋعا بەكىنىپ, قابىلداۋىنا جازىلدىم. گازەتتىڭ بەدەلى عوي, كابينەتكە ەش بوگەتسىز كىرىپ, ۇكىمەت باسشىسىنا ءمان-جايدى ءتۇسىندىردىم. ديمەكەڭ سوزگە كەلمەستەن, رەسپۋبليكامىزدىڭ بەلدى قوس باسىلىمىنىڭ تىلشىلەرىنە «ۆولگا» كولىگىن مىنگىزدى. سول كەزدە كەڭ جۇرەكتى ازاماتتىڭ, دانا ءارى دارا باسشىنىڭ بويىنان ىزگىلىكتىڭ ءيسى اڭقىپ تۇرعانىن انىق سەزىندىم.
1965 جىلى الماتىداعى جوعارى پارتيا مەكتەبىن تامامداعاننان كەيىن حاميت ءبىرجانوۆ قوستاناي وبلىسى رۋدنىي قالالىق پارتيا كوميتەتىنىڭ حاتشىسى, قالالىق جانە وبلىستىق كەڭەستەرىنىڭ دەپۋتاتى بولىپ سايلاندى. 1971 جىلى قىزمەت بابىمەن الماتىعا اۋىستى. اۋەلدە «سوتسياليستىك قازاقستاندا» ناسيحات ءبولىمىنىڭ مەڭگەرۋشىسى, كوپ كەشىكپەي «قاينار» باسپاسىنىڭ باس رەداكتورى بولدى. سودان كەيىن 20 جىلعا جۋىق ۋاقىت بويى قازاق كسر جوسپارلاۋ كوميتەتىندە ءبولىم جانە باسقارما باستىعى قىزمەتىن اتقاردى.
حاميت اعانىڭ شىعارماشىلىق دياپازونى دا كەڭ ەدى. قارىمدى قالامگەر ءباسپاسوز بەتتەرىندە ماقالا جازۋمەن شەكتەلىپ قالماي, اۋدارما ىسىمەن دە بەلسەنە اينالىستى. ماركسيزم-لەنينيزم كلاسسيكتەرىنىڭ ەڭبەكتەرىن, ساياسي جانە كوركەم شىعارمالاردى, بالالار ادەبيەتىن قازاق تىلىنە ءتارجىمالادى.
– «سق»-دا ەڭبەك ەتكەن جىلداردى ەرەكشە ءبىر ساعىنىشپەن ەسكە الامىن. سول كەزدەرى تالاي يگى-جاقسىلارمەن ەتەنە ارالاسىپ, سىيلاستىم. دىنمۇحامەد قوناەۆ باستاعان باسشىلار, ءسابيت مۇقانوۆ, عابيت مۇسىرەپوۆ, عالي ورمانوۆ, ءماريام حاكىمجانوۆا, سىرباي ماۋلەنوۆ, شىڭعىس ايتماتوۆ, تۇرسىنحان ءابدىراحمانوۆا, سايفي قۇداش جانە تاعى باسقا كوپتەگەن ۇلى اقىن-جازۋشى, كورنەكتى عالىم, كەڭەس وداعىنىڭ باتىرلارى جانە ءتۇرلى سالالاردا ەلەۋلى تابىستارعا قول جەتكىزگەن اتاقتى ادامدارمەن داستارقانداس بولدىم. وسىنىڭ بارلىعى دا رەسپۋبليكامىزدىڭ باس باسىلىمىنىڭ بەدەلىنىڭ ارقاسى, – دەيدى اقساقال.
بۇل كۇندەرى 90 جاسقا تولعان قارت قالامگەر ءالى دە تىڭ. قازىرگى كەزدە ءبىرجان حاميت ۇلى الماتى قالالىق ارداگەرلەر كەڭەسىنىڭ تورالقا مۇشەسى جانە بوستاندىق اۋداندىق ارداگەرلەر كەڭەسىنىڭ توراعاسى قىزمەتتەرىن ابىرويلى اتقارۋدا.
