ورتالىق بانكتىڭ باسشىسى ەلۆيرا نابيۋللينا جۇما كۇنى وتكەن ءباسپاسوز جيىنىندا بۇل شەشىم ءوز ەكونوميكانىڭ دامۋىن جانە الداعى ءۇش جىلداعى ينفلياتسيا ديناميكاسىن قايتا قاراۋ ءۇشىن قابالدانعانىن ايتتى.
«سوڭعى باعام بويىنشا كوزقاراسىمىزدى انىقتاعان شەشىمدەر كوروناۆيرۋستىق پاندەميامەن بايلانىستى. الەمدىك ەكونوميكاداعى جاعداي ءماز ەمەس. وپەك+ كەلىسىمىنە قاراماستان مۇناي باعاسى تومەندەپ بارادى. رەسەيدەگى شەكتەۋ شارالارى ەكونوميكالىق ءوسىمنىڭ كەرى كەتۋىنە مۇمكىندىك بەرىپ وتىر» دەيدى نابيۋللينا.
كوروناۆيرۋستىق پاندەميا, كارانتيندىك شارالاردى ەنگىزۋ جانە مۇناي باعاسىنىڭ قۇلدىراۋى جاعدايىندا ورتالىق بانك ەلدىڭ ءىجو-ءنىڭ 2020 جىلى 4-6% تومەندەۋىن, كەيىن 2021 جانە 2022 جىلدارى عانا قالپىنا كەلەدى دەپ ۇمىتتەنىپ وتىر.
ساراپشىلاردىڭ پىكىرىنشە, بەلگىسىزدىك جاعدايىندا ستاۆكانىڭ تومەندەۋى بيزنەستى, حالىقتى جانە تۇتاستاي ەكونوميكانى قولداۋى كەرەك.
رەسەيدىڭ ورتالىق بانكىنىڭ مالىمەتى بويىنشا, 2020 جىلى ينفلياتسيا 3,8-4,8% قۇراپ, 4% دەڭگەيىنە جەتەدى. سونىمەن قاتار, 2020 جىلى رەسەيدىڭ ءىجو 4-6%-عا تومەندەۋى مۇمكىن. سودان كەيىنگى جىلدارى قالپىنا كەلە باستايدى. 2021 جىلى 3-5% -عا, ال 2022 جىلى 1,5-3,5%-عا وسەدى.
RT TeleTrade-ءتىڭ باس تالداۋشىسى مارك گويحمان تۇسىندىرگەندەي, قازىرگى جاعدايدا ەلدەگى ىسكەرلىك بەلسەندىلىكتى ىنتالاندىرۋ جانە ەكونوميكانى ۇستاپ تۇرۋ ءۇشىن تومەن تاريفتەر قاجەت.
ساراپشىنىڭ ايتىپ وتكەنىندەي, ورتالىق بانكتىڭ كەزەكتى شەشىمى ارزان نەسيەلەر ەسەبىنەن ينۆەستيتسيالاردىڭ, ءوندىرىستىڭ, تۇتىنۋشىلىق سۇرانىستىڭ وسۋىنە اكەلۋى كەرەك. بۇل بيزنەستى قارجىلاندىرۋعا قول جەتىمدىلىكتى ارتتىرادى, ونىڭ كىرىستىلىگىن ارتتىرىپ, نەسيەلىك اۋىرتپالىقتىڭ ءبىرشاما جەڭىلدەگەنىن بىلدىرەدى.
ەسكە سالساق, ورتالىق بانكتىڭ نەگىزگى مولشەرلەمەسىنىڭ سوڭعى وزگەرىسى اقپان ايىندا بولعان. سودان كەيىن رەتتەۋشى ونى جىلدىق 6,25-دەن 6% -عا دەيىن تومەندەتىپ, بۇل شەشىمدى ينفلياتسيانىڭ كۇرت باياۋلاۋىمەن ءتۇسىندىردى. ناۋرىزدا وتكەن جينالىستا رەسەي بانكى كوروناۆيرۋستىڭ, مۇناي باعاسىنىڭ قۇلدىراۋى جانە ءرۋبلدىڭ السىرەۋى سالدارىنان ينفلياتسيا قاۋپىنىڭ جوعارىلاۋى جاعدايىندا پايىزدىق مولشەرلەمەلەردى كىدىرتۋ جانە ۇستاپ تۇرۋ تۋرالى شەشىم قابىلدادى.
ورتالىق بانكتىڭ ديرەكتورلار كەڭەسىنىڭ كەلەسى وتىرىسى 19 ماۋسىمدا وتەدى. ساراپشىلار الداعى جيىندا پايىزدىق مولشەرلەمە تاعى دا تومەندەيتىنىن ايتىپ جاتىر.«ەگەر جاعداي نەگىزگى بولجامعا سايكەس قالىپتاسسا, رەسەي بانكى كەلەسى وتىرىستاردا نەگىزگى مولشەرلەمەنى ودان ءارى تومەندەتۋ مۇمكىندىگىن مويىندايدى. رەسەي بانكى ينفلياتسيانىڭ ديناميكاسىن ەسكەرە وتىرىپ, نەگىزگى مولشەرلەمە بويىنشا شەشىمدەر قابىلدايدى» دەيدى رف ورتالىق بانك تاراتقان ءباسپاسوز حابارىندا.
ەلۆيرا نابيۋللينا ايتىپ وتكەندەي, بولاشاقتا ورتالىق بانك ستاۆكالاردى جىلدىق 4,5% دەيىن تومەندەتۋى ابدەن مۇمكىن. رەسەيلىك ساراپشىلار دا ورتالىق بانكتىڭ نەگىزگى پايىزدىق مولشەرلەمەسىنىڭ 5,5% دەيىن تومەندەۋى ابدەن مۇمكىن ەكەنىن ايتىپ جاتىر. بۇل جايلى ينۆەستورلارعا الدىن-الا ەسكەرتىلدى. قارجى نارىعى دا ورتالىق بانكتىڭ شەشىمىن تۇسىنىستىكپەن قابىلداپ جاتىر. رەسەيلىك ساراپشى ولەگ بوگدانوۆ كەشە ورتالىق بانك ۇيىمداستىرعان ونلاين جيىندا ديرەكتورلار كەڭەسى وتىرىسىنىڭ ناتيجەلەرى جاريا ەتىلگەننەن كەيىن ماسكەۋ بيرجاسىندا رەسەي ۆاليۋتاسى كۇش الا باستاعانىن ايتتى. اقش دوللارى 1%, 74 رۋبلگە, ەۋرو 0,8% 79,9 رۋبلگە دەيىن قۇنسىزداندى.
25 ساۋىردە ورتالىق بانكتىڭ رەسمي باعامى ءبىر دوللار ءۇشىن 74,72 رۋبل جانە ءبىر ەۆرو ءۇشىن 80,25 رۋبل بولدى.
ساراپشىلاردىڭ پىكىرىنشە, ورتالىق بانكتىڭ كەز- كەلگەن شەشىمى رەسەيدىڭ مەملەكەتتىك باعالى قاعازدار نارىعىنا اسەر ەتەدى. ۋاقىت وتە كەلە بۇل شەشىم فەدەرالدى نەسيەلىك وبليگاتسيالاردىڭ (OFZ) كىرىستىلىگىن تومەندەتەدى, سوندىقتان ينۆەستورلار قۇندى قاعازداردى الدىن-الا ساتىپ الۋعا تىرىسادى. «رەسەي بانكىنىڭ بۇدان ءارى دە تومەندەتۋ تۋرالى ۇسىنىسى ءرۋبلدى قولدايدى, ويتكەنى مۇنداي شەشىم رەسەيلىك اكتيۆتەردىڭ, اكتسيالار مەن وبليگاتسيالاردىڭ تارتىمدىلىعىن ارتتىرادى», دەپ تولىقتىردى ولەگ بوگدانوۆ.
