وسى ورايدا جامبىل وبلىسىنىڭ اكىمى بەردىبەك ساپارباەۆ قالا اكتيۆىمەن كەزدەستى. باسقوسۋدا تاراز قالاسىنىڭ اكىمى ايتقازى قارابالاەۆ بىرقاتار ماسەلەلەرگە جاۋاپ بەردى.
قالا تۇرعىندارىنان قالالىق قىزمەتتەر مەن تىكەلەي تاراز قالالىق اكىمدىگىنىڭ جۇمىسىنا بايلانىستى 16 مىڭنان استام ءوتىنىش تۇسكەن. الەۋمەتتىك جەلىلەردە وبلىس اكىمى بەردىبەك ساپارباەۆتىڭ اتىنا قالالىق اكىمدىكتىڭ قىزمەتىنە قاتىستى 178 ءوتىنىش كەلىپ تۇسسە, ولاردىڭ 33-ءى عانا ورىندالعان. تۇرعىنداردى نەگىزىنەن قوعامدىق كولىك جۇمىسىنىڭ ناشارلىعى, اۆتوبۋس ايالدامالارىنىڭ جاي-كۇيى, جول جامىلعىسى, قوقىستىڭ, اشىق ليۋكتەردىڭ كوپتىگى, اعاشتاردى زاڭسىز كەسۋ جانە تاعى دا باسقا وسى سەكىلدى ماسەلەلەر تولعاندىرۋدا. بەردىبەك ساپارباەۆ جالپى وبلىس بويىنشا ءتۇرلى الەۋمەتتىك-ەكونوميكالىق كورسەتكىشتەردىڭ ورىندالماۋى تاراز قالاسى اكىمدىگىنىڭ قىزمەتىمەن بايلانىستى بولىپ وتىرعانىن جەتكىزدى.
«قالالىقتار وزدەرىن تولعاندىرعان ماسەلەلەرىن شەشىپ بەرۋدى ءوتىنىپ وبلىستىق اكىمدىككە قوڭىراۋ شالىپ, الەۋمەتتىك جەلىلەر ارقىلى دابىل قاعۋدا. سەبەبى, ۇيىمداستىرۋ جۇمىستارى ءالسىز, ءتيىستى باقىلاۋ جوق», دەدى بەردىبەك ساپارباەۆ.
سول سياقتى جولاۋشىلار كولىگىنىڭ تۇراقسىز قوزعالىسى, ەسكى جانە تار اۆتوبۋستاردىڭ لاس جانە ىڭعايسىز سالوندارى, جۇرگىزۋشىلەر مەن كوندۋكتورلاردىڭ مادەنيەتسىزدىگى قالا تۇرعىندارىنىڭ كوپتەن بەرى كوتەرىپ كەلە جاتقان باستى ماسەلەلەرىنىڭ ءبىرى رەتىندە قارالدى. وبلىس اكىمىنىڭ ايتۋىنشا, تاراز قالاسىنىڭ اكىمىنە ادامداردىڭ قاجەتتىلىكتەرىن ەسكەرە وتىرىپ, مارشرۋتتاردى جۇيەلەندىرۋ, جاڭا, سىيىمدى اۆتوبۋستار ساتىپ الۋ ماسەلەسىن شەشۋ, ەلەكتروندى بيلەتتەندىرۋ مەن GPS-باقىلاۋدى ەنگىزۋ بويىنشا تاپسىرمالار جۇكتەلگەن. الايدا, ءالى كۇنگە دەيىن بىردە-ءبىر تاپسىرما ورىندالماعان.
تاعى ءبىر ماسەلە – تارازدىڭ اباي, قويگەلدى, بەيبىتشىلىك جانە باسقا دا ورتالىق كوشەلەرىنە قاتىستى بولىپ وتىر. ولاردى جوندەۋ جۇمىستارى ناۋرىز ايىندا باستالۋ كەرەك بولعانىمەن, جوسپار ورىندالماعان. وعان نە كەدەرگى بولعانى بەلگىسىز. جيىندا وسى سياقتى بىرقاتار ماسەلەلەر كوتەرىلدى.
ءوز كەزەگىندە ايتقازى قارابالاەۆ بىلىكتى كادرلاردىڭ جوقتىعىن العا تارتتى.
سونىمەن قاتار, قالا اكىمىنىڭ ايتۋىنشا, اباي كوشەسىن جوندەۋ 2 مامىر كۇنى اياقتالادى دەپ جوسپارلانۋدا. سونداي-اق, جۇمىستىڭ ۋاقىتىلى باستالۋىنا جاۋىن-شاشىننىڭ كوپتىگى دە اسەر ەتۋدە ەكەن. كەڭەستى قورىتىندىلاي كەلە بەردىبەك ساپارباەۆ نەگىزگى اسپەكتىلەرگە نازار اۋداردى. تاراز – جامبىل وبلىسىنىڭ بەت-بەينەسى, تۋريستەردى تارتۋ ورتالىعى بولعاندىقتان, قالا اكىمدىگىنە ءوڭىردى دامىتۋ بويىنشا زور جاۋاپكەرشىلىك جۇكتەلەتىنىن اتاپ ءوتتى.
جامبىل وبلىسى
