شارادا جەر قاتىناستارى سالاسىندا سىبايلاس جەمقورلىق تۋعىزاتىن جاعدايلاردى جويۋ, سونىڭ ىشىندە جەر كوميسسياسى وتىرىستارىنىڭ اشىقتىعى جانە جەر رەسۋرستارى گەوپورتالىن جەتىلدىرۋ ماسەلەسى تالقىلاندى. سونىمەن قاتار, بيۋدجەتتىك مەكەمە باسشىلارىن روتاتسيالاۋ, ورتالىقتاندىرىلعان بۋحگالتەريا, اۋداندىق اكىمدىكتەردە فرونت-وفيستار – سەرۆيستىك اكىمدىكتەر اشۋ, «OPEN SPACE» قاعيداتى جانە اۋداندارداعى مەكتەپتەردە «ە-اسحانا» اۆتوماتتاندىرىلعان جۇيەسىن ەنگىزۋ ماسەلەلەرى تالقىلاندى.
وسى جيىندا باعىنىشتى قىزمەتكەرى سىبايلاس جەمقورلىققا جول بەرگەن مەملەكەتتىك ورگان باسشىسىنىڭ وتستاۆكاعا كەتۋ باستاماسى تۋرالى ايتىلدى.
- بۇل ينستيتۋت ەلباسىنىڭ باستاماسىمەن, مەملەكەت باسشىسىنىڭ قولداۋىمەن جۇزەگە اسىرىلىپ وتىر. ءبىرىنشى باسشىنىڭ دەربەس جاۋاپكەرشىلىگى – جۇيەلىك سىبايلاس جەمقورلىقتى جويۋداعى ءتيىمدى ءادىس. مۇنداي نورمانىڭ ەنگىزىلۋى سىبايلاس جەمقورلىق فاكتىلەرىن جويۋعا مۇمكىندىك بەرىپ قويماي, ونى تۇبىرىمەن جويۋعا كومەكتەسەدى. بۇل رەتتە شىڭعىرلاۋ اۋدانىنىڭ ەكس اكىمى ەرجان تۇرماعامبەتوۆتىڭ ءوز ەركىمەن قىزمەتتەن كەتكەنىن اتاپ وتكەن ءجون, - دەيدى باتىس قازاقستان وبلىسى بويىنشا سىبايلاس جەمقورلىققا قارسى قىزمەت باسشىسى رۋستام اقمىرزاەۆ.
جاڭا زاڭعا سايكەس, ءبىرىنشى باسشى ونىڭ تىكەلەي باعىنىشتى تۇلعاسىنا قاتىستى سوتتىڭ ايىپتاۋ ۇكىمى كۇشىنە ەنگەننەن سوڭ كۇنتىزبەلىك 10 كۇن ىشىندە نەمەسە اقتالمايتىن نەگىزدەر بويىنشا قىلمىستىق ءىس توقتاتىلعاننان كەيىن وتستاۆكاعا كەتۋگە مىندەتتى.
بۇگىندە سىبايلاس جەمقورلىققا قارسى كۇرەس مەملەكەت ساياساتىنىڭ باسىم باعىتتارىنىڭ بىرىنە اينالدى. باتىس قازاقستان وبلىسىنىڭ وزىندە اگەنتتىك باستاماسىمەن اقپاراتتىق-اعارتۋشىلىق شتابى قۇرىلدى. «Adal komek» جوباسى, «اقجايىق – ادالدىق الاڭى» جوباسى ىسكە اسىرىلىپ جاتىر.
رۋستام اقمىرزاەۆتىڭ ايتۋىنشا «Antikor ortalygy» سەرۆيستىك ورتالىعىندا جەمقورلىققا قارسى ءىس-قيمىلعا بايلانىستى ءىس-شارالار وتكىزۋ ءۇشىن بارلىق جاعداي جاسالعان. بۇل ورتالىقتا كەز-كەلگەن ازامات سىبايلاس جەمقورلىققا قارسى ءارتۇرلى ءىس-شارا ۇيىمداسا الادى ەكەن.
باتىس قازاقستان
