ايماقتار • 24 ءساۋىر، 2020

قالا تازالىعى بارشاعا ورتاق

20 رەت كورسەتىلدى

كوكشەتاۋ قالاسىندا كوكتەمگى تازالىق جۇمىستارى ءجىتى جۇرگىزىلۋدە. قازىر وبلىس ورتالىعىنىڭ ساياباقتارى مەن كوشەلەرى تازارتىلىپ، شاھاردىڭ شىرايىن كەلتىرگەن جاسىل جەلەكتەر وتىرعىزىلىپ جاتىر. قالالىق ءماسليحاتتىڭ شەشىمىمەن وبلىس ورتالىعىن اباتتاندىرۋعا 200 ميلليون 594 مىڭ تەڭگە ءبولۋ جوسپارلانعان.

تازالىق مادەنيەتى - قالا تۇرعىندارىنىڭ كەمشىن ءتۇسىپ جاتقان تۇسى. تاڭ سارىدەن كوشە سىپىرىپ، قوقىس تەرگەن جۇمىسشىلار كوكشەتاۋ تۇرعىندارىنىڭ جاۋاپكەرشىلىگىنەن ءۇمىتتى. شاھاردىڭ شىرايىن كەلتىرۋگە كۇش بىرىكتىرىپ وتىرعان «كوكشەتاۋ دەۋ» سەرىكتەستىگىندە 92 جۇمىسشى ادال ەڭبەك ەتىپ ءجۇر. ەسەلەنە تۇسكەن جۇمىسقا ونداعان كوشە جۋشى كولىك، تراكتورلار، اۆتوگرەيدەرلەر جۇمىلدىرىلعان.   

–قىس بويى قار استىندا قالعان قوقىستى تازارتۋ – بەينەتتى شارۋا. بيىل كوكتەمگى سەنبىلىكتەر بولعان جوق. جىلدا بۇل دا ءبىزدىڭ قىزمەتىمىزگە سەپتىگىن تيگىزەتىن ەدى. ونىڭ ۇستىنە، بيىل ءبىز اكىمدىكتىڭ تاپسىرماسىمەن كوكتەمگى قارعىن سۋدىڭ الدىن الدىق. بۇل مىندەتتەردى ءتيىستى دەڭگەيدە ورىندادىق دەپ بىلەم. قالا تۇرعىندارى ءجيى العىس ايتىپ جاتادى،–دەيدى «كوكشەتاۋ جول-پايدالانۋ باسقارماسى» سەرىكتەستىگى ديرەكتورىنىڭ ورىنباسارى عازينۇر شۋماتوۆ. 

مەكەمە ماماندارى قالا اۋماعىنداعى 50 شاقىرىمنان استام جول بويىن تازالاۋى ءتيىس. قازىر بۇل جۇمىستىڭ باسىم بولىگى اتقارىلعان.

–بريگادامدا 5 ادام بار. اۋەلبەكوۆ پەن كەنەسارىنىڭ قيىلىسىنان نازارباەۆ داڭعىلىنا دەيىن جول جيەگىن، سۋاعارلاردى، كولىك تۇراقتارىن تازارتامىز. جاياۋ جۇرگىنشىلەر جولىن دا تازارتىپ، قوقىستى جينايمىز. قالا تۇرعىندارىنا ايتار ءوتىنىشىمىز، قوعامدىق ورىنداردى لاستاماڭىزدار، اسىرەسە، اۆتوبۋس بيلەتتەرى بەي-بەرەكەت شاشىلىپ جاتىر،–دەيدى بريگادا جەتەكشىسى ءامينا جەتپىسوۆا.

بۇل بريگادا ءبىر كۇن ىشىندە ەكى شاقىرىم اۋماقتى تازارتۋى ءتيىس. ەرتەسىنە وسى اۋماققا قايتا ورالىپ جول جيەگى مەن اعاش دىڭدەرىن اكتەيدى. قالا تازالىعى بارشاعا ورتاق مىندەت ەكەندىگىن تۇرعىندار دا تۇسىنسە ەكەن دەيدى جۇمىسشىلار.

سوڭعى جاڭالىقتار

اراق اۋرۋدان ايىقتىرمايدى

كوروناۆيرۋس • كەشە

ۇقساس جاڭالىقتار