مىسالى, تالدىقورعان قالالىق ەمحاناسىنىڭ دارىگەرلەرى تىركەلگەن ناۋقاستاردىڭ شاعىمىن WhatsApp ارقىلى قابىلداپ, قاجەتتى اقىل-كەڭەستى قاشىقتان بەرىپ وتىر. بۇل تۋرالى قالالىق ەمحانانىڭ الەۋمەتتىك جەلىدەگى پاراقشالارىنان وقىپ قالعان ەدىك. ونداعى جازبالاردا كوروناۆيرۋس ينفەكتسياسىنىڭ ورشۋىنە بايلانىستى ساقتىق شاراسىنىڭ كۇشەيگەنى ەسكەرتىلىپ, دارىگەردىڭ شۇعىل كومەگى قاجەت بولماعان جاعدايدا, ءتيىستى كەڭەستى ەمحاناعا كەلمەي, قاشىقتان الۋ ۇسىنىلعان بولاتىن. ال جازبا سوڭىندا قاجەتتى ماماندارمەن بايلانىسۋعا بولاتىن تەلەفون ءنومىرى بەرىلىپتى.
ءبىز جۋرناليستىك اۋەستىكپەن كارديولوگ دارىگەردىڭ WhatsApp نومىرىنە حابارلاما جىبەرىپ, كەڭەس العىمىز كەلەتىنىن ايتتىق. كۇن جەكسەنبى ەدى. بىراق دارىگەر كوپ كۇتتىرمەدى. ءوزىن قايىركۇل بايزاققىزى دەپ تانىستىرعان كارديولوگ ءبىزدىڭ دەنساۋلىعىمىزدىڭ جايىن ءبىلىپ, تۇرعىلىقتى مەكەنجايىمىزعا قاتىستى سۇراق قويدى. قان قىسىمى, دەنە قىزۋى جايلى مالىمەتتەردى بىلگەننەن كەيىن مامان رەتىندە ءبىزدى مازالاعان ماسەلەگە كوشتى. جانە دارىگەرىمىز كۇننىڭ جەكسەنبى ەكەنىن ايتىپ, ناۋقاس تاريحى تۋرالى مالىمەتتەردى قاراي المايتىنىن بىردەن ەسكەرتتى. ەگەر دەرت كۇشەيىپ, جانعا باتقان جاعدايدا بىردەن جەدەل جاردەم شاقىرۋدى ۇسىندى...
ءبىز وسى جەردەن كەڭەس سۇراۋدى توقتاتىپ, قايىركۇل بايزاققىزىنان جەكسەنبى كۇنى مازالاعانىمىزعا كەشىرىم سۇرادىق ءارى قىزمەت بابىمەن حابارلاسىپ تۇرعانىمىزدى ايتتىق. دارىگەر دە ءبىزدىڭ ارەكەتىمىزدى ءتۇسىنىپ, ساۋالىمىزدى ىزگى نيەتپەن قابىلدادى.
– جۇقپالى ىندەتتەن ساقتانۋ شارالارى كۇشەيگەلى بەرى ءبىز دە پاتسيەنتتەرمىز ءۇشىن ءجيى الاڭدايتىن بولدىق. قالادا جۇرەك, قان قىسىمى اۋرۋىمەن اۋىراتىندار از ەمەس. ولارعا كۇتپەگەن جاعدايدا كەڭەس قاجەت بولىپ قالۋى مۇمكىن, سول ءۇشىن تەلەفون ءنومىرىمىزدى اشىق جاريالاپ, ادامداردىڭ قاشىقتان كومەك الۋىن قولداپ وتىرمىز. جانە بۇل اۋىرتپالىق ەلىمىزدىڭ مەديتسينا قىزمەتكەرلەرى ءۇشىن جاۋاپكەرشىلىكتى ارتتىردى. قانشا ارىپتەسىمىز قاۋىپتى ىندەت وشاعىندا, ينفەكتسيامەن بەتپە-بەت كەلىپ, كاسىبي مىندەتىن اتقارىپ ءجۇر. ءوز باسىم كوروناۆيرۋستان جازىلىپ شىعىپ جاتقان ادامدار جايلى اقپاراتتى ەستىگەن سايىن توبەم كوككە جەتكەندەي بولادى. مۇنى وتاندىق دارىگەرلەردىڭ ءبىلىمى مەن بىلىگىنىڭ ارقاسى, بىزدەگى ءدارى-دارمەكپەن قامتۋ, مەديتسينالىق قۇرىلعىلاردىڭ قولجەتىمدىلىگىنىڭ ناتيجەسى دەپ ايتۋىمىز كەرەك. ىندەت تارالماۋى ءۇشىن ۇيدە وتىرايىق, جۇرەگىڭىزدى ساقتاڭىز, اۋىرماڭىز, – دەيدى تالدىقورعان قالالىق ەمحاناسىنىڭ كارديولوگ دارىگەرى قايىركۇل يمانعازينوۆا.
الماتى وبلىسى
