الايدا ۋاقىتشا سىناق كەزىندە جاماعات نامازى ءۇشىن مەشىت ەسىگى جابىلعانىمەن, ساۋاپ ەسىگى ەشقاشان جابىلمايدى. قاسيەتتى حاديس-شاريفتە ايتىلعانداي, مۇسىلماننىڭ نيەتى – امالىنان قايىرلى. عالامتور جەلىسى ارقىلى ونلاين ناسيحات تىڭداپ, ۇيدەن شىقپاي ساۋاپتى امالدارعا ورتاقتاسۋعا بولادى. ءبىز توتەنشە جاعداي كەزىندە ءپىتىر ساداقاسى مەن زەكەتتى ونلاين رەجىمدە بەرۋدىڭ وڭتايلى جولىن تاڭدادىق.
قادىرلى حالايىق! رامازان – جاقسىلىقتا جارىساتىن اي. اللا تاعالا قاسيەتتى قۇراندا «باقارا» سۇرەسىنىڭ 148-اياتىندا: «...جاقسىلىقتا جارىسىڭدار», دەپ ءامىر ەتكەن.
كارانتين كەزىندە اۋىز بەكىتكەن جاندارعا ازىق-ت ۇلىك جەتكىزىپ بەرۋدى ۇيىمداستىرساڭىز, ءتىپتى كومەككە مۇقتاج وتباسىلارعا اۋىزاشارعا كەتەتىن شىعىندى ۇسىنىپ, ولارعا قارجىلاي قولداۋ كورسەتسەڭىز, اللانىڭ قالاۋىمەن اۋىزاشار بەرگەننىڭ ساۋابىن الاسىز. جوعارىدا ايتقانىمىزداي, مۇسىلماننىڭ نيەتى – امالىنان قايىرلى. وسى رەتتە بارشا وتانداستارىمدى قاسيەتتى ايدىڭ قۇرمەتى ءۇشىن اقىسىز دەمالىسقا شىققان ازاماتتاردىڭ پاتەر اقىسىنا مۇمكىندىگىنشە جەڭىلدىك جاساۋعا, كۇندەلىكتى تۇتىناتىن تۇرمىستىق زاتتار مەن ازىق-ت ۇلىك باعاسىن بارىنشا تومەندەتۋگە, كۇللى جاماندىقتىڭ باستاۋى بولعان اراق-شاراپتىڭ ساتىلۋىنا شەكتەۋ قويۋعا, كومەككە مۇقتاج وتباسىلارعا جان-جاقتى قولداۋ كورسەتۋگە شاقىرامىن.
ساداقا – پەندەنىڭ مال-داۋلەتىن ازايتپايدى, كەرىسىنشە بەرەكەسىن ارتتىرادى. ءبىز بەرگەن ساداقا ءبىر وتباسىن قۋانىشقا بولەيدى. ەندەشە كومەككە ءزارۋ شاڭىراقتى شاتتىققا بولەپ, ۇلكەننىڭ باتاسىن الىپ, العىسىنا بولەنەيىك.
ارداقتى پايعامبارىمىز مۇحاممەد (وعان اللانىڭ سالاۋاتى مەن سالەمى بولسىن): «كىمدە كىم باۋىرىنىڭ قاجەتىن وتەسە, اللا ونىڭ قاجەتىندە بولادى. كىمدە كىم مۇسىلماننىڭ ءبىر قايعىسىن سەيىلتسە, اللا ونىڭ قايعى-قاسىرەتتەرىنىڭ ءبىرىن سەيىلتەدى», دەگەن. حالىق دانالىعىندا ايتىلاتىن: «قايىرىمدىلىق جاساساڭ – قايىرىن ءوزىڭ كورەسىڭ», دەگەن ناقىل ءسوزدىڭ ءمانى وسى بولسا كەرەك.
قۇرمەتتى جاماعات! رامازان – تاۋبە مەن تاربيە, تاقۋالىق پەن قاناعات, شۇكىر مەن سابىر, مەيىرىم مەن قايىرىمدىلىق, بەرەكە مەن بىرلىك ايى. ورازا – ساۋاپ جيناپ, رۋحاني كەمەلدەنۋ ايى. تۇيىندەپ ايتقاندا, رامازان – راببىمىزدىڭ مەيىرىم-ماحابباتىنا بولەنەتىن اي. اللا تاعالا قۇدسي-حاديستە: «اۋزى بەرىك ادام ءىشىپ-جەۋىن مەن ءۇشىن دوعاردى. ورازا – مەن جانە ق ۇلىمنىڭ اراسىنداعى عيبادات. وعان بەرىلەتىن سىيدى مەن عانا ولشەپ, مەن بەرەمىن. اۋزى بەرىك ق ۇلىمنىڭ اشتىق پەن شولدەۋ سەبەبىنەن شىققان اۋىز ءيىسى مەن ءۇشىن ميسك اتىرىنەن دە قايىرلى», دەگەن. ەندەشە بەرەكەلى ايدىڭ بەرەكەتىنەن قۇر قالمايىق, حالايىق. ءجاننات ەسىكتەرى اشىلاتىن ايدا جاقسىلىقتا جارىسايىق. اللا تاعالا نيەتىمىز بەن امالىمىزدى قابىل ەتىپ, بارشامىزدى رامازاننان رامازانعا دەيىن ايدان امان, جىلدان ەسەن جەتكىزە بەرگەي!
جەر بەتىندە جۇقپالى ىندەت جويىلىپ, ورازا ايتتى مەشىتتە قارسى الىپ, قۋانىشتى ساتتە قاۋىشۋدى جازعاي! جاراتۋشى يەمىز جۇرتىمىزعا جار بولعاي, ەلىمىزدى امان, جەرىمىزدى تىنىش ەتكەي! ءامين!
رامازان ايى قۇتتى بولسىن!
ناۋرىزباي قاجى تاعان ۇلى,
قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي
