كارانتين مۇڭايۋعا سەبەپ ەمەس. مۇنى «دوستار» مادەنيەت سارايىنىڭ ۇجىمى دالەلدەۋدە. ولار ءتۇرلى ونلاين شارالار ۇيىمداستىرىپ, شىعارماشىلىق ساباقتار دا ۇيىمداستىرىلۋدا.
– حورەوگرافيا مەن ۆوكال ساباقتارىن ونلاين تۇردە كۇندە وتكىزەمىز. ءبىزدىڭ شاكىرتتەرىمىزدىڭ قاتارىنا باسقا دا ايماقتاردىڭ تۇرعىندارى قوسىلۋدا. ولار بەينەساباقتارىن ارنايى پاراقشالاردان كورىپ, جەتەكشىلەرمەن بايلانىسقا شىعۋدا. ەندى نۇر-سۇلتان مەن پەتروپاۆل قالالارىنان دا بالالار قاتىسۋدا. ءتىپتى كورشىلەس رەسەيدەن ءبىر قىز بالا نيەت ءبىلدىردى. سونداي-اق اقىندار مەن كۇيشىلەردىڭ مەكتەبى دە اۋقىمدى جۇمىستار جۇرگىزىلۋدە. ۇلتتىق اسپاپتاردا ويناۋدى ۇيرەنۋدەن ساباقتار وتكىزىلەدى, – دەيدى «دوستار» مادەنيەت سارايىنىڭ ءبولىم مەڭگەرۋشىسى ەكاتەرينا اۋعانباەۆا.
«دوستار» مادەنيەت سارايىنىڭ شىعارماشىلىق ۇجىمىمەن بىرگە كارانتيندەگى ءار كۇنىڭىزدى قىزىقتى وتكىزۋگە بولادى. ولار ونلاين تۇردە ءداستۇرلى جانە زاماناۋي بيلەردى ۇيرەتۋدە. ال شىنداپ كەلگەندە مۇنداي ساباقتار كەز-كەلگەن ادامنىڭ دەنە ءبىتىمىن قالىپتى ۇستاۋعا تيگىزەر سەپتىگى مول. ونلاين ساباق بارىسىندا ءان ايتىپ, مانەرلەپ وقۋعا دا ەرەكشە ءمان بەرىلگەن. ماسەلەن, ونلاين ساباقتاردىڭ ءبىرى ابايدىڭ 175 جىلدىعىنا ورايلاستىرىلعان.
مىنە, وسىلايشا كارانتين كەزىندەگى ءار كۇنىڭىزدى قىزىقتى ءارى پايدالى ەتىپ وتكىزۋگە بولادى. ول ءۇشىن تەك نيەتىڭىز بولسا جەتكىلىكتى.
