«زەرەندى» ەشكى فەرماسى جۇمىسىن توقتاتقان جوق. اسىل تۇقىمدى مالدىڭ ءسۇتى كۇردەلى تەحنولوگيالىق جەلى ارقىلى وڭدەلەدى. قازىر, كاسىپورىندا جۇمىسشىلاردىڭ دەنى قىسقارتىلعان. بۇل جاي فەرما ءونىمىن ساۋدالاۋ نارىعىنىڭ تارىلۋىنا بايلانىستى. قازىر دايىن ءونىم تەك ەلورداعا عانا جەتكىزىلۋدە. بۇعان دەيىن, ەشكى سۇتىنەن ازىرلەنگەن ونىمدەر نۇر-سۇلتان قالاسىمەن قاتار, الماتى, كوكشەتاۋ, قاراعاندى, جەزقازعان, قوستاناي قالالارىندا دا ساۋدالاناتىن ەدى. كاسىپورىندا جەم-ءشوپ ازىرلەۋ زاۋىتى مەن مال ازىعىنىڭ جەتكىلىكتى قورى بار.
– كاسىپورىن قازىردىڭ وزىندە ەلەۋلى شىعىن كورىپ وتىر. ءبىز بۇل شىعىنداردىڭ اسەرىن بيىل دا, كەلەر جىلى دا سەزىنەتىن بولامىز. اۋىل شارۋاشىلىعىندا بەلگىلى ءبىر مەرزىمدەگى ۇتىمدى ۇيىمداستىرىلعان جۇمىس ءبۇتىن ءبىر جىلدىڭ ونىمدىلىگىنە اسەر ەتەدى. وكىنىشكە قاراي, بيىلعى كوكتەمنىڭ قيىندىقتارىنان كەلگەن شىعىن كولەمى ونداعان ميلليون تەڭگەنى قۇرايدى, – دەيدى زەرەندى اسىل تۇقىمدى ەشكى شارۋاشىلىعى جوباسىنىڭ جەتەكشىسى ازامات تۇرماعامبەتوۆ.
فەرما ەلوردانىڭ ازىق-ت ۇلىك بەلدەۋىنە ەنگەن. كاسىپورىن الەۋمەتتىك ماڭىزى بار نىسانداردى شيپالى اق تاعاممەن قامتاماسىز ەتىپ كەلەدى. سونداي-اق ءوڭىر تۇرعىندارى شەكشەك اتا ت ۇلىگىنىڭ ءسۇتىن جاس سابيلەردى تاماقتاندىرۋعا ءجيى قولدانادى.
اۋىل شارۋاشىلىعى نىسانىنىڭ كوركەيۋىنە اۋىل تۇرعىندارى ايانباي ەڭبەك ەتتى, جانىن سالدى. شارۋالار فەرمانىڭ بولاشاعىنا سەنىممەن قارايدى.
– كاسىپ باستاۋىما ۇلكەن قولداۋ بىلدىرگەن جۇبايىما العىس بىلدىرەمىن. ول بيزنەستى قالىپتاستىرۋعا, دامىتۋعا ۇلكەن ۇلەس قوستى. ءبىز بارلىق قيىندىقتاردى بىرگە جەڭدىك. قازىرگى جاعدايدا دا بىرلەسىپ شەشىم تاباتىنىمىزعا سەنەمىن, – دەيدى زەرەندى اسىل تۇقىمدى ەشكى شارۋاشىلىعى جوباسىنىڭ جەتەكشىسى ازامات تۇرماعامبەتوۆ.
اسىل تۇقىمدى ەشكى شارۋاشىلىعىنىڭ ءوندىرىس كولەمى ازايعان. الايدا, شارۋالار تىعىرىقتان شىعار جول ىزدەپ, ساقتاۋ مەرزىمى ۇزاق ونىمدەرگە باسىمدىق بەرىپ وتىر. تاپسىرىستاردى بەلگىلەنگەن مەرزىمدە ورىنداپ, تۇتىنۋشىنىڭ سەنىمىن جوعالتپاۋدى دا ۇمىت قالدىرماعان. قازىر, كاسىپورىن بالمۇزداق ءوندىرىسىن قولعا العان. بۇدان بولەك, ماي, سۇزبە, ىرىمشىك پەن قۇرت تا وندىرىلەدى. ءوندىرىس شىعىندارىنىڭ ارتۋىنا قاراماستان, بۇل سىننان سۇرىنبەۋىمىز كەرەك, – دەيدى ءوز ءىسىن سۇيگەن شارۋالار.
