ەڭ كوپ جۇمىس ورنى الماتى قالاسىندا اشىلادى دەپ جوسپارلانعان, مەگاپوليستە 26 مىڭ ادام جۇمىسپەن قامتىلۋعا ءتيىس. ودان كەيىنگى ورىندارداعى تۇركىستان وبلىسىندا – 21,9 مىڭ, الماتى وبلىسىندا 21 مىڭ ادامعا جۇمىس بەرىلەدى.
قىزمەتكەرلەردىڭ كەمىندە جارتىسى حالىقتى جۇمىسپەن قامتۋ ورتالىقتارى ارقىلى جۇمىسقا الىنادى دەپ كۇتىلۋدە. جاستارعا باسىمدىق بەرىلەتىنىن ايتا كەتۋ كەرەك.
جۇمىسپەن قامتۋدىڭ جول كارتاسى ينفراقۇرىلىمدىق جوبالارىن ىسكە اسىرۋ 4 نەگىزگى باعىت بويىنشا وتەدى. ولار: الەۋمەتتىك-مادەني وبەكتىلەردى كۇردەلى جانە اعىمداعى جوندەۋ, رەكونسترۋكتسيالاۋ جانە سالۋ ء(بىلىم بەرۋ, دەنساۋلىق ساقتاۋ, الەۋمەتتىك قامسىزداندىرۋ, مادەنيەت, سپورت, دەمالىس جانە تاعى باسقا وبەكتىلەر); تۇرعىن ءۇي-كوممۋنالدىق شارۋاشىلىق وبەكتىلەرىن كۇردەلى, ورتاشا جانە اعىمداعى جوندەۋ, رەكونسترۋكتسيالاۋ (سۋمەن جابدىقتاۋ, كارىز, گازبەن, جىلۋمەن, ەلەكترمەن جابدىقتاۋ جۇيەلەرى); ينجەنەرلىك-كولىك ينفراقۇرىلىمىن كۇردەلى, ورتاشا جانە اعىمداعى جوندەۋ, رەكونسترۋكتسيالاۋ جانە سالۋ (اۆتوموبيل جولدارى, تروتۋارلار, بوگەتتەر, دامبالار مەن كوپىرلەر, ارنالار, سۋ شارۋاشىلىعى وبەكتىلەرى مەن قۇرىلىستارى); ەلدى مەكەندەردى اباتتاندىرۋ (اۋلالاردى اباتتاندىرۋ, كوشەلەردى, ساياباقتاردى, سكۆەرلەردى جارىقتاندىرۋ جانە كوگالداندىرۋ, يەسىز وبەكتىلەردى بۇزۋ جانە تاعى باسقالارى).
وسى ءتورت باعىتتاعى جۇمىستى جۇزەگە اسىرۋعا بارلىعى 1 ترلن تەڭگە بيۋدجەت قاراجاتى ءبولىندى. ونىڭ 37%-ى, ياعني 373 ملرد تەڭگە قۇرىلىس جۇمىستارىنا, 19%-ى – 182 ملرد تەڭگە كۇردەلى جوندەۋ جۇمىستارىنا, 31%-ى 2 308 ملرد تەڭگە اعىمداعى جانە ورتاشا جوندەۋ جۇمىستارىنا, 16 %-ى, ياعني 127 ملرد تەڭگەسى نىساندار مەن قۇرىلىستاردى رەكونسترۋكتسيالاۋعا جۇمسالادى.
جوسپار بويىنشا كۇردەلى, ورتاشا جانە اعىمداعى جوندەۋ, رەكونسترۋكتسيالاۋ جۇمىستارى رەسپۋبليكالىق نەمەسە كوممۋنالدىق مەنشىكتەگى وبەكتىلەر بويىنشا جۇرگىزىلەدى. ينفراقۇرىلىمدىق جوبالاردى ىرىكتەۋدى جانە جۇمىستاردى ىسكە اسىرۋدى جەرگىلىكتى اتقارۋشى ورگاندار ەسەپتەلگەن قارجىلاندىرۋ ليميتتەرىن جانە جۇمىستاردىڭ ءتيىستى قۇجاتتاماسىنىڭ بولۋىن نەگىزگە الا وتىرىپ جۇزەگە اسىرادى.
الماتى وبلىسىندا – 977 جوبانى, شىعىس قازاقستاندا – 813, جامبىل وبلىسىندا – 690, قاراعاندى وبلىسىندا 625 جوبانى ىسكە اسىرۋ جوسپارلان-
عان.
