«30 ناۋرىزدان باستاپ دەنساۋلىق ساقتاۋ مينيسترلىگى تولىقتاي قاشىقتان جۇمىسقا كوشكەن بولاتىن. سوندىقتان, مينيسترلىك ىشىندە دەرت جۇقتىرۋ قاۋپى از. قىزمەتكەرلەردىڭ 90 پايىزى ۇيدەن جۇمىس ىستەۋدە. جۇمىستا ءمينيستردىڭ ءوزى جانە 3-4 ادام عانا قالدى. ولاردىڭ دا ارقايسىسى جەكە كابينەتتە بولعاندىقتان, جۇقتىرۋ قاۋپى از دەگەن ويدامىز. دەگەنمەن, بۇگىن مينيستر ەلجان ءبىرتانوۆ كوروناۆيرۋس ينفەكتسياسىنا تەست تاپسىرادى. ناتيجەسى شىققان سوڭ, حابارلايمىز», - دەدى دياس احمەتشارىپ.
ونىڭ ايتۋىنشا, قازىر دەنساۋلىق ساقتاۋ ۆيتسە-ءمينيسترى بولعان كامالجان نادىروۆپەن بايلانىستا بولعاندار انىقتالىپ جاتىر.
«سوڭعى كۇندەرى كامالجان نادىروۆ مينيستر تاپسىرماسىمەن الماتى وبلىسىندا بولدى. الماتى قالاسىندا ەمحانادان اۋرۋ وشاعى شىعىپ, دارىگەرلەردىڭ اراسىندا تۇسىنىسپەۋشىلىك تۋعاندا دا, كامالجان نادىروۆ بارعان ەدى. ارينە, قورعانىس كيىمىن كيىپ, بارلىق تالاپتاردى ساقتادى. دەگەنمەن, اۋرۋدىڭ كىمنەن, قاي جەردەن جۇققانىن انىقتاۋىمىز قاجەت. ول كىسى قازىر قاي كۇنى قايدا بولعانىن, كىممەن كەزدەسكەنىن تىزبەكتەپ جازىپ وتىر. بايلانىستا بولعان بارلىق ادامدارعا پتر ارقىلى دياگنوستيكا جاسالادى», - دەدى ول.
ەسكە سالا كەتەيىك, دەنساۋلىق ساقتاۋ ۆيتسە-ءمينيسترى بولعان كامالجان نادىروۆ كوروناۆيرۋس ينفەكتسياسىن جۇقتىرىپ, اۋرۋحاناعا جاتقىزىلدى. ول الماتى قالاسى دەنساۋلىق ساقتاۋ باسقارماسىنىڭ باسشىسى قىزمەتىنە كىرىسۋى كەرەك ەدى.
