وتاندىق ورتوپەديالىق اياق كيىم كاسىپورنى پاتسيەنتتەرمەن قالاي بايلانىسىپ وتىر؟

كوروناۆيرۋس ىندەتى ءبىزدىڭ ومىرىمىزگە دە ايتارلىقتاي وزگەرىستەر اكەلدى.  قازاقستاندىق قالالاردىڭ ىشىندە ءبىرىنشى بولىپ قاتاڭ كارانتينگە جابىلعان  الماتىنىڭ كوپتەگەن كاسىپورىندارى ءوز جۇمىسىن توقتاتۋعا ءماجبۇر بولدى. الايدا، ولاردىڭ اراسىندا ەرەكشە قاجەتتىلىكتەرى بار جانداردى جەكە مەديتسينالىق بۇيىمدارمەن قامتاماسىز ەتۋ ءۇشىن جۇمىس ىستەيتىن ەرەكشە كاسىپورىن بار. مۇگەدەكتەردى جانە تىرەك-قيمىل اپپاراتى پاتولوگياسى بار ادامداردى مەديتسينالىق-الەۋمەتتىك وڭالتۋ كومەگىمەن ۇيلەستىرە وتىرىپ، وتەمدىك قۇرالدارمەن قامتاماسىز ەتەتىن وسىنداي كاسىپورىنداردىڭ ءبىرى – الماتى قالاسىنداعى «رەسپۋبليكالىق پروتەزدىك-ورتوپەديالىق ورتالىق» اق (رپوو).

اتالمىش كومپانيا الماتىعا عانا ەمەس، قازاقستاننىڭ باسقا دا وڭىرلەرىنە قىزمەت كورسەتەدى، حالىقتىڭ بارلىق جىكتەرى ءۇشىن پروتەزدىك-ورتوپەديالىق بۇيىمداردى دايىندايدى. ارينە، مۇنداي كاسىپورىننىڭ قىزمەتى توقتاعان كەزدە، ونىڭ پاتسيەنتتەرىندە الاڭداۋشىلىق پايدا بولاتىنى راس، كوپتەگەن سۇراقتار دا تۋىندايدى – مەن ءوز كەرەك-جاراعىمدى الا الامىن با، ول ءۇشىن ماعان نە ىستەۋ كەرەك، كۇردەلى وتپەلى كەزەڭدى قالاي باستان كەشىرۋگە بولادى جانە ت. ب.

«رەسپۋبليكالىق پروتەزدىك-ورتوپەديالىق ورتالىق» اق پرەزيدەنتى نيكولاي پەتروۆتىڭ ايتۋىنشا، پاتسيەنتتەرمەن تۇراقتى بايلانىس ورناتۋ ءۇشىن «ارنايى جەلى» ىسكە قوسىلعان، ورتالىق ماماندارى كوكەيدەگى بارلىق سۇراقتارعا جاۋاپ بەرۋگە دايىن. كۇنىنە كوپتەگەن قوڭىراۋلار كەلىپ تۇسەدى. سونداي-اق ورتالىقتىڭ ەڭبەگى سىڭگەن، كاسىبي ەكى دارىگەرى تەلەفون ارقىلى كەڭەس بەرۋدى جالعاستىرىپ وتىر. بۇلار – 40 جىلدىق ەڭبەك ءوتىلى بار پروتەزشى، ەلدەگى ءوز سالاسىنىڭ ەڭ ۇزدىك ماماندارىنىڭ ءبىرى ەۆگەنيا پاۆلوۆنا پوپكوۆا مەن كەڭەس الۋ ءۇشىن بۇكىل قازاقستاننىڭ پاتسيەنتتەرى جۇگىنەتىن ورتوپەد-دارىگەر قالقا جۇماعۇلقىزى جۇمانوۆا.

– بىزگە ءار ءتۇرلى ماسەلەلەر بويىنشا كۇن سايىن تەلەفون ارقىلى حابارلاسىپ جاتادى. تۇراقتى پاتسيەنتتەرىمىز عانا ەمەس، اياق استىنان  قايعىلى جاعدايعا تاپ بولىپ، ءبىزدىڭ ورتالىققا العاش رەت جۇگىنەتىن ادامدار دا جەتكىلىكتى. ەڭ الدىمەن، ءبىز ولاردى سابىرعا شاقىرىپ، ءۇمىت وتىن ۇيالاتۋعا تىرىسامىز. بىرىنشىدەن، مامىر ايىندا ءبىزدىڭ كاسىپورىن ءوز جۇمىسىن باستايدى دەپ پايىمدايمىز، پاتسيەنتتەرگە كۇندىزگى جانە تولىق كولەمدە كومەك كورسەتەمىز. ەكىنشىدەن، كارانتين اياقتالعاننان كەيىن، بۇيىمداردى دايىنداۋدى بىردەن باستاپ كەتۋ ءۇشىن تۇراقتى پاتسيەنتتەرىمىزبەن پروتەز-ورتوپەديالىق بۇيىمداردى ازىرلەۋ جونىندەگى پراكتيكالىق ماسەلەلەردى – ماتەريالدار مەن پىشىندەر، دايىنداۋ مەرزىمدەرى، قاجەتتى قۇجاتتاردى رەسىمدەۋ تالقىلاۋعا تىرىسامىز. بىزگە العاش رەت كەلىپ وتىرعان ادامدارمەن اعارتۋشىلىق جۇمىس جۇرگىزەمىز – قانداي پروتەز تۇرلەرىن دايىنداۋدامىز، بۇيىمدى تاڭداۋ جانە ءوندىرۋ پروتسەسى قالاي قۇرىلادى، قانشا ۋاقىت الادى، ولشەۋلەر قالاي جانە ت.ب. ياعني، قازىر اۋقىمدى جۇمىس ءجۇرىپ جاتىر. وسىلايشا ءبىز ءوندىرىس باستالعان كەزدە تاپسىرىس بەرۋشىلەرىمىزدىڭ بەلگىلى ءبىر بولىگىنە قىزمەت كورسەتۋ ۋاقىتىن ەداۋىر ازايتامىز دەپ ۇمىتتەنەمىز» – دەيدى دارىگەر-پروتەزشى ەۆگەنيا پوپكوۆا.

ورتالىق دارىگەرلەرى پاتسيەنتتەرگە كەز كەلگەن سۇراقتار بويىنشا كەڭەس بەرەدى. ورتالىقتىڭ بارلىق پاتسيەنتتەرىنىڭ قولداۋدى سەزىنۋى، العاشقى كەڭەستەردى الۋى جانە ءوز پروبلەماسىمەن جالعىز قالمايتىندىعى، بارلىق قاجەتتى كومپەنساتسيالىق قۇرالدارمەن قامتاماسىز ەتىلەتىنە كوز جەتكىزۋى ماڭىزدى.

– پاتسيەنتتەرىمىزبەن ۇنەمى بايلانىستا بولۋ ءۇشىن ارناۋلى تەلەفون جەلىسى اشىلدى. ءبىزدىڭ دەر كەزىندەگى كەڭەسىمىز بەن قولداۋىمىزدىڭ جوقتىعى مۇمكىندىگى شەكتەۋلى ادامداردىڭ جاعدايىن ودان ءارى قيىنداتادى. ءبىز، ارينە، ورتوپەديالىق بۇيىمداردى الۋعا، بۇيىمداردىڭ ءتۇرى مەن مودەلىن تاڭداۋعا، ونى كيۋ ەرەكشەلىگىنە بايلانىستى ناقتى ماسەلەلەر بويىنشا جۇگىنەتىندەردىڭ بارلىعىنا كەڭەس بەرەمىز.سۇراقتار كوپ، ءبىر جىلدان استام ۋاقىت بويى ءبىزدىڭ پاتسيەنت بولىپ كەلگەن جاندار دا ءتۇرلى ساۋالدارمەن حابارلاسادى. العاش رەت وسىنداي پروبلەماعا تاپ بولعان ادامدار تۋرالى نە دەۋگە بولادى؟

مىسالى، وتكەن كۇندەرى تابان سۇيەگىندە دەفەكتى بار بالانىڭ اناسى قوڭىراۋ شالدى. جىلايدى، نە ىستەۋ كەرەكتىگىن بىلمەيدى. ءبىز ونى تىنىشتاندىردىق، ورتوپەديالىق اياق كيىمدى دۇرىس كيگەن جاعدايدا وڭالتۋعا جول اشىلاتىنىن ايتتىق. ەڭ باستىسى، قامىقپاي، ماماندارمەن تەزىرەك جۇمىس ىستەۋدى باستاۋ ورىندى. ءبىز بۇل ايەلدى الدىن-الا مامىر ايىنىڭ ءبىرىنشى جارتىسىندا كەزدەسۋگە جازدىق. وسى وتباسىنا كومەكتەسىپ، بالانىڭ ءومىرىن تولىققاندى ەتە الامىز دەپ ۇمىتتەنەمىز، – دەيدى ورتوپەد قالقا جۇمانوۆا.

«ارنايى جەلىنىڭ» ءبىرىنشى جانە ماڭىزدى مىندەتى – مۇمكىندىگى شەكتەۋلى جانداردى پسيحولوگيالىق قولداۋ. شىنىندا دا، امپۋتاتسياعا نەمەسە جاراقات الۋ مەن تۇزەتۋدى قاجەت ەتەتىن اۋرۋلارعا بايلانىستى قيىن جاعدايعا تاپ بولعان ادامدار ءۇشىن  پسيحولوگيالىق كومەك ماڭىزدى. ال، ەكىنشى رەتتە ورتالىقتىڭ جۇمىسىن تەلەفون بايلانىسى ارقىلى جالعاستىرۋدىڭ وتە ورىندى مىندەتى – بۇل ءونىمدى وندىرۋگە كەتەتىن قۇندى ۋاقىتتى ازايتۋ. ويتكەنى، بارلىق پروتەزدىك-ورتوپەديالىق كەرەك-جاراقتار ءار ادامعا جەكە جاسالادى.

– دايىنداۋ پروتسەسى بىردەن باستالمايدى. ءبىزدىڭ پاتسيەنتتەرىمىزدى قازىر قانداي نۇسقالار بار، بۇيىمداردى قالاي دۇرىس قولدانۋ كەرەك، جالپى تالاپ ەتىلەتىن قادامداردىڭ الگوريتمى قالاي – باعىتتاما الۋعا جۇگىنۋ مەن ءبىزدىڭ ورتالىققا كەلۋگە دەيىن، وسى ساۋالدار ولاردى قىزىقتىرۋى مۇمكىن. ءبىز پاتسيەنتتەرمەن بايلانىسا وتىرىپ، بىرلەسكەن جولىمىزدىڭ ءبىر بولىگىن ءجۇرىپ وتەمىز، ولار ورتالىققا ولشەۋگە جانە جەكە كەزدەسۋگە كەلگەن ۋاقىتتا، كوپ نارسە دايىن بولادى جانە جاسالىنىپ ۇلگەرەدى. دارىگەرلەر مەن ماماندار پروتەزدەر مەن ورتوپەديالىق اياق كيىمدەر تۋرالى ءوزارا كەلىسەدى، پاتسيەنتتەرمەن تەلەفون ارقىلى ەگجەي-تەگجەيلى تالقىلايدى، بۇل – ورتالىق تولىق كۇشىنە ەنگەن كەزدە وعان دەيىن باستالعان جۇمىستى تەز اياقتاۋعا مۇمكىندىك بەرەتىن ماڭىزدى جانە ۇلكەن ءىس، – دەپ اتاپ ءوتتى نيكولاي پەتروۆ.

الداعى ۋاقىتتا ورتوپەديالىق اياق كيىم شىعاراتىن تسەح ءوز جۇمىسىن باستايدى. كومپانيادا كاسىپورىنداعى بارلىق قاۋىپسىزدىك شارالارىن ساقتاۋ ارقىلى عانا ەمەس، سونىمەن قاتار پاتسيەنتتەرىنە ۇيدەن ارتىق شىقپاۋ مۇمكىندىگىن ۇسىنۋ ارقىلى كارانتين رەجيمىن ساقتاۋعا ىقپال ەتۋ ءۇشىن بارلىق تاپسىرىستاردى مەكەن-جايعا دەربەس تۇردە جەتكىزۋگە دايىن ەكەندىگىن ايتادى.

الماتى