سونىڭ ءبىرى تابىسىنان ايىرىلعان ازاماتتارعا ەڭ تومەنگى جالاقى مولشەرىندە قولداۋ كورسەتىلگەنىن ايتۋعا بولادى. ايتالىق ەلىمىزدە 3,7 ملن-عا جۋىق ادامعا مەملەكەتتىك الەۋمەتتىك ساقتاندىرۋ قورىنان توتەنشە جاعداي كەزىندە تابىسىنان ايىرىلۋىنا بايلانىستى تولەمدەر تاعايىندالدى. 20 ساۋىردەگى جاعداي بويىنشا 42 500 تەڭگەلىك تولەمگە 7 ملن 990 مىڭ ادام ءوتىنىش بەرگەن.
بىرەگەي وتىنىشتەردىڭ ەڭ كوپ سانى الماتى وبلىسىندا تىركەلدى. بۇل وبلىستىڭ 1 ملن تۇرعىنى جاڭا تولەمدى الۋعا نيەت ەتىپتى. ءدال وسىلايشا تۇركىستان وبلىسىندا 990,7 مىڭ ادام, الماتى قالاسىندا 892,8 مىڭ, نۇر-سۇلتان قالاسىندا 590,8 مىڭ, شىمكەنت قالاسىندا 532,2 مىڭ ادام ءوتىنىش بەرگەن. ال وڭىرلەر بويىنشا الماتى وبلىسىنىڭ تۇرعىندارىنا جاردەماقى ەڭ كوپ تاعايىندالعان. ناقتىراق ايتساق, الماتى وبلىسىندا – 534,1 مىڭ ادام, تۇركىستان وبلىسىندا – 436,6 مىڭ, الماتى قالاسىندا 364 مىڭ تۇرعىن اتالعان تولەمگە قول جەتكىزگەن.
بۇدان بولەك زەينەتاقى مەن جاردەماقى يندەكساتسيالاندى. مەملەكەت باسشىسىنىڭ تاپسىرماسىنا سايكەس, ەڭبەك جانە حالىقتى الەۋمەتتىك قورعاۋ مينيسترلىگى زەينەتاقىلار مەن مەملەكەتتىك جاردەماقىلاردى جىلدىق تۇرعىدا 10 پايىزعا يندەكساتسيالاۋدى جۇرگىزدى. وسىلايشا 2020 جىلدىڭ 1 ساۋىرىنەن باستاپ زەينەتاقىنىڭ ەڭ تومەنگى مولشەرى 40 441 تەڭگەنى قۇرادى. ەندى ەل ازاماتتارى كوتەرىلگەن زەينەتاقى مەن جاردەماقىسىن مامىردىڭ تولەمدەرىمەن قوسىپ بىرگە الادى.
مەملەكەت تاراپىنان بەرىلەتىن تاعى ءبىر كومەك – كوممۋنالدىق تولەمدەرگە اي سايىن تولەنەتىن 15 مىڭ تەڭگە. بۇل تولەم بارلىق ازاماتقا بىردەي بەرىلمەيدى. يندۋستريا جانە ينفراقۇرىلىمدىق دامۋ مينيسترلىگىنىڭ مالىمەتىنشە, كارانتين ەنگىزىلگەن وڭىرلەردە اكىمدىكتەر تۇتىنۋشىلاردىڭ دەربەس (ابونەنتتىك) شوتتارىنا ەكى اي بويى 15 مىڭ تەڭگەدەن اۋدارىپ وتىرادى. مەملەكەتتىك ورگانداردىڭ ۇسىنىسى نەگىزىندە تولەم الۋشىلاردىڭ كەلەسى ساناتتارى ايقىندالعان. اتالعان ساناتقا كىرەتىن ازاماتتار تولەمدى الۋ ءۇشىن اقپاراتتىق جۇيەلەر نەمەسە call-ورتالىقتار ارقىلى جەكە سايكەستىندىرۋ ءنومىرىن, الەۋمەتتىك دارەجەسىن جانە دەربەس شوت دەرەكتەرىن كورسەتە وتىرىپ, اكىمدىككە ءوتىنىم بەرۋى كەرەك.
توتەنشە جاعداي كەزىندە تۇرمىستىق قيىندىققا ۇشىراعان ازاماتتارعا ازىق-ت ۇلىك جيىنتىعى بەرىلەدى. بۇگىندە مۇنداي كومەك الاتىن ادامداردىڭ سانى 1,2 ملن-عا جەتىپ وتىر. ياعني كوپ بالالى وتباسىلار, بارلىق توپتاعى مۇگەدەكتەردى قوسا العاندا, اتاۋلى الەۋمەتتىك كومەك الاتىن از قامتىلعان ازاماتتار, مۇگەدەك بالانىڭ كۇتىمىمەن وتىرعان اتا-انالار, سونىمەن قاتار جۇمىسپەن قامتۋ ورگاندارىندا جۇمىسسىز رەتىندە رەسمي تىركەلگەن تۇلعالار وسى كومەكتى الىپ جاتىر. ولارعا بارلىق وڭىردە ازىق-ت ۇلىك جيىنتىعى نەمەسە ازىق-ت ۇلىك جيىنتىعىنا ارنالعان قاراجات تۇرىندە (4 ايلىق ەسەپتىك كورسەتكىش كولەمىندە) بەرىلۋدە.
قازاقستان پرەزيدەنتى قاسىم-جومارت توقاەۆتىڭ دارىگەرلەردى قولداۋ تۋرالى تاپسىرماسىنا سايكەس ۇكىمەت ارنايى شەشىم قابىلداپ, مەديتسينا قىزمەتكەرلەرى جۇمىسىنىڭ قاۋىپتىلىگىنە قاراي 3 توپقا ءبولىندى. ءبىرىنشى توپ – رەانيماتسيا بولىمدەرىمەن قوسا العاندا جۇقپالى اۋرۋلار ستانتسيونارلارىنىڭ دارىگەرلەرى, ورتا جانە كىشى مەديتسينا قىزمەتكەرلەرى. ولاردىڭ جالاقىسىنا ۇستەمەاقى ايىنا 850 مىڭ تەڭگەنى قۇرايدى. ياعني ورتاشا ايلىعىن قوسقاندا, ولار ايىنا شامامەن 1 ملن تەڭگەنىڭ ۇستىندە الادى. ەكىنشى توپ – پروۆيزورلىق ستاتسيونار مەن جەدەل جاردەم قىزمەتتەرىنىڭ دارىگەرلەرى, ورتا جانە كىشى مەديتسينا قىزمەتكەرلەرى. ولاردىڭ ۇستەمەاقىسى ايىنا 425 مىڭ تەڭگە بولادى. ورتاشا ايلىعىن قوسقاندا ولار ايىنا شامامەن 600 مىڭ تەڭگە الادى. ءۇشىنشى توپقا كارانتيندىك ستاتسيونار دارىگەرلەرى, ورتا جانە كىشى مەديتسينا قىزمەتكەرلەرى, سانيتارلىق دارىگەرلەر, جەدەل جاردەم جۇرگىزۋشىلەرى جانە تاعى باسقالارى كىرەدى. ولار ايىنا 212 مىڭ تەڭگە ۇستەمەاقىنى قوسقاندا, شامامەن 380 مىڭ تەڭگە الادى. سونداي-اق مەديتسينا قىزمەتكەرلەرىنىڭ دەنساۋلىعى مەن ءومىرىن ساقتاندىرۋ ماسەلەسى دە پىسىقتالعان. ولار اۋىرىپ قالعان جاعدايدا 2 ملن تەڭگە مولشەرىندە ساقتاندىرۋ تولەمى بەرىلەدى. قۇداي ساقتاسىن, بىراق مەديتسينالىق قىزمەتكەر قايتىس بولعان جاعدايدا 10 ملن تەڭگە مولشەرىندە تولەماقى بەرىلەدى.
سونداي-اق «تۇرعىنۇيقۇرىلىسجيناقبانكى» 2020 جىلعى 16 ناۋرىزدان كەيىن وتەلۋى ءتيىس تولەمدى 90 كۇنگە شەگەرۋگە مۇمكىندىك بەردى. شەگەرىلگەن تولەمگە نەگىزگى قارىز دا, نەسيە سىياقىسى دا كىرەدى. سونىمەن قاتار 2020 جىلعى 16 ناۋرىز بەن 16 ماۋسىم ارالىعىندا ۋاقتىلى وتەلمەگەن تولەمدەر بويىنشا ايىپپۇل جانە ءوسىمپۇل دا قوسىلمايدى.
