بۇگىن استانادا ماڭىنداعى «قازانات» اتشابارىندا كوكپاردان ءوتىپ جاتقان ازيا چەمپيوناتى ودان ءارى جالعاستى.
وسى كۇنى اپتا باسىنان بەرگى ەلوردانىڭ تۇنەرگەن اسپانى اشىلىپ, حالىق كوكپار تارتقان جىگىتتەردىڭ ونەرىن تاماشالاۋعا كوپ جينالدى.
قازىرگى تاڭدا وسى ۇلتتىق ويىنىمىزدى حالىق اراسىندا كەڭىنەن ناسيحاتتاۋ, سالاماتتى ءومىر سالتىن قالىپتاستىرۋ جانە ويىننىڭ تەحنيكاسى مەن شەبەرلىگىن يگەرۋگە جاستارىمىزدىڭ قىزىعۋشىلىعىن وياتۋ اسا ماڭىزدى بولىپ وتىر. وسى ورايدا ەلىمىزدە حالىقارالىق, رەسپۋبليكالىق جارىستاردى ۇيىمداستىرىپ كەلە جاتقان ۇلتتىق سپورت تۇرلەرى قاۋىمداستىعىنىڭ جۇمىسى مەن قىزمەتىن ەرەكشە اتاپ وتكەنىمىز ءجون. ۇلتتىق سپورت تۇرلەرىنەن مۇنداي حالىقارالىق جارىستار وتكىزۋدىڭ باستى ماقساتى – قازاقتىڭ باي رۋحاني مۇراسىن جاڭعىرتۋ جانە ناسيحاتتاۋ. كەشە ازيا چەمپيوناتىنىڭ ەكىنشى كۇنى دە قىزىقتى جانە تارتىستى ءوتتى. سارى قۇرلىق باسەكەسىنىڭ فاۆوريتتەرى – قازاقستان مەن قىرعىزستان قۇرامالارى كوپشىلىك كۇتكەندەي, كەزەكتى ويىندارىندا جەڭىسكە جەتتى. قازاقستان قۇراماسى رەسەي كومانداسىن 16:1 ەسەبىمەن, ال الاتاۋدىڭ ار جاعىنان كەلگەن ايىرقالپاقتى اعايىندار تۇركيانى 16:3 ەسەبىمەن ۇتتى. وسى كۇنى تاجىكستان قۇراماسى دا العاشقى ۇپايلارىن ساناپ الدى. ولار موڭعوليا كوكپارشىلارىن 8:1 ەسەبىمەن جەڭسە, العاشقى ۇپايلارىنا يە بولعان قىتاي كومانداسى دا وزبەكستاننان 6:4 ەسەبىمەن باسىم ءتۇستى.
ەرتەڭ ويىندار ودان ءارى جالعاسادى. ال سەنبى كۇنى چەمپيوناتتىڭ جارتىلاي فينالى وتسە, جەكسەنبى كۇنى كوماندالار ءوزارا ازيا چەمپيونىن انىقتايدى.
داستان كەنجالين.
سۋرەتتى تۇسىرگەن ەرلان وماروۆ.
