كەشە تۇركيانىڭ ىستامبۇل, انكارا, يزمير, انتاليا سەكىلدى كوپتەگەن قالالارىندا ۇكىمەتكە قارسى نارازىلىق اكتسيالارى قايتا جانداندى. بۇل تۋرالى يتار-تاسس حابارلادى.
تۇركيا استاناسىندا پوليتسيا تىكۇشاقتارى اسپانعا قايتا كوتەرىلدى. ولار كوپشىلىك شوعىرلانعان ديكمەن داڭعىلى مەن تۇندە پوليتسيانىڭ شەرۋشىلەر بارريكادالارىنا قارسى شابۋىلدارى وتكەن ماماك اۋدانىن باقىلاپ ءجۇر. بۇل اۋداندا حالىق فەتتۋلاح گيۋلەن باستاعان سۋننيتتىك قوزعالىستىڭ دەمەۋشىلىگىمەن مەشىت جانە ءدىني كەشەننىڭ سالىنۋىنا نارازىلىق بىلدىرۋدە. ەرەۋىلشىلەر قۇرىلىس الاڭى جانىندا بارريكادالار قۇرىپ, ولاردى بەكىتۋگە كىرىسكەن. ال پوليتسيا ازىرگە شابۋىلعا باستايتىن بۇيرىقتى كۇتۋدە.
اسا كۇردەلى جاعداي يزمير مەن انتاليا قالالارىندا تۋىنداپ وتىر. مۇنداعى شەرۋشىلەردى تاراتۋ ءۇشىن كۇشتىك قۇرىلىمدار كوز جاساۋراتاتىن گاز بەن سۋ اتقىشتاردى قولدانعان. الايدا, ەرەۋىلشىلەر ۇكىمەتكە قارسى باعىتتالعان ۇراندارىن ايتۋدى توقتاتپاي, پرەمەر-مينيستر تايپ ەردوگاننىڭ قىزمەتىنەن كەتۋىن تالاپ ەتۋدە.
ىستامبۇلدا بىرنەشە مىڭ ادام انكاراداعى نارازىلىق كەزىندە قازا تاپقان 22 جاسار احمەت اتاكاندى ەسكە الىپ, كادىكەي الاڭىنا جينالدى. جاس جىگىت نارازىلىق شەرۋى كەزىندە تۇرعىن ءۇي شاتىرىنان قۇلاپ تۇسكەن. شوعىرلانعان حالىق: «پوليتسەيلەر – جان العىشتار, بۇل جەردەن جوعالىڭدار», – دەپ ۇرانداتۋدا.
ايدار ورىسباەۆ.
