بۇرناعى كۇنى تۇندە استاناداعى «استانا-ارەنا» سپورت كەشەنىندە فۋتبولدان قازاقستان مەن شۆەتسيا قۇرامالارى 2014 جىلعى الەم چەمپيوناتىنىڭ ىرىكتەۋ ءتۋرنيرى اياسىندا كەزدەستى. ەكى جاقتىڭ تەڭ دەرلىكتەي دەڭگەيدە وتكەن كەزدەسۋى قوناقتاردىڭ 1:0 ەسەبىمەن جەڭۋىمەن اياقتالدى.
بۇرناعى كۇنى تۇندە استاناداعى «استانا-ارەنا» سپورت كەشەنىندە فۋتبولدان قازاقستان مەن شۆەتسيا قۇرامالارى 2014 جىلعى الەم چەمپيوناتىنىڭ ىرىكتەۋ ءتۋرنيرى اياسىندا كەزدەستى. ەكى جاقتىڭ تەڭ دەرلىكتەي دەڭگەيدە وتكەن كەزدەسۋى قوناقتاردىڭ 1:0 ەسەبىمەن جەڭۋىمەن اياقتالدى.
تەگىندە, ءار نارسەنىڭ ءوز ورنى بار. ءبىز دە تاپ وسى ماتچتا ءوز كوماندامىزدىڭ ۇتا سالاتىنىنا كامىل سەنە قويعان جوقپىز. جاسىراتىنى نە, ويىن باستالاردىڭ الدىندا جىگىتتەرىمىز تەك ءىرى ەسەپپەن جەڭىلىپ قالماسا ەكەن دەپ تىلەدىك. قالاي دەگەندە دە, شۆەتسيا قۇراماسى شىمكەنتتىڭ ىرگەسىندەگى قارابۇلاق اۋىلىنداعى جۇرتپەن شامالاس قانا حالقى بار فارەر ارالدارى ەمەس قوي. ابىروي بولعاندا, جاساعىمىز بۇل كۇنى جارقىلداپ كورىنىپ, قولىنان كەلگەنىن جاساپ-اق باقتى.
كەزدەسۋدە الاڭ يەلەرىن قوناقتاردىڭ ماتچتىڭ 28-سەكۋندىندا گول سوعىپ كەتكەنى دە كوپ ابىرجىتا قويمادى. سونىڭ ناتيجەسىندە ولار كوپ ۇزاماي ءوز باقىتتارىن قارسى قاقپا جاقتان ىزدەۋگە شىنداپ كىرىستى. ال گولدى ءبىزدىڭ قاقپاعا زلاتان يبراگيموۆيچ سوقتى.
ماتچتا قازاقستاندىقتار بۇرىشتاما بەرۋدەن دە قوناقتاردان قالىسا قويمادى. ءبىز ولاردىڭ 7 سوققىسىنا 5 بۇرىشتاما دوبىمەن جاۋاپ قايتاردىق.
ال ەكىنشى تايمنىڭ باسىندا قازاقستان قۇراماسى ەسەپتى تەڭەستىرىپ كەتە جازدادى. قازاقستاندىقتار بۇدان كەيىن دە اشىق بەلسەندىلىك تانىتتى.
كەزدەسۋ سوڭىندا ءبىزدىڭ جىگىتتەر تاعى ەكى قاۋىپتى شابۋىل جاسادى. الدىمەن ماقسات بايجانوۆ شۆەدتەر ايىپ الاڭىندا اشىق قالىپ, دوپ قابىلدادى. بىراق ونى ۇرا المادى. كەلەسىسىندە دميتري شومكو الىستان سوققى جاسادى. ويىن وسى قالپىندا سوڭىنا جەتتى.
قازاقتا مۇندايدا «الۋان-الۋان جۇيرىك بار, الىنە قاراي شابادى» دەگەن قاناتتى ءسوز كوبىرەك ايتىلادى. ءبىزدىڭ جىگىتتەر دە الدەرىنە قاراي شاپتى. تىم جامان شاپقان دا جوق. ەۋروپا تۋرنيرلەرىندەگى كەشەگى «شاحتەر» مەن «اقتوبەنىڭ» ويىندارى بۇلاردى دا قامشىلاعان سياقتى. ءبىز وسىعان سۇيىندىك.
قازاقستان قۇراماسى كەلەسى ويىنىن 11 قازان كۇنى فارەر ارالدارى كومانداسىمەن وتكىزەدى.
دامير قوجامقۇل.
–––––––––––––––––––––
سۋرەتتى تۇسىرگەن
ورىنباي بالمۇرات.
