جاستار رەسۋرستىق ورتالىعىنىڭ ديرەكتورى ارايلىم ەسىمبەكوۆانىڭ ايتۋىنشا, قازىر وڭىردە 1000-عا جۋىق ۆولونتەر ءتۇرلى شارالارعا اتسالىسۋدا. «ونىڭ ىشىندە وسكەمەندە – 110, سەمەيدە – 70 ادام ازىق-ت ۇلىك تاسىمالىمەن اينالىسۋدا. ولار مەديتسينالىق ماسكالارمەن, كولعاپتارمەن, قورعانىش كوستيۋمدەرىمەن جانە انتيسەپتيكتەرمەن تولىقتاي قامتاماسىز ەتىلگەن. ۆولونتەرلەر قاتارىنا قوسىلعىسى كەلگەندەر وبلىستىق جاستار رەسۋرستىق ورتالىعىنا حابارلاسىپ جاتادى. قازىرگىدەي توتەنشە جاعداي كەزىندە ۆولونتەرلەر تالاي يگى شارالارعا بىلەك سىبانا قاتىسىپ جاتىر. اتاپ ايتقاندا, قارتتار مەن مۇگەدەكتەرگە ەڭ قاجەت زاتتاردى ۇيگە دەيىن جەتكىزىپ بەرۋدە. ولارعا تەلەفون ارقىلى تاپسىرىس بەرسە بولعانى. بايلانىس ورتالىعىنىڭ ماماندارى وتىنىشتەردى 07:00-دەن باستاپ 19:00-گە دەيىن قابىلدايدى. سەمەي مەن وسكەمەن قالالارىنا كىرۋ-شىعۋ جولدارى جابىلىپ, بلوك-بەكەتتەر قويىلعان. كۇن دەمەي, ءتۇن دەمەي ەڭبەك ەتىپ جۇرگەن قۇقىق قورعاۋ ورگاندارى مەن مەديتسينا سالاسىنىڭ ماماندارىنا, اسكەري قىزمەتكەرلەردىڭ يىعىنا ۇلكەن جاۋاپكەرشىلىك جۇكتەلگەنى ايتپاسا دا تۇسىنىكتى. ولارعا قولداۋ كورسەتۋ ماقساتىندا شىعىسقازاقستاندىق جاستار «جىلۋ سىيلا» اكتسياسىن ۇيىمداستىردى. ءسويتىپ 15 ۆولونتەر بلوك-بەكەتتەردەگى قىزمەتكەرلەرگە ىستىق شاي مەن باۋىرساق تاراتتى. سونىمەن قاتار ەرىكتىلەرىمىز ءتارتىپ ساقشىلارىمەن بىرگە تۇرعىندارعا توتەنشە جاعداي كەزىندەگى شەكتەۋلەر تۋرالى ءتۇسىندىرۋ جۇمىستارىن دا جۇرگىزگەن. شارا بارىسىندا جۇرگىزۋشىلەرگە كوروناۆيرۋس ينفەكتسياسىنان ساقتانۋدىڭ جولدارى كورسەتىلگەن جادىنامالار تاراتىلدى. جاقىن كۇندەرى «قايىرىمدى كورشىلەر» اكتسياسىن قولعا الماق ويدامىز. شىنىن ايتقاندا, ۆولونتەرلەر مۇقتاج جانداردىڭ بارلىعىن انىقتاي المايدى. سول ءۇشىن حالىققا ء«وز كوشەڭىزدەگى قازىنالى قارتتارعا, مۇگەدەكتەرگە ءسىزدىڭ كومەگىڭىز قاجەت. ەگەر دۇكەنگە بارا جاتساڭىز, ولاردىڭ كەرەك زاتتارىن الا كەلسەڭىز نۇر ۇستىنە نۇر بولادى», دەپ الەۋمەتتىك جەلىلەر ارقىلى بەينەروليكتەر تاراتىپ, ساۋاپتى ىسكە شاقىرۋدامىز. وسىنداي سىن ساعاتتا ۆولونتەرلەر جۇدىرىقتاي جۇمىلىپ جۇمىس ىستەۋدە. ءتىپتى ولاردىڭ اراسىندا از قامتىلعان وتباسىلارعا قارجىلاي قولداۋ كورسەتىپ جاتقاندار دا بار», دەيدى ول.
شىعىس قازاقستان وبلىسى
