اسيما جۇمابايقىزىنىڭ سوزىنشە, ءبىر ناۋقاس بۇگىن كەشكە ۇيىنە جىبەرىلەدى. ول قىزىلوردا وڭىرىنەن اقتاۋعا جۇمىس جاساۋعا كەلگەن ازاماتتىڭ جۇبايى. ءوزىن جاقسى سەزىنەدى. بارلىق مەديتسينالىق تالداۋ تەرىس ناتيجە كورسەتكەن.
- بۇل كىسىنىڭ جولداسى - 50 جاستاعى ەر ادام جاساندى تىنىس الۋ اپپاراتىنا قوسىلعان. جاعدايى اۋىر دەپ باعالانىپ وتىر. ودان بولەك تاعى ەكى ناۋقاس ەم قابىلداپ جاتىر. قازىرگى جاي-كۇيىن ورتاشا تۇراقتى دەپ ايتۋعا بولادى. ساۋىعىپ تۇرىپ ستاتسيوناردان شىعادى دەپ ۇمىتتەنەمىز, دەيدى ول.
ايتا كەتەيىك, پروۆيزورلىق جانە وبسەرۆاتسيالىق ورىندارعا تۇسكەن ادامداردىڭ ازعاسىندا ۆيرۋستىڭ بار-جوعى انىقتالادى. تەرىس ناتيجە بولعان جاعدايدىڭ وزىندە كارانتين مەرزىمى اياقتالعان سوڭ عانا ۇيىنە بوساتىلادى. بۇل رەتتە ونىڭ 14 كۇن ءوزىن-ءوزى وقشاۋلاۋى ماڭىزدى. ياعني, وعان ءوز باسپاناسىنان شىعۋىنا بولمايدى. ول تۇراتىن پاتەر نەمەسە ۇيگە باسقا ادامداردىڭ بارۋىنا تىيىم سالىنادى. وقشاۋلاندىرىلعان ازامات ۇنەمى بەتپەردە تاعۋى قاجەت. بولمەلەردىڭ ءىشىن ۇنەمى زالالسىزداندىرىپ تۇرۋ كەرەك.
- قازىرگى تاڭدا ماڭعىستاۋ وبلىسىندا شەتەلدە ءبىلىم جاتقان ستۋدەنتتەر كەلىپ جاتىر. بارلىعى بىردەي مىندەتتى تۇردە مەديتسينالىق تەكسەرۋدەن وتەدى. ولاردىڭ اراسىندا اقتوبەدە 14 كۇن كارانتيندە بولىپ, تەكسەرۋدەن وتكەندەرى بار. بەرىلگەن قۇجاتقا سايكەس ءوز ۇيلەرىنە قايتا الادى. قازىر تۇرعىلىقتى مەكەن-جايلارى بويىنشا كارانتينگە الىندى. قاۋىپتى ىندەتتىڭ ايماقتا تارالۋى شارىقتاۋ شەگىنە جەتتى دەپ ايتۋعا بولمايدى. ەگەر تۇرعىندارىمىز توتەنشە جاعداي ءتارتىبىن بۇزباي, ۇيدە وتىرسا بۇل كەزەڭنەن وتەمىز», - دەپ وي ءتۇيدى اسيما جارىلعاسوۆا.
مامانداردىڭ ايتۋىنشا, ۆيرۋس كيىم-كەشەككە جۇققاننىڭ وزىندە تىرشىلىگىن جويادى. الايدا, پلاسماست نەمەسە تەمىر تۇيمەدە ءبىراز ۋاقىت ساقتالادى. وسى سەبەپتى اسا قاجەت بولماسا تۇيمەسىز نەمەسە بەلدىكسىز كيىمدەردى كيگەن ءجون. سمارتفون ەكرانى مەن ونىڭ قورعانىش تىسقابىن ءجيى ءسۇرتىپ تۇرعان دۇرىس. زالالسىزداندىرعىش ەرىتىندىمەن وڭدەلگەن زاتتاردى 15 مينۋت قوزعاماۋ قاجەت.
سونىمەن, بۇل ماڭعىستاۋدا اتالعان ۆيرۋستان ەمدەلىپ شىققان ەكىنشى ادام بولىپ سانالادى.
