شەتەلدىك باق استانا قالاسىندا وتكەن دامۋشى نارىقتاردىڭ ەۋرازيالىق فورۋمى جونىندە
باسقا باسىلىمداردان
نە دەيدى؟
شەتەلدىك باق استانا قالاسىندا وتكەن دامۋشى نارىقتاردىڭ ەۋرازيالىق فورۋمى جونىندە
سەيسەنبى كۇنى استانا قالاسىندا دامۋشى نارىقتاردىڭ ەۋرازيالىق فورۋمىندا ءسوز سويلەگەن قازاقستان پرەزيدەنتى نۇرسۇلتان نازارباەۆ مۇناي قازاقستاننىڭ باستى تابىس كوزى بولماۋى ءتيىس ەكەنىن العا تارتتى.
«شيكىزات قورى ەكونوميكا وسىمىنە ىقپال ەتەدى. دەگەنمەن, ول مەملەكەتتىڭ باستى تابىس كوزى بولماۋى كەرەك. بۇل – ۇكىمەتتىڭ نەگىزگى تاپسىرماسى. ءبىزدىڭ حالىق ءۇشىن جىلىنا 2 ملن. باررەل مۇناي وندىرىلسە جەتكىلىكتى», – دەدى ن.نازارباەۆ.
--------------------------------------------------------------------------------------
قازاقستان ۇكىمەتى بيىل 2050 جىلعا دەيىنگى ەل دامۋى ستراتەگياسىنىڭ جوباسىن جاساۋدى اياقتايدى. بۇل تۋرالى دامۋشى نارىقتاردىڭ ەۋرازيالىق فورۋمىندا قازاقستان پرەزيدەنتى نۇرسۇلتان نازارباەۆ حابارلادى.
ەل دامۋى جونىندە ماسەلە كوتەرە وتىرىپ, مەملەكەت باسشىسى قازاقستاننىڭ جاقىندا سانكت-پەتەربۋرگتە وتكەن «ۇلكەن جيىرمالىق» سامميتىنە قاتىسۋىنىڭ ماڭىزىن اتاپ ءوتتى. «پىكىرتالاسقا قاتىسا وتىرىپ, قازاقستان ءىس جۇزىندە ەكونوميكاسى دامىعان ەلدەر كلۋبىنا كىردى. ەندى ول جەردەگى ورنىمىزدى ءىس جۇزىندە نىعايتۋ ءۇشىن جۇمىس جاساۋىمىز قاجەت», – دەدى ول.
مەملەكەت باسشىسى دامۋدىڭ وزگە دە ماڭىزدى باعىتتارىنىڭ اراسىندا ەكونوميكانىڭ جوعارى تەحنولوگيالىق جانە يننوۆاتسيالىق سەكتورلارىنىڭ باسىمدىلىعىن العا تارتتى.
--------------------------------------------------------------------------------------
قازاقستان پرەزيدەنتى نۇرسۇلتان نازارباەۆ تازا ەنەرگەتيكا جونىندە اگەنتتىك قۇرۋعا تاپسىرما بەردى, دەپ حابارلايدى قازتاگ.
«بۇل سالادا (جاڭعىرمالى ەنەرگيا) كەشەندى ينستيتۋتتىق ءتاسىل قولدانۋ قاجەت. بىرىنشىدەن, تازا ەنەرگەتيكا جونىندە اگەنتتىك قۇرۋ. ەكىنشىدەن, بالامالى ەنەرگيا جونىندەگى جوبالارعا دەمەۋشىلىك ەتەتىن قور ۇيىمداستىرۋ. ۇشىنشىدەن, ەنەرگوسەرۆيستىك كومپانيالاردىڭ قۇرىلۋىن قامتاماسىز ەتۋ. تورتىنشىدەن, شارۋاشىلىق جۇرگىزۋشى سۋبەكتىلەرگە ەنەرگيا ۇنەمدەگەنى ءۇشىن ىنتالاندىرۋدى قاراستىرۋ», – دەدى نۇرسۇلتان نازارباەۆ «ەۋرازيا ءححى عاسىردا: جاڭارۋ ارقىلى كوشباسشىلىققا» اتتى دامۋشى نارىقتاردىڭ ەۋرازيالىق فورۋمىندا.
دايىنداعان
ايدار ورىسباەۆ,
«ەگەمەن قازاقستان».
