كەشە استانادا ۇلتتىق سپورت ءتۇرىمىزدىڭ ءبىرى – كوكپاردان تۇڭعىش رەت اشىق ازيا چەمپيوناتىنىڭ جالاۋى جەلبىرەدى.
كەشە استانادا ۇلتتىق سپورت ءتۇرىمىزدىڭ ءبىرى – كوكپاردان تۇڭعىش رەت اشىق ازيا چەمپيوناتىنىڭ جالاۋى جەلبىرەدى.
بۇل باسەكەگە ءبىزدىڭ ەلدەن باسقا قىرعىزستان, وزبەكستان, موڭعوليا, تۇركيا, تاجىكستان, رەسەي مەن قىتاي ەلدەرىنىڭ ۇلتتىق قۇرامالارى قاتىسۋدا.
ازيا چەمپيوناتى ۇلتتىق سپورت تۇرلەرى قاۋىمداستىعىنىڭ ۇيىمداستىرۋىمەن استانانىڭ ماڭىنداعى «قازانات» اتشابارىندا وتۋدە. چەمپيونات ءتورت كۇنگە سوزىلىپ, 15 قىركۇيەك كۇنىنە دەيىن وتەدى. وسى كۇنى فينالدىق سىندا ەكى مىقتى كوماندا ءوزارا ازيا چەمپيونىن انىقتايدى. قازىر بۇل مارتەبەلى اتاقتى قاي ەلدىڭ كومانداسىنىڭ جەڭىپ الاتىنىن ايتۋ قيىن. دەگەنمەن, باسقا قۇرامالارعا قاراعاندا, قازاقستان مەن قىرعىزستاننىڭ ازيا چەمپيونى اتانۋعا مۇمكىندىگى كوپ دەلىنۋدە. ونى وزگە ەلدەردىڭ قۇرامالارى دا جاسىرمايدى. ال قازاقستان مەن قىرعىزستان كوكپارشىلارى قازىردىڭ وزىندە فينالدىق سىندا كەزدەسۋگە الاقاندارىن ىسقىلاپ دايىندالىپ جاتقان سياقتى. وعان دالەل رەتىندە كەشە چەمپيوناتتىڭ العاشقى كۇنى ۇلتتىق قۇرامامىزدىڭ تاجىكستان كومانداسىن 9:3, قىرعىزستان كوكپارشىلارىنىڭ وزبەكستان قۇراماسىن 11:1 ەسەبىمەن جەڭگەنىن ايتۋعا بولادى. وسى كۇنى رەسەي مەن قىتاي ەلدەرىنىڭ وكىلدەرى دە قارسىلاستارىن ايقىن باسىمدىقپەن ۇتتى. رەسەي موڭعوليانى 13:0, قىتاي تۇركيانى 8:0 ەسەبىمەن جەڭدى.
ال بۇگىن قازاقستان مەن رەسەي كەزدەسسە, تاجىكستان مەن موڭعوليا, قىرعىزستان مەن تۇركيا, وزبەكستان مەن قىتاي كوماندالارى كۇش سىناسادى. ايتا كەتەتىن ءبىر نارسە, ازيا چەمپيوناتىنا شەتەلدىڭ قۇراماسى ساپىندا قاتىسىپ جاتقانداردىڭ ءبارى – ءوزىمىزدىڭ قاراكوز باۋىرلارىمىز. مىسالى, رەسەيدىڭ ۇلتتىق قۇراماسى التاي رەسپۋبليكاسىنان جاساقتالسا, موڭعوليا كومانداسىندا قانداستارىمىز كوپ تۇراتىن بايان-ولگي ايماعىنداعى باۋىرلارىمىز ونەر كورسەتۋدە. ال قىتاي قۇراماسىندا شىڭجاڭ-ۇيعىر اۆتونوميالىق اۋدانىنىڭ قازاقتارى ويناپ جاتىر. تەك وندا كوماندانىڭ جەتەكشىسى عانا قىتاي ازاماتى.
كەشە چەمپيوناتتىڭ اشىلۋ سالتاناتىندا سپورت جانە دەنە شىنىقتىرۋ ىستەرى اگەنتتىگىنىڭ توراعاسى ەرلان قوجاعاپانوۆ, «نۇر وتان» حدپ توراعاسىنىڭ ءبىرىنشى ورىنباسارى باۋىرجان بايبەك, ۇلتتىق سپورت تۇرلەرى قاۋىمداستىعىنىڭ توراعاسى قايرات ساتىبالدى, ونىڭ ورىنباسارى بەكبولات تىلەۋحان, «سامۇرىق-قازىنا» ۇاق» اق باسقارۋشى ديرەكتورى دارحان كالەتاەۆ ازيا چەمپيوناتىنىڭ ءمانى مەن ماڭىزىن ايتا كەلىپ, ونىڭ ءجۇلدە قورىنا 20 ملن. تەڭگەنىڭ ءبولىنگەنىن, سونىڭ ىشىندە ءبىرىنشى ورىنعا 10 ملن. تەڭگە, ەكىنشى ورىنعا 6 ملن. تەڭگە, ال ءۇشىنشى ورىنعا 4 ملن. تەڭگەنىڭ بەرىلەتىنىن جەتكىزدى.
ازيا چەمپيوناتى كۇن سايىن 15 قىركۇيەككە دەيىن ساعات 10.00-دەن 14.00-گە دەيىن وتەتىن بولادى. وعان جارىستىڭ شارتى بويىنشا ءار توپتان 10 ادام قاتىسادى. قازىر 20 مينۋتتىق ەكى تايمنان تۇراتىن ويىنعا ءار توپتان ءتورت ويىنشى كۇش سىناسۋدا. تارتىس ەكى شەتىنە بىردەي قازان قويىلعان, اۋدانى 200/80 بولاتىن الاڭدا وتۋدە. ويىنشىلاردىڭ مىندەتى – سەركەنى جەردەن الىپ, قارسىلاس توپتىڭ قازانىنا سالۋ.
داستان كەنجالين,
«ەگەمەن قازاقستان».
––––––––––––––––––––
سۋرەتتى تۇسىرگەن
ەرلان وماروۆ.
