جىل سايىن سۋ تاسقىنى قاۋپىن تۋدىراتىن سىلەتى, شاعالالى, قىلشاقتى, ەسىل, قالقۇتان مەن جاباي وزەندەرىندە بۇگىنگى جاعداي تۇراقتى. بيىلعى جىلدىڭ 12 ناۋرىزىندا سۋ تاسقىنىنا قارسى وبلىستىق شتاب قۇرىلىپ, دايىندىق جۇمىسى جۇرگىزىلگەن. بۇل جۇمىسقا 2410 ادام, 1058 تەحنيكا, 60 قايىق, 254 موتوپومپا تارتىلىپتى. باستى نازار استراحان, اتباسار, ارشالى, تسەلينوگراد اۋداندارىنا اۋدارىلعان ەكەن. مۇز جارۋ جۇمىسى قوپا كولى مەن ەسىل, نۇرا, قالقۇتان, جاباي, بوقسىق, تالقارا, سارقىراما وزەندەرىندە جۇرگىزىلىپتى. سۋ تاسقىنىنان زارداپ شەككەندەردى قابىلداۋ ءۇشىن 222 نىسان جانە 70 رەزەرۆتىك بەكەت دايىندالىپتى.
– بيىلعى جىلدىڭ 17 ناۋرىزىنا قاراعان ءتۇنى كوكشەتاۋ قالاسى ىشىنەن اعىپ وتەتىن قىلشاقتى وزەنىندەگى سۋ دەڭگەيىنىڭ كۇرت كوتەرىلۋىنە بايلانىستى اۆتوكولىك كوپىرى ماڭىنداعى 183 تۇرعىن ءۇي مەن № 8 جانە №12 ورتا مەكتەپتەردى, سونداي-اق, 6 ساۋىردە ەسىل اۋدانى اۋماعىندا اعاتىن جانىسپاي وزەنىندەگى سۋ دەڭگەيىنىڭ كۇرت جوعارىلاۋىنان موسكوۆسكي اۋىلىنداعى تۇرعىن ۇيلەر مەن مال قورالارىن سۋ باسىپ قالا جازدادى. ساندىقتاۋ اۋدانىنىڭ جاباي وزەنىندەگى سۋ دەڭگەيى ارناسىنان اسىپ, بالكاشينو سەلوسىنداعى 2 ءۇيدىڭ اۋلاسىن سۋ الدى. وسى وزەندەگى سۋدىڭ كوتەرىلۋىنەن اتباسار قالاسىنىڭ تۇرعىن ۇيلەرىن سۋ باسۋ قاۋپى تۋىندادى. مۇنداي جاعداي اعىمداعى جىلدىڭ 14 ساۋىرىندە استراحان اۋدانىندا دا ورىن الدى. تەك جەرگىلىكتى اتقارۋشى ورگاندار مەن توتەنشە جاعداي سالاسى قىزمەتكەرلەرىنىڭ جەدەل ءىس-قيمىلىنىڭ ارقاسىندا عانا وبلىس اۋماعىنداعى تۇرعىن ۇيلەر سۋ باسۋدان امان قالدى,–دەگەن الەكسەي سوۆەتوۆ ءورت قاۋپى تۋىندايتىن كوكتەمگى جانە جازعى كەزەڭدە ورمان, دالا ورتتەرىنىڭ الدىن الۋ شارالارى جونىندە دە ايتىپ بەردى. ءوڭىر ورماندارىندا ازىرگە ءبىر ورمان ءورتى مەن دالاداعى قۋراعان ءشوپتىڭ جانۋىنىڭ 6 وقيعاسى تىركەلگەن.
– دالا ءورتىن ءسوندىرۋ اكىمدىكتەردىڭ موينىنا جۇكتەلدى. 6 ساۋىردە ءورت قاۋپى بار ماۋسىم باستالدى. ءساۋىر ايىنىڭ ەكىنشى ونكۇندىگىندە توتەنشە جاعداي جونىندەگى وبلىستىق كوميسسيانىڭ وتىرىسىن وتكىزۋ جوسپارلانعان. 24 اقپاندا وبلىس اكىمىنىڭ باستاماسىمەن ورمان مەن دالا ءورتىن ەسكەرتۋ جانە ءسوندىرۋ جونىندە وبلىستىق جۇمىس توبى قۇرىلعان بولاتىن. راس, ەلىمىزدەگى كارانتينگە بايلانىستى وقۋ-جاتتىعۋ وتكىزىلمەدى. دەگەنمەن, ءورت وقيعاسى تۋىنداي قالعان كەزدە توتەنشە جاعداي دەپارتامەنتى قۇرىلىمدارى مەن اسكەري ءبولىم, تۇرعىندارمەن بىرلەسە قيمىلداۋ نۇسقاۋى بەكىتىلدى. 25 ورمان ءورتى ستانتسياسى, 42 ءورت قاداعالاۋ مۇناراسى, 1382 راديوستانتسيا, 59 ءورت سوندىرەتىن اۆتوكولىك, 130 ارنايى تراكتور, 793 سۋ شاشقىش, 71 ءورت موتوپومپاسى ءتارىزدى وزگە دە قاجەتتى قۇرالدار دايىندالدى. وبلىستا ورتكە قارسى 1141 مۇشەسى بار 208 ەرىكتى قۇرىلىم جۇمىس ىستەيدى. ولار 53 ءورت تەحنيكاسىمەن جانە 70 موتوپومپامەن جابدىقتالعان. بۇگىنگى كۇنى 28 بەكەت قۇرىلدى. ورمان شارۋاشىلىقتارىنداعى ءورت قاداعالاۋ مۇنارالارى مەن بەكەتتەرىندە تاۋلىك بويى كەزەكشىلىك ۇيىمداستىرىلعان. ورمان القاپتارى سونداي-اق, اقمولا, بۋراباي جانە كوكشەتاۋ اۆياتوپتارىنىڭ كۇشىمەن باقىلانادى,–دەدى الەكسەي سوۆەتوۆ ءوز سوزىندە.
