بۇگىن اتىراۋ قالاسىندا وزگە مەكتەپتەردەن ارتىقشىلىعى باسىم جاڭا ءبىلىم ورداسى –«نازارباەۆ زياتكەرلىك مەكتەبىنىڭ» اشىلۋ سالتاناتى ءوتتى. «نازارباەۆ زياتكەرلىك مەكتەپتەرى» دەربەس ءبىلىم بەرۋ ۇيىمىنىڭ باسقارما ءتورايىمى كۇلاش شامشيدەنوۆانىڭ مالىمدەۋىنشە, بۇل ەلىمىزدەگى ون بەسىنشى بولۋىمەن ەرەكشەلەنەدى. ءبىر اتاپ وتەرلىگى, اتىراۋداعى ەرەكشە مەكتەپتە اقش, ۇلىبريتانيا, رۋمىنيا, يرلانديا ەلدەرى مەن وڭتۇستىك افريكا رەسپۋبليكاسىنىڭ جوعارى ساناتتى مۇعالىمدەرى دە ءبىلىم بەرۋگە شاقىرىلعان. ال ءوز ەلىمىزدەن وسى مەكتەپتە ءدارىس بەرۋ ءۇشىن 74 ۇزدىك مۇعالىم تاڭدالعان.
مەكتەپتىڭ العاشقى قوڭىراۋى سوعىلۋىنا ارنالعان سالتاناتتا وقۋشىلارعا وبلىس اكىمىنىڭ ءبىرىنشى ورىنباسارى عۇمار دۇيسەمباەۆ تا ساتتىلىك تىلەدى. كونكۋرستىق ىرىكتەۋدەن جوعارى بالل جيناعان 30 وقۋشىعا ۇزدىك توسبەلگى تاپسىرىلدى. نازارباەۆ زياتكەرلىك مەكتەبىنىڭ ديرەكتورى تابيليا اكيموۆانىڭ ايتۋىنشا, 7, 8, 9 جانە 11 سىنىپتارعا 697 وقۋشى قابىلدانىپتى. سونىمەن بىرگە, 120 وقۋشىعا ارنالعان جاتاقحانا دا پايدالانۋعا بەرىلدى. مەكتەپتىڭ سىنىپتارى وسى زامانعى وزىق تەحنولوگيالارمەن تولىق قامتىلعان. سونىڭ ىشىندە 650 نوۋتبۋك پەن ينتەراكتيۆتى تاقتالار بار. بۇل حيميا-بيولوگيا باعىتىنداعى مەكتەپ بولعاندىقتان, نانوتەحنولوگيا جانە بيوتەحنولوگيا كابينەتتەرى دە اشىلىپ وتىر. روبوت تەحنيكاسى كابينەتى دە وقۋشىلاردىڭ قىزىعۋشىلىعىن تۋدىرادى, دەيدى مەكتەپ ديرەكتورى تابيليا اكيموۆا.
جولداسبەك شوپەعۇل,
اتىراۋ وبلىسى.
