«بۇگىندە ەلىمىزدە كوروناۆيرۋس جۇقتىرعانداردىڭ 79 پايىزىنىڭ اۋرۋى سيمپتومسىز نەمەسە جەڭىل وتۋدە. 18 پايىز ناۋقاستىڭ جاعدايى ورتاشا بولسا, 21 ادامنىڭ ءحالى اۋىر, ال 2 ادام اسا اۋىر كۇيدە جاتىر. سونداي-اق ولاردىڭ ىشىندە ءبىر جاسقا تولماعان ەكى بالا بار. ولار كلينيكالىق حاتتاماعا سايكەس قانداي پرەپاراتتاردى قانداي مولشەردە بەرۋ كەرەكتىگى بەكىتىلگەن تارتىپكە ساي ەم الۋدا. بىرەۋىنىڭ جاعدايى قاناعاتتانارلىق, ۆيرۋس انىقتالعانىمەن اۋرۋدىڭ بەلگىسى بايقالمايدى. ەكىنشى بالا اۋىر حالدە. بىراق ول بالا ءتۋابىتتى پاتولوگياسىنا بايلانىستى اۋىر جاعدايدا جاتىر. جالپى ىندەتكە دۋشار بولعانداردىڭ بارلىعىنىڭ جاعدايى باقىلاۋعا الىنعان. ۆيرۋس وشاقتارىمەن بايلانىستا بولعان 31 512 ادام انىقتالدى. ونىڭ ىشىندە 30 850 ادام (98 پايىزى) وقشاۋلانعان. ەلدە اۋرۋدى جۇقتىرۋ دەڭگەيى 15 پايىزدىق مولشەردە. الايدا كەيبىر وڭىرلەردە بۇل كورسەتكىش 20-دان 60 پايىزعا دەيىن جەتىپ وتىر. بۇل وڭىرلەردە ەنگىزىلگەن كارانتين ءتارتىبىن قاتاڭ ساقتاۋدى تالاپ ەتەدى», دەدى ا.ەسماعامبەتوۆا.
باس سانيتار 14 ساۋىردە كارانتيندىك شارالاردى كۇشەيتۋ تۋرالى شەشىم قابىلداعانىن جەتكىزدى. قاۋلىنى تانىستىرعان ول: «بارلىق اۋرۋحانالار كۇشەيتىلگەن ەپيدەمياعا قارسى رەجىمگە كوشەدى, وندا ءار پاتسيەنت كوروناۆيرۋسقا كۇماندى رەتىندە قابىلدانادى. ناۋقاستاردى قابىلداۋعا جانە دياگنوز قويۋعا قاتىساتىن اۋرۋحانالار مەن ەمحانالاردىڭ بارلىق مەديتسينالىق قىزمەتكەرلەرى جەكە قورعانىش قۇرالدارىن پايدالانۋى كەرەك», دەدى.
قاۋلى بويىنشا كارانتيندىك جانە پروۆيزورلىق اۋرۋحانالاردا تالاپ كۇشەيتىلەدى. «ستاتسيونارلاردا بەينەباقىلاۋ كامەرالارى ورناتىلىپ, ءتيىستى جەلدەتۋ
جۇيەسى جولعا قويىلۋى ءتيىس. مەديتسينالىق ۇيىمداردىڭ ءار اۋىسىمى ءبىر-بىرىنەن وقشاۋلانا ءجۇرۋى كەرەك. سونداي-اق دەزينفەكتسيا رەجىمى قاتاڭ ساقتالىپ, بارلىق قىزمەتكەرلەردىڭ دەنساۋلىعى كۇندەلىكتى تەكسەرىلەدى. وسىعان بايلانىستى بارلىق باس دارىگەرلەر قىزمەتكەرلەردى جەكە قورعانىش قۇرالدارىمەن قامتاماسىز ەتۋگە مىندەتتى, بۇعان ولار جاۋاپ بەرەدى», دەدى ا.ەسماعامبەتوۆا.
ەلىمىزدىڭ 13 وڭىرىندە 423 مەديتسينا قىزمەتكەرى COVID-19 ۆيرۋسىن جۇقتىرعان. باس سانيتاردىڭ حابارلاۋىنشا, ولاردىڭ جارتىسىنان كوبى الماتىدا انىقتالعان. «مەديتسينا قىزمەتكەرلەرى اراسىندا 423 كوروناۆيرۋستىق ينفەكتسيا جاعدايى تىركەلدى. بۇل 13 وڭىردە تىركەلدى. جوعارى كورسەتكىش الماتىدا – 53 پايىز. ال نۇر-سۇلتاندا – 33 پايىز, شىمكەنتتە 24 پايىز», دەدى ا.ەسماعامبەتوۆا.
سونداي-اق كوروناۆيرۋسپەن كۇرەسكە تارتىلعان دارىگەرلەردىڭ جەتكىلىكتى ەكەنىن جەتكىزگەن ول: «مەديتسينالىق ۇيىمداردا دارىگەرلەردىڭ جەتىسپەۋشىلىگىن بولدىرماۋ ماقساتىندا ءار وڭىردە 10 پايىزدان باستاپ 20 پايىزعا دەيىن رەزەرۆ قاراستىرىلعان. سوندىقتان بۇگىندە مەديتسينا قىزمەتكەرلەرى جەتكىلىكتى», دەدى.
كوروناۆيرۋستىڭ الدىن الۋدىڭ بىردەن-ءبىر جولى كارانتين ەكەنىن باسا قايتالاعان ەلىمىزدىڭ باس سانيتارلىق دارىگەرى ونىڭ ۇزاققا سوزىلۋ, سوزىلماۋى دا حالىققا بايلانىستى ەكەنىن اتاپ ءوتتى. «ينفەكتسيانىڭ تارالۋ ورىسىنە تالداۋ جۇرگىزە وتىرىپ, كوروناۆيرۋس جۇقتىرعان ءبىر ادامنىڭ 80 ادامعا دەيىن جۇقتىرۋى مۇمكىن ەكەنىن ءبىلىپ وتىرمىز. كارانتين كەزىندە دە كورشىلەر ءبىر-بىرىمەن اڭگىمە-دۇكەن قۇرۋدى دوعارار ەمەس. وسىلايشا ءبىر-بىرىنە ۆيرۋس جۇقتىرادى. مۇنداي جاعدايلار كەزدەستى. ورتاشا ەسەپپەن بىزدە كوروناۆيرۋس جۇقتىرعان 1 اداممەن 30 ادام بايلانىستا بولادى ەكەن. ناۋقاستاردىڭ 70 پايىزىنىڭ اۋرۋ بەلگىسى بايقالمايدى. دەمەك ساپ-ساۋ كورىنگەن ادامنىڭ ءوزى ينفەكتسيا تاراتۋى مۇمكىن. پرەزيدەنت جانىنداعى توتەنشە جاعداي رەجىمىن قامتاماسىز ەتۋ بويىنشا مەملەكەتتىك كوميسسيا توتەنشە جاعدايدى 30 ساۋىرگە دەيىن ۇزارتتى. ال كارانتيننىڭ ءارى قاراي سوزىلۋى دا وزىمىزگە بايلانىستى بولماق. ياعني كارانتين شارالارىن قاتاڭ ساقتاپ, وقشاۋلانساق ماسەلەنىڭ شەشىلۋى دە تەزدەيدى», دەدى ول.
