قوعامدا, سونداي-اق مەملەكەتتىك باسقارۋ جۇيەسىندە جاڭا وزگەرتۋلەر جۇرگىزۋگە باعىتتالعان ءارى ەكونوميكانىڭ ساپالى قۇرىلىمىن قالىپتاستىرۋعا مۇمكىندىك بەرەتىن «بەس ينستيتۋتسيونالدىق رەفورمانى ىسكە اسىرۋ جونىندەگى 100 ناقتى قادام» ۇلت جوسپارى قازاقستاندا كاسىپكەرلىكتى دامىتۋدىڭ كەزەكتى ءداۋىرى. وسىنىڭ ناتيجەسىندە, قازاقستاندىق بيزنەس قوعامدىق قۇرىلىمدى العا جىلجىتۋشى قۋات كۇشىنە يە بولىپ كەلەدى. بۇگىنگى تاجىريبە حالىقتىڭ الەۋمەتتىك جاعدايى جاقسارسا, بيزنەستىڭ بولاشاعى دا كوركەيەتىنىن دالەلدەپ وتىر. بۇل قوزعالىستىڭ استارىندا الەۋمەتتىك جاۋاپكەرشىلىك پايىمى جاتقانى دا انىق. بۇل تۇسىنىك اقمولالىق بيزنەس وكىلدەرىن حالىققا جاقىنداتا تۇسكەنى عانيبەت. وسىنداي يگى ىستەردى ەسىل اۋدانىنان دا كوپتەپ كورۋگە بولادى.
اتالعان باعىتتىڭ باستى تىرەگى – بيزنەستىڭ الەۋمەتتىك جاۋاپكەرشىلىگى نەگىزىندەگى مەموراندۋمداردى قابىلداۋ. بىلتىر اۋداندا 96 ميلليون تەڭگەدەن استام قارجىنى قامتيتىن 67 كەلىسىم جاسالعان. ءسويتىپ, قول قويىلعان مىندەتتەمە تولىق كولەمىندە ورىندالدى. وسى رەتتە, «زارەچنىي» جاۋاپكەرشىلىگى شەكتەۋلى سەرىكتەستىگى 66 ميلليون تەڭگەنىڭ, «كومپانيا وريون پليۋس» جشس 13 ميلليون, «اگروفيرما قاراكول» جشس 4 ميلليون تەڭگەدەن استام قارجى بولگەنىن اتاپ كورسەتكىمىز كەلەدى. بۇعان قوسا, «نوۆو-پريرەچنوە» جشس, «قىمبات» شارۋا قوجالىعى جانە «اگرو-ولديۆي» جشس كوپ بالالى وتباسىلاردىڭ تۇرعىن ۇيلەرىن جوندەۋگە قوماقتى قارجى اۋداردى. جالپى, مەموراندۋم جوبالارى نەگىزىنەن مەكتەپتەردى ىستىق تاماقپەن قامتاماسىز ەتۋ, ەلدى مەكەندەردى اباتتاندىرۋ مەن سانيتارلىق تازالىعىن ساقتاۋ, مەرەكەلىك جانە مادەني-كوپشىلىك شارالارىن ۇيىمداستىرۋ, سۋ جانە جىلۋ جۇيەلەرىن, جولداردى جوندەۋ, الەۋمەتتىك تۇرعىدا از قامتىلعان تۇرعىندارعا قايىرىمدىلىق كومەك كورسەتۋ شارالارىنا باعىتتالعان.
سونداي-اق اتقارۋشى ورگاندار, جۇمىس بەرۋشىلەر جانە كاسىپوداق ۇيىمدارى اراسىندا, بۇگىنگى ۋاقىت تالابىنداعى وزەكتى ماسەلەلەر بويىنشا, ءوزارا ىنتىماقتاستىق كەلىسىمشارتتارى بۇلجىتپاي ورىندالۋدا. ماسەلەن, جەرگىلىكتى وندىرىستىك جۇيەنى تۇراقتاندىرۋ, ازاماتتاردىڭ ەڭبەك قاتىناستارى قۇقىقتارى مەن جۇمىسپەن قامتىلۋىن قامتاماسىز ەتەتىن مەموراندۋمعا 3178 ادامدى قامتيتىن 135 ەڭبەك ۇجىمى قول قويىپ وتىر.
تاعى ءبىر ماڭىزدى قادام رەتىندە, «زارەچنىي» جشس ەكونوميكانىڭ ءداستۇرلى سالالارىندا جاڭا تەحنولوگيالاردىڭ ەنگىزىلۋىنە وراي, ادامداردىڭ جۇمىستان بوساپ قالۋىن بولدىرماۋ ماقساتىندا, 2018-2025 جىلدارعا ارنالعان جول كارتاسىن قابىلداعانىن ايتۋىمىز كەرەك. جاۋاپكەرشىلىگى شەكتەۋلى سەرىكتەستىك بۇل ءۇشىن ءىرى قارا مال سانىن ارتتىرۋ, باسقا دا ت ۇلىك سانىن كوبەيتۋ, وزىق تەحنولوگياعا نەگىزدەلگەن استىق پەن جارما وڭدەۋدى مولايتۋ ءىسىن جالعاستىرۋدا. ءوندىرىستى قۋاتتاندىرۋعا باعىتتالعان مۇنداي شارالار جۇمىسسىزدىق ماسەلەسىن تەجەيتىنى انىق.
اقمولا وبلىسى,
ەسىل اۋدانى
