وڭىردە سونىمەن قاتار «كوكشە جەرىنىڭ ۇلى تۇلعالارى», «قازىنالى قازبا – ۇلت قۇندىلىعى» جوبالارى قولعا الىنعان. وبلىستىق مادەنيەت, ارحيۆتەر مەن قۇجاتتامالار باسقارماسى مەن وبلىستىق «كوكشە» تەلەارناسىنىڭ بىرلەسكەن «بابالار تاريحى – ۇرپاقتىڭ ۇلاعاتىندا» اتتى جوباسى اياسىندا 8 بەينە فيلم ازىرلەنگەن. قازىر ولار الەۋمەتتىك جەلىلەردە ونلاين-رەجيمدە كورسەتىلۋدە. جىل سايىن ايماقتا ارحەولوگيالىق قازبا جۇمىستارى جۇرگىزىلەدى. بىلتىر عالىمدار 5 اۋداندا زەرتتەۋ, زەردەلەۋ جۇمىستارىن جۇرگىزگەن. تابىلعان جادىگەرلەر وبلىستىق تاريحي-ولكەتانۋ مۋزەيىنىڭ قورىنا تاپسىرىلعان. قازىر مۇندا 1500-دەن استام جادىگەر ساقتاۋلى.
–ورتالىق تاراپىنان قازىرگى تاڭدا وبلىستىق تۋريزم باسقارماسىمەن بىرلەسە وتىرىپ, 7 باعىت بويىنشا تۋريستىك فيرمالارمەن كەلىسسوزدەر جۇرگىزىپ جاتىرمىز. بۇدان بولەك ەلىمىزدە جاريالانعان توتەنشە جاعدايلارعا بايلانىستى ورتالىق ونلاين تۇردە شارالاردى قولعا الۋدا. وبلىس بويىنشا 12 ميلليون 970 مىڭ 342 تەڭگەگە ەسكەرتكىشتەرگە اعىمداعى جوندەۋ جۇمىستارىن جۇرگىزۋ جوسپارلانعان,–دەيدى وبلىستىق تاريحي-مادەني مۇرانى قورعاۋ جانە پايدالانۋ ورتالىعى ديرەكتورىنىڭ مىندەتىن اتقارۋشى سەرىك ىسقاقوۆ.
بۇگىنگى تاڭدا تاريحي-مادەني ەسكەركىشتەر 5 ساناتقا بولىنەدى. بۇدان بولەك كيەلى جەرلەر مەن مونۋمەنتالدى ونەر قۇرىلىستارى دا وسى تىزىمگە قوسىلدى. وڭىردەگى 1032 مادەني-تاريحي مۇرانىڭ 977-ءى ارحەولوگيالىق ەسكەرتكىش ساناتىنا جاتادى. 34-ءى مونۋمەنتتىك ونەر تۋىندىسى جانە 21-ءى قالا قۇرىلىسى جانە ساۋلەت نىسانى. ال 46-سى كيەلى جەرلەر.
قاسيەتتى كوكشەنىڭ قويناۋىنداعى قۇندىلىقتار از ەمەس-اۋ.
كوكشەتاۋ قالاسى.
