كوكتەمدەي كوركەم بايقاۋ

ءساۋىردىڭ 16-18-ءى كۇندەرى ەلوردادا وتەتىن جاس ورىنداۋشىلاردىڭ رەسپۋبليكالىق ءحىح “جاس قانات” بايقاۋىندا ون بەس ۇمىتكەر باق سىنايدى دەپ كۇتىلۋدە. ۇيىمداستىرۋشىلارى مادەنيەت مينيسترلىگى, استانا قالاسى اكىمدىگى, “حابار” اگەنتتىگى مەن “ازيا دا­ۋى­سى” ديرەكتسياسى بولىپ تابىلاتىن ەلىمىزدەگى بىردەن-ءبىر ەسترادالىق جاس انشىلەر سايىسىنىڭ ەرەكشەلىگى – بايقاۋعا قاتىسۋشىلار سانىنىڭ جىلداعىعا قاراعاندا وسە ءتۇسۋى دە­سەك, قانشاما ونەرلى جاستىڭ ۇلكەن ساحناداعى تۇساۋىن كەسىپ, جۇرتشى­لىققا تانىتۋداعى تولايىم ەڭبەگى ءوز الدىنا ءبىر مەكتەپ دەۋگە لايىق. ال ونىڭ ماقسات-مۇددەسى نە دەگەن ماسەلەنى تاعى دا ءبىر قىسقاشا تۇجى­رىمدايتىن بولساق, بويىنداعى ءان­شى­لىك ونەردىڭ كوزىن تولىق اشا ال­ماي جۇرگەن ەلىمىزدىڭ تۇكپىر-تۇك­پى­رىندەگى جاس انشىلەردىڭ ۇلكەن ساح­ناعا شىعۋىنا قولداۋ ماقساتىنداعى مەملەكەتتىك جوبا. وعان دالەل, مىسالى, بيىل رەس­پۋب­ليكانىڭ ءتۇرلى وڭىرلەرىنەن 60-تان استام ءوتىنىش كەلىپ تۇسكەن. ءبى­راق, “باق شابا ما, باپ شابا ما” دە­مەكشى, ولاردىڭ ءوزى سوڭعى مارەگە جەت­كەنشە تالاي ىرىكتەۋ مەن سۇ­رىپ­تاۋدان ءوتىپ, تەك جۇيرىكتەرى عانا “جاس قانات” بايقاۋىنا جولداما الىپ جاتادى. بيىلعى ۇمىتكەرلەردىڭ سانى وتكەن جىلدارعا قاراعاندا كو­بىرەك. ايتسە دە باستى ماسەلە وندا ەمەس, قازاق ەستراداسى كەلەشەكتە تاعى دا قانداي جاڭا ەسىمدەرمەن تولىعا تۇسەر ەكەن دەگەن كوپشىلىكتىڭ ۇمىتىندە. “جاس قاناتتىڭ” كوكجيەگى جىلدان-جىلعا كەڭەيىپ, ەلىمىزدىڭ بارلىق ايماقتارىن قامتۋعا بارىن­شا تالپىنىپ جاتقانى تاعى شىن­دىق. ماسەلەن, سوناۋ ءبىر جىلدارى رەسپۋبليكانىڭ وڭتۇستىك وڭىرلەرى­نەن جاستار كوبىرەك قاتىسسا, سوڭعى كەزدەرى ساحنانى باتىس ءوڭىردىڭ ءتۇ­لەكتەرى تۇرلەنتىپ جىبەرگەن. ال بي­ىلعى جولدامانىڭ كوبى پاۆلودار­دىڭ پايداسىنا شەشىلگەن سىڭايلى. ويتكەنى, “جاس قانات” سايىسىنا بۇل ايماقتان ءتورت بىردەي قىران سايلا­نىپ كەلىپتى. ونىڭ بىرەۋى – ەسترا­دالىق توپ. قالعان ونەرپازدار – كوكشەتاۋدان, قوستانايدان, اقتو­بە­دەن, تالدىقورعاننان, ورالدان, الماتى مەن استانادان, ون جەتى مەن جيىرما التى جاسقا دەيىنگى ارالىق­تاعى ورەندەر. 1992 جىلدان بەرى ەس­ترادا ساحناسىندا 300-دەن استام ءۇمىتتى جاعىپ, ونەردىڭ ۇستاحاناسىنا ۇلعايعان بايقاۋدىڭ بيىلعى باق­شاسى دا ونەر جەمىسىنە تولىپ, شىن جۇيرىكتىڭ مەرەيى ۇستەم بولادى دەگەن سەنىمدى سەرىك ەتكىمىز كەلەدى. “ەگەمەن-اقپارات”.