ءار جىلدارى كوكتەمگى ەگىس سالۋ ناۋقانىنىڭ وزىنە ءتان ەرەكشەلىگى بولاتىنى بەلگىلى. ال بيىلعى ءبىر توسىن ءجايت ونىڭ Covid-19 دەرتىنىڭ تارالۋىمەن تۇسپا-تۇس كەلىپ وتىرعانى دەۋگە بولادى. مۇنداي جاعدايدا ۇتىمدى دا ءتيىمدى جانە قاۋىپسىز دە وڭتايلى تاكتيكالىق شەشىمدەر الىنباسا, ء«ار كۇنى –جىلعا ازىق» بولاتىن جاۋاپتى ناۋقاننىڭ وڭ ناتيجە بەرە قويۋى ەكىتالاي بولماق.
بيىلعى جىلعى ناۋرىز ايىنىڭ باسىندا رەسپۋبليكامىزدىڭ اۋىلشارۋاشىلىعى جانە ەنەرگەتيكا مينيسترلىكتەرى تاراپىنان ايماقتاعى استىق جانە باسقا دا مايلى داقىلدار وسىرۋشىلەرگە 9000 توننا ديزەلدىك وتىن بولىنگەن ەكەن. اقتوبە وبلىستىق اۋىلشارۋاشىلىعى باسقارماسىنىڭ باسشىسى قۇسايىن سارسەمبايدىڭ ايتۋىنشا بۇل قوماقتى وتىن كولەمىن ءۇش كەزەڭگە ءبولىپ تاراتۋ كوزدەلگەن. ياعني سونىڭ ناۋرىز ايىنا تيەسىلى 2500 توننالىق العاشقى كەزەگى شارۋالارعا تاراتىلىپ بەرىلگەن. قازىرگى كۇنى ءساۋىر ايىنىڭ ۇلەسىنە تيەسىلى ديزەلدىك وتىن مولشەرىن جەتكىزۋ جولدارى دا قامداستىرىلعان.
قازىرگى كۇردەلى كەزەڭدە وبلىستىڭ تۇپكىر-تۇپكىرىندەگى ەگىستىك القاپتارعا جانار ماي جانە تۇقىم مەن تىڭايتقىشتى ءوز ۋاقىتىندا كەشىكتەرمەي جەتكىزۋدىڭ جاۋاپكەرشىلىگى جوعارى. وسى ورايدا بۇل مىندەتتەردى اتقارۋعا 2565 اۆتوكولىك ءبولىنىپ, ونىڭ ءبارىن «سەرگەك» ەلەكتروندىق بازاسىنا ەنگىزىلگەن. ايتسە دە كوكتەمگى ەگىس سەكىلدى اۋقىمى كەڭ ناۋقاننىڭ قاجەتتىلىگى ءبىر ءوڭىردىڭ اۋماعىمەن شەكتەلىپ قالا المايتىنى ايان. مۇنداي شاقتا رەسەيدەن جانە رەسپۋبليكامىزدىڭ وزگە وبلىستارىنان وڭىردەگى كوكتەمگى ەگىس قامىنا قاجەتتى قۇرالدار جەتكىزۋ ءىسى تۋىندايتىنى تالاسسىز. كورشى مەملەكەتتى ايپاعاندا ەلىمىزدىڭ ءوز وڭىرلەرىندەگى «سەرگەك-ونلاين» بازاسى ءار ءتۇرلى بولعاندىقتان, ياعني بۇل ەلەكتروندىق جۇيە وبلىس اۋماعىنا وزگە جاقتان كەلەتىندەرگە جۇرمەسە نە ىستەگەن ءجون؟ بۇل ساۋال وبلىستىق اۋىل شارۋاشىلىعى باسقارماسىنىڭ باسشىسى ق.ءى.سارسەنبايعا قويىلدى.
راس, بۇل ءوز ءيىرىمى مەن كۇرمەۋى بار ماسەلە. ايتسە دە ونى شەشۋدىڭ بارلىق جولدارى قاراستىرىلىپ ءوز شەشىمىن تاۋىپ كەلەدى. ونىڭ باستى ءبىر ءتاسىلى رەسەيدەن جانە ەلىمىزدىڭ ءوز وڭىرلەرىنەن تۇقىم جانە وزگە دە قوسالقى بولشەكتەر جەتكىزەتىن تۇلعالاردىڭ رۇقساتنامالارىن الدىن-الا ازىرلەپ, بلوك-بەكەتتەردەن كەدەرگىسىز ءوتۋى ءۇشىن ءتيىستى تۇتقالار قاراستىلىرعان دەدى ول بۇل تۇرعىدا.
تاعى ءبىر اتاپ وتەرلىك ماسەلە استىق وسىرۋشىلەردىڭ تالاپ-تىلەكتەرىنە ساي سوڭعى كۇندەرى وبلىس ورتالىعىنداعى اۋىل شارۋاشىلىعى تەحنيكالارىنا ارنالعان بولشەكتەر ساتاتىن بازار اشىلىپ, جۇمىس جاساي باستادى. مۇندا رەسپۋبليكامىزدا جاريالانعان توتەنشە جاعدايلار مەن وڭىردە قابىلدانعان كارانتين رەجيمىنە سايكەس بارلىق سانيتارلىق نورمالاردى قاتاڭ ساقتاۋ شارالارى الىنعان. بۇدان بولەك وڭىردە ەگىس سالۋعا قاجەتتى قۇرال-سايماندار ساتاتىن ساۋدا نۇكتەلەرىنىڭ ورتاق ۆوتساپ جەلىسى قۇرىلىپ, قاجەتتى بولشەكتەرگە وسى جەردەن تاپسىرىستار بەرىلۋدە.
بيىل مەملەكەت تاراپىنان كوكتەمگى ەگىس سالاتىن اۋىل شارۋاشىلىعى وندىرىسشىلەرىنە اجەپتاۋىر جەڭىلدىكتەر بەلگىلەنگەنى ايتىلىپ تا, جازىلىپ تا ءجۇر. بۇل قولداۋ مەن قامقورلىقتى اقتوبەلىك استىق وسىرۋشىلەر دە جاقسى سەزىنىپ, ريزاشىلىقتارىن بىلدىرۋدە. مۇنىڭ سىرتىندا وبلىستا «اگرارلىق نەسيە كورپوراتسياسى» مەن «اۋىل شارۋاشىلىعىن قارجىلاي قولداۋ قورى» فيليالدارى ارقىلى نەسيە رەسىمدەۋگە نيەت بىلدىرگەندەر دە بار. راس, قازىرگى كەزدە بۇل قۇرىلىمدار جۇمىستارىن شتاتتىق رەجيمدە جۇرگىزۋدە. سونىڭ اسەرىنەن كەيبىر كەدەرگىلەر دە تۋىنداۋى زاڭدى قۇبىلىس.
دەگەنمەن جاڭا فورماتتا جۇمىس ىستەۋگە بەيىمدەلە بىلگەن فيلال جەتەكشىلەرى بۇل ماسەلەنى وڭتايلى شەشۋدىڭ جولدارىن قاراستىرا بىلگەندەرى قولداۋعا تۇرارلىق ءىس. وسى ارقىلى نەسيە الۋ ءتارتىبى دە توقتاماعانى ءبىر مارتەبە. ايتالىق «اۋىل شارۋاشىلىعىن قارجىلاي قولداۋ قورى» اقتوبە فيليالىنىڭ ديرەكتورى گۇلجانات ەرعازينانىڭ مالىمدەۋىنشە «ەڭبەك» مەملەكەتتىك باعدارلاماسى اياسىندا 11 شارۋاشىلىقتان 61 ميلليون تەنگەنىڭ جوباسى ءتۇسىپتى. قازىرگى كۇنى ونىڭ 10- ى قور فيليالى تاراپىنان قارجىلاندىرىلعان. قالعان بىرەۋى قارالۋ ساتىسىندا كورىنەدى. قارجىلاندىرىلعان جوبالاردىڭ دەنى حرومتاۋ, قارعالى, ايتەكە بي, العا, مارتوك جانە قوبدا سەكىلدى وبلىستىڭ استىقتى اۋداندارىنان ءتۇستى دەيدى ول.
ادەتتە كوكتەمگى ەگىس پەن دالا جۇمىستارى اۋقىمى مەن ماعىناسى وتە كەڭ ۇعىم. ونى تەك ءبىر عانا بيداي مەن ارپا ءجان تارى مەن س ۇلى سەكىلدى ءداندى-داقىلدار تۇرلەرىمەن شەكتەي سالۋعا بولمايدى. ياعني بۇگىنگى تاڭدا ايماقتا اگروونەركاسىپتىك كەشەن سالاسىن ودان ءارى دامىتۋعا سايكەس «ەگىنجاي» باعدارلاماسى بويىنشا جان-جاقتى ازىرلىك جۇمىستارى قولعا الىنعان. بۇل رەتتە وبلىستا مايلى جانە مال ازىعى داقىلدارى, كارتوپ پەن كوكونىس جانە وزگە دە باۋ-باقشا ونىمدەرى كولەمى جىلدان-جىلعا ءوسىپ كەلە جاتقانىن ايتۋ پارىز. ونى ازىرلەۋ مەن وتىرعىزۋ ءىسى داەندى داقىلدار ەگىستىگىن ەگۋمەن ءبىر مەزگىلدە اتقارىلماق.
Covid-19 –دىڭ تارالۋى مەن ونىڭ شىرقاۋ شەگى مەن شىڭىنا جەتپەگەن جاعدايدا رەسپۋبليكا ۇكىمەتى وڭىرلەردەگى كوكتەمگى ەگىس جۇمىستارىنىڭ بىرىڭعاي الگوريتمىن بەكىتكەنى ءمادىم. ايتسە دە ءار ايماق وكىلدەرى ەگىس سالۋدى قاشان باستايتىنى جونىندەگى مەرزىمدى ۋاقىتتىڭ ىڭعايىمەن اۋا-رايىنىڭ جىلىنۋ كەزەڭىنە قاراي وزدەرى بەلگىلەۋىنە رۇقسات بەرىلگەن. بۇل باعىتتا اقتوبە وبلىسىنا كوكتەمگى ەگىستىڭ جاپپاي باستالاتىن ۋاقىتى ءساۋىردىڭ جيىرماسىنشى جۇلدىزىنان كەيىنگى كۇندەرگە بەلگىلەنىپ وتىر.
اقتوبە وبلىسى
