كەشە استانادا قازاقستان سپورت ءباسپاسوزى قاۋىمداستىعىنىڭ كەزەكتى وتىرىسى بولدى.
كەشە استانادا قازاقستان سپورت ءباسپاسوزى قاۋىمداستىعىنىڭ كەزەكتى وتىرىسى بولدى.
وتىرىستا بىرنەشە ماسەلە قارالدى. اۋەلى قاۋىمداستىق پرەزيدەنتى, رەسپۋبليكالىق مەملەكەتتىك ءتىلدى «Sport» جانە ورىس ءتىلدى «سپورت» گازەتتەرىنىڭ ديرەكتور-باس رەداكتورى, بەلگىلى جۋرناليست-جازۋشى نەسىپ ءجۇنىسباي ۇلى قاۋىمداستىقتىڭ ماقسات-مىندەتىن ايتا كەلىپ, وسى كەزگە دەيىن اتقارعان جۇمىسى جونىندە ەسەپ بەردى. ول قاۋىمداستىقتىڭ قىزمەتىنە ءوز باعاسىن بەرە كەلىپ, قازىرگى جۇمىسىنا تىڭ يدەيالار مەن جاڭا جوبا-جوسپارلاردىڭ كەرەكتىگىنە نازار اۋداردى. وسىدان كەيىن ول قسبق پرەزيدەنتى قىزمەتىنەن ءوز ەركىمەن بوسانۋ جونىندە شەشىم قابىلداعانىن جانە جينالعان ءارىپتەس ىنىلەرىنەن وسى شەشىمىن قولداۋعا ءوتىنىشىن ءبىلدىردى. جيىندا ارىپتەستەرى ونىڭ بۇل شەشىمىن قولدايتىندارىن ايتىپ, ونى قاۋىمداستىقتىڭ قۇرمەتتى پرەزيدەنتى بولىپ سايلايتىندارىن جەتكىزدى. جيىندا قازاقستان سپورت ءباسپاسوزى قاۋىمداستىعىنىڭ پرەزيدەنتى بولىپ ءارىپتەسىمىز ءىلياس وماروۆ سايلاندى. ول ءبىرنەشە جىلدان بەرى سىرتقى ىستەر مينيسترلىگىنىڭ ءباسپاسوز حاتشىسى قىزمەتىن اتقارادى. بىرنەشە شەت ءتىلىن بىلەدى, سپورت تاقىرىبىنا دا بىرنەشە جىلدان بەرى قالام تارتىپ جۇرگەن ارىپتەسىمىز.
جيىندا قارالعان تاعى ءبىر ماسەلە قاۋىمداستىقتىڭ اتقارۋشى كوميتەتى مۇشەلەرىن سايلاۋعا ارنالدى. وعان 16 ادامنىڭ ءتىزىمى ۇسىنىلدى. بىراق, ءۇمىتكەرلەردىڭ كوپتىگىنە بايلانىستى اتقارۋشى كوميتەتتىڭ ءمۇشەلىگىنە ەشكىم سايلانباي, مۇشەلىككە سايلاۋ ماسەلەسى كەيىنگە قالدىرىلدى. بۇل ماسەلە ءجونىندەگى ويىن سپورت جانە دەنە شىنىقتىرۋ ىستەرى اگەنتتىگى ءتوراعاسىنىڭ ورىنباسارى ەلسيار قاناعاتوۆ جاقسى ايتتى. ول سپورت جۋرناليستەرىنە ەلەكتروندى پوشتالارىنا ۇمىتكەرلەردىڭ ءتىزىمىن ءجىبەرىپ, اتقارۋشى كوميتەتتىڭ مۇشەلەرىن داۋىسقا سالۋ بويىنشا سايلاۋدى ۇسىندى. ونىڭ بۇل ۇسىنىسى بىردەن قولداۋ تاپتى. وسىدان كەيىن وتىرىستا «الاش ايناسى» گازەتى سپورت ءبولىمىنىڭ مەڭگەرۋشىسى نۇرعازى ساساەۆ قاۋىمداستىقتىڭ جۇمىسىندا مەملەكەتتىك ءتىلدىڭ قولدانۋ اياسىن كەڭەيتۋ ماسەلەسىنە نازار اۋداردى.
وتىرىستا قاۋىمداستىقتىڭ كەڭسەسىن اشۋ, وعان قىزمەتكەرلەر الۋ, جۋرناليستەردىڭ شەتەلگە ءىس ساپارىنا دەمەۋشى ىزدەۋ ءماسەلەسى قارالدى. «KAZSport» تەلەارناسىنىڭ ديرەكتورى دياس احمەتشارىپ پەن «ەكسپرەسس-ك» گازەتىنىڭ سپورت جۋرناليسى ماكسيم كارتاشوۆ «سامۇرىق-قازىنا» ۇاق اق-عا قاۋىمداستىققا دەمەۋشى بولۋعا ءوتىنىش ءبىلدىردى. وسىعان وراي «سامۇرىق-قازىنا» ۇاق اق قوعاممەن بايلانىس دەپارتامەنتىنىڭ باستىعى ايدار ماحمەتوۆ ءوتىنىشتىڭ ورىندالۋ مۇمكىندىگى بار ەكەنىن جەتكىزدى.
داستان كەنجالين,
«ەگەمەن قازاقستان».
