وبلىستىق بالىق شارۋاشىلىعى باسقارماسىنىڭ باسشىسى ارتۋر سادىبەك ۇلىنىڭ ءمالىم ەتۋىنشە, كوكتەمگى ماۋسىمدا كاسپيدىڭ قازاقستاندىق سەكتورىنداعى سولتۇستىك اكۆاتورياسىنان 25 مامىرعا, ال, جايىق وزەنىنەن 15 مامىرعا دەيىن بالىق اۋلاۋعا رۇقسات بەرىلگەن.
–بۇل بيىلعى 7 مىڭ توننا بالىق ءليميتىن تولىق يگەرۋگە مۇمكىندىك بەرەدى. قازىر بالىق اۋلاۋ ماۋسىمىنا اتىراۋ قالاسى مەن قۇرمانعازى اۋدانىندا تىركەلگەن 16 وندىرىستىك كووپەراتيۆ پەن 2 بەكىرە ءوسىرۋ زاۋىتى قاتىسۋدا. بۇلاردا ەڭبەك ەتەتىن 3 مىڭنان استام ادام بالىق اۋلاۋمەن جانە وڭدەۋمەن اينالىسادى. ولار قازىردىڭ وزىندە 1 مىڭ توننادان استام بالىق اۋلادى -دەيدى ارتۋر سادىبەك ۇلى.
ونىڭ ايتۋىنشا, وندىرىستىك كووپەراتيۆتەر اۋلانعان بالىقتىڭ ءبىر بولىگىن اتىراۋ قالاسىنداعى ساۋدا نۇكتەلەرىنە جەتكىزىپ جاتىر. ال, قالعان بولىگى ءار ءتۇرلى ونىمدەر دايىنداۋ ءۇشىن وڭدەۋگە جىبەرىلۋدە. اتىراۋ قالاسى مەن قۇرمانعازى اۋدانىندا وسى كەزگە دەيىن 570 توننا بالىق قولجەتىمدى باعامەن ساتىلعان.
ال, اتىراۋ وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكتسياسىنىڭ رەسمي وكىلى ولەگ تۋشكانوۆتىڭ پىكىرىنشە, بالىق اۋلاۋ ماۋسىمىندا وندىرىستىك كووپەراتيۆتەردىڭ بالىقشىلارى بەكىرە ءوسىرۋ زاۋىتتارىنىڭ مەملەكەتتىك تاپسىرىستى ورىنداۋىنا كومەگىن كورسەتۋدە. ماسەلەن, 9 ساۋىرگە دەيىن كووپەراتيۆتەردىڭ بالىقشىلارى اتالعان زاۋىتتار ءۇشىن 27 بەكىرە تۇقىمداس باعالى بالىقتار ءتۇرىن اۋلاپ بەردى. بۇل بالىقتاردىڭ ۋىلدىرىعى جاساندى جولمەن الىنىپ, زاۋىتتاردا شاباق وسىرىلەدى.
جولداسبەك كوشەرباي ۇلى
