سوڭعى مالىمەت بويىنشا باتىس قازاقستان وبلىسىندا كوروناۆيرۋس ىندەتىنە شالدىققانداردىڭ سانى 39-عا جەتتى. سوڭعى ءبىر تاۋلىك ىشىندە انىقتالعان 9 ادامنىڭ 8-ءى – رەسەي فەدەراتسياسىندا ۆاحتالىق ادىسپەن جۇمىس ىستەۋشىلەر ەكەن. ولار ساراتوۆ وبلىسى اۋماعىنان ەلىمىزگە «تاسقالا» شەكارا بەكەتىنەن وتكەن.
- ساراپتاپ قاراساق, وسى كەزگە دەيىن ىندەت جۇقتىرعانداردىڭ 32-ءسى – ۆاحتالىق جۇمىستان كەلگەن, ياعني ۆيرۋستىڭ 82%-ى سىرتتان اكەلىنگەن. قالعان 7 ادام سولارمەن جاقىن قارىم-قاتىناستا بولعاننان كەيىن اۋىرىپ قالعان. سوڭعى كۇندەرى شەكارادان جاياۋ وتكەن جەرلەستەرىمىزدىڭ ءبارىن وقشاۋلاپ جاتىرمىز. ويتكەنى ولاردىڭ بارىندە اۋرۋەش بەلگىسىز وتۋدە, دەنە قىزۋى دا جوق, تەك دياگنوستيكالىق زەرتتەۋدەن كەيىن عانا ولاردىڭ COVID-19 ينفەكتسياسىن جۇقتىرعانى انىقتالدى, دەدى باتىس قازاقستان وبلىستىق تاۋارلار مەن كورسەتىلەتىن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتى باسشىسى مۇحامعالي ارىسپاەۆ.
وسىعان وراي شەكارا بەكەتىنە جاقىن ورنالاسقان تاسقالا اۋدانىندا كارانتيندىك ستاتسيونار مەن پروۆيزورلىق گوسپيتال اشىلاتىن بولدى. وبلىستىڭ باس مەملەكەتتىك سانيتارىنىڭ ايتۋىنشا, ستاتسيوناردا ناۋقاس بەلگىسى جوق تۇرعىندار وقشاۋلانسا, گوسپيتالدا دەنە قىزۋى كوتەرىلگەندە جاتقىزىلادى. ولارعا سول جەردە پوليمەرلىك تىزبەكتى رەاكتسيا ارقىلى دياگنوستيكالىق زەرتتەۋ قورىتىندىسى جاسالىپ, ۆيرۋس ناقتىلانسا, وبلىستىق جۇقپالى اۋرۋلار اۋرۋحاناسىنا جاتقىزىلاتىن بولدى.
قازىرگى ساتتە باتىس قازاقستان وبلىستىق جۇقپالى اۋرۋلار اۋرۋحاناسىندا – 28 ادام, پروۆيزورلىق ستاتسيوناردا – 50, كارانتيندىك ستاتسيوناردا – 158, ءۇي وقشاۋلاۋىندا – 1396 ادام دارىگەر باقىلاۋىندا.
باتىس قازاقستان
