ويلاماعان جەردەن, ءتىپتى تۇتقيىلدان دەسە دە بولعانداي, جەر ءجۇزى ءۇشىنشى دۇنيەجۇزىلىك سوعىسقا تەلىپ جاتقان بۇل سۇراپىل ىندەت – «Covid-19» پاندەمياسى بۇگىندە, بۇكىل الەمنىڭ جۇزدەگەن ەلىن جايلادى. ءار عاسىردا ءارتۇرلى ىندەتتىڭ ءتۇرى كەزدەسكەن. بىراق ول زامانداردا ەل دامىماعان, بالكىم, تازالىقتىڭ جوقتىعىنان دەرمىز دە... بىراق بۇگىنگىدەي تاماقتىڭ توقتىعى مەن وركەنيەتتىڭ شارىقتاپ دامىپ كەتكەن كەزەڭىندە دە اتى جامان ىندەتتىڭ وسى ءبىر ءتۇرى ادامزات بالاسىنا اۋىز سالىپ وتىر.
ەلىمىز ەگەمەندىك الىپ, تاۋەلسىزدىككە قول جەتكىزىپ, مەملەكەت رەتىندە تۇعىرلى ورىننان كورىنىپ, الەمنىڭ ەڭ وزىق وركەنيەتكە قول جەتكىزگەن, دامىعان ەلدەرى قاتارىنان بوي كورسەتتى. ءبىزدىڭ مەملەكەتىمىزبەن بۇكىل باتىس, شىعىس ەلدەرى ساناساتىن دەڭگەيگە جەتتىك. مادەنيەتىمىز بەن ادەبيەتىمىز, ەكونوميكا مەن ەلدىڭ الەۋەتى ايتارلىقتاي العا وزدى. كۇن ساناپ قىزۋ دا قارقىندى شارۋالارىمىزدى جۇمىستاپ, جارقىن كۇي كەشىپ جاتتىق. ءبارى دە تاماشا! تەك, تەك...
تەك وسىنداي جايدارى شاقتا ەل باسىنا ناقتى ەمى تابىلا قويماعان بەلگىسىز ىندەتتەن قاتەر كەلەدى دەپ ءۇش ۇيىقتاساق تۇسىمىزگە دە كىرمەگەن ەدى... بىراق «ەتىكپەن سۋ كەشەر» ەرلەرىمىز بارى داتكە قۋات, كوڭىلگە مەدەۋ. ولار: ءبىزدىڭ پرەزيدەنتىمىز قاسىم-جومارت كەمەل ۇلى توقاەۆ پەن ونىڭ كوشىنە ەرگەن كوپتەگەن ەرلەر. سونداي-اق ءدال وسى شاقتا اتالى وي ايتىپ, بارشا قازاقستاندىقتارعا «بىرلەسە بىلگەن ەل ءبارىن جەڭەدى» اتتى ماقالاسىن جولداعان قازاقستان رەسپۋبليكاسىنىڭ تۇڭعىش پرەزيدەنتى – ەلباسى ن.ءا.نازارباەۆتىڭ حالىقتى سابىرلىققا, بايسالدىلىققا شاقىرىپ, بايبالامعا بوي الدىرماي, ىندەتتىڭ قاتەرىن بىرلەسە جەڭۋگە ۇندەۋى ەرلىككە پارا-پار, ناعىز كوشباسشىعا ءتان ءىس.
ەلىمىزدىڭ پرەزيدەنتى قاسىم-جومارت كەمەل ۇلى توقاەۆتى كۇن سايىن وتتىڭ ىشىندە جۇرگەن اسكەرباسى, قولباسى دەۋگە بولادى. ونىڭ اتى وشكىر ىندەتتەن كەلگەن ەكونوميكالىق, الەۋمەتتىك جاعدايلاردى تۇراقتاندىرۋ مەن ۇستاپ تۇرۋ تۇرعىسىنداعى كۇندەلىكتى ءار سالانىڭ باسى-قاسىنا بارىپ, كوزىمەن كورىپ, كوڭىلىمەن توقىپ, ءتيىستى جانە ءتيىمدى تاپسىرمالاردى بەرىپ, ونىڭ ۇستىنە, ءال-اۋقاتى, تۇرمىسى تومەن وتباسىلار مەن جۇمىسى ۋاقىتشا تۇرالاعان كاسىپكەرلەرگە ماتەريالدىق جانە قارجىلاي قولداۋ كورسەتۋ ماسەلەسىن جولعا قويۋى, قازىرگى جاعدايدا حالىققا جاسالعان ۇلكەن قامقورلىق.
ءبىز مادەنيەت سالاسىنىڭ قىزمەتكەرلەرى دە ءوز كەزەگىمىزدە ونلاين بولسا دا ەل تۇرعىندارىن سابىرعا شاقىرىپ, سونداي-اق الەۋمەتتىك جەلىلەر ارقىلى قويىلىمدارىمىزدى كورسەتىپ, ونلاين-سۇحباتتار جاساپ, قام-قارەكەتىمىزدى جاساۋدامىز.
بىرلەسە بىلسەك, ەلىم دەگەن ەرلەرىمىزدىڭ ىسىنە قولداۋ تانىتىپ, تارتىپكە باعىنىپ, ءبىر الاقاننىڭ اياسىندا جۇمىلا, جىمداسا بىلسەك, المايتىن قامالىمىز بولمايدى, كەز كەلگەن ىندەتتى جويۋعا قاۋقارىمىز جەتەدى دەگەن ويدامىز.
گۇلجامال قازاقباەۆا,
قازاقستان رەسپۋبليكاسىنىڭ ەڭبەك سىڭىرگەن ءارتىسى, مەملەكەتتىك سىيلىقتىڭ لاۋرەاتى, «قۇرمەت», «پاراسات» وردەندەرىنىڭ يەگەرى
