ال بۇگىنگىنىڭ باتىرلارى اتانعان دارىگەرلەر مەن مەدبيكەلەر قاۋىپتى دەرتتىڭ بەل ورتاسىندا ءجۇر. وسى كەزەڭدە مەنى ەلىمىزدىڭ ىسكەر ازاماتتارى دەپ باعالايتىن داۋلەتتىلەردىڭ ءۇنسىز وتىرعانى ويلاندىرادى. ولاردى ميللياردەر اتاندىرىپ, بايلىققا كەنەلتكەن وسى ەلدىڭ قازىناسى, بارشا حالىقتىڭ نەسىبەسىنىڭ ءبىر بولىگى ەمەس پە؟ ەندەشە, بۇگىنگىدەي قاۋىپتى ىندەتپەن ەل بولىپ كۇرەسىپ جاتقاندا ولاردىڭ دا ەلدەگى ءىرىلى-ۇساقتى كاسىپ يەلەرىنە ۇلگى-ونەگە كورسەتەتىن ءساتى كەلگەن جوق پا؟ بۇل رەتتە جازۋشى عابيت مۇسىرەپوۆ ايتقانداي, «بىزگە قارنى تويسا, قالعىپ كەتپەيتىن ۇرپاق قاجەت» ەكەنىن باسا ايتقىم كەلەدى. باسقا مەملەكەتتەردىڭ بارىندە داۋلەتتى ادامدار ءوز ەلى ارقىلى حالقىنا قوماقتى كومەك كورسەتۋدە. ءبىزدىڭ ەلدە دە وسىنداي ءىرى قولداۋلار قولعا الىنسا قۇبا-قۇپ. وسى ورايدا تۇڭعىش پرەزيدەنت – ەلباسى نۇرسۇلتان نازارباەۆ «Egemen Qazaqstan» گازەتىندە جاريالاعان «بىرلەسە بىلگەن ەل ءبارىن جەڭەدى» اتتى ماقالاسىندا «كاسىپكەرلەرگە دە ارنايى ايتارىم بار: سىزدەر تاۋەلسىزدىكتىڭ ارقاسىندا ءوز ىستەرىڭىزدى قالىپتاستىرىپ, اياقتارىڭىزعا نىق تۇردىڭىزدار, مول داۋلەتكە كەنەلدىڭىزدەر. ەندى «مەن ەلىمە نە بەرەمىن؟» دەيتىن كەزدەرىڭىز كەلدى» دەدى ەمەس پە؟!
ەندەشە, بۇگىندە داۋلەتتىلەر جۇرەگىنىڭ ەلىم دەپ سوعار ءساتىن ءدال قازىرگى ۋاقىتتا كورسەتۋى ءتيىس. سەبەبى بۇگىندە حالىققا «Forbes» جۋرنالىنىڭ تىزىمىنە ەنگەندەرگە قاراعاندا, اۋرۋحاناداعى اق جەلەڭدى ابزال جاندار مارتەبەسىنىڭ الدەقايدا جوعارى ەكەنىن كورسەتۋدە. راسىمەن دە, قاۋىپتى ىندەتپەن كۇنى-ءتۇنى كۇرەسىپ, ناۋقاستاردىڭ ساۋىعىپ شىعۋى ءۇشىن ءوز وتباسىنا جەتە الماي جاتقان دارىگەرلەر قانشاما؟ ولار حالىقتىڭ ساۋلىعى ءۇشىن تاۋەكەلگە بەل بايلاپ, بۇعان دەيىن اتقارىپ كەلگەن قاربالاس تىرلىگى تىپتەن كۇشەيدى. ياعني, ينفەكتسيامەن كۇرەستىڭ نەگىزگى سالماعى اق حالاتتىلارعا تۇسۋدە. «سوڭعى ناۋقاس جازىلىپ شىققانشا ۇيگە قايتپايمىز!» دەگەن ولار گيپپوكرات انتىنا ادالدىق تانىتىپ, اياعىنان تىك تۇرىپ قىزمەت ەتۋدە. ويتكەنى ناۋقاستاردىڭ ساۋىعۋىندا بار ءۇمىت – دارىگەرلەردە. ولاي بولسا, وسىناۋ ساتتە مەديتسيناداعى دارىگەرلەر مەن باسقا دا قىزمەتكەرلەرگە بارشا حالىق دەمەۋ بولۋى قاجەت-اق. دەمەك, ءاربىر تۇرعىن ءوز ساۋلىعىنا بەيجاي قاراماي, ەلدە قولعا الىنعان تەمىردەي ءتارتىپتى ساقتاۋى قاجەت. ال مەملەكەت حالىقتىڭ الەۋمەتتىك جاعدايىنا نازار اۋدارىپ, ازىق-ت ۇلىكپەن, ءدارى-دارمەكپەن قامتۋ ىسىنە باسىمدىق بەرۋدە.
كاسىپكەرلەر مەن قوعامدىق ۇيىمدار, جەكەلەگەن قاراپايىم ازاماتتار دا قولدان كەلگەنشە كوپكە, ءبىر-بىرىنە دەمەۋ بولىپ جاتقانىن كۇندەلىكتى بۇقارالىق اقپارات قۇرالدارىنان كورىپ, ءبىلىپ جاتىرمىز. بۇل يگى ءىستىڭ ورتاسىنان جاستاردىڭ دا تابىلىپ, ەرىكتى تۇردە بەلسەندىلىك تانىتقانىنا سۇيسىنەمىز. وسى ورايدا ءىرى-ءىرى كاسىپكەر ازاماتتارىمىز قايدا دەگەن ويدا قالىپ جۇرگەنىمىز راس. نەگە ولار وسىناۋ شاقتا ەلىمەن بىرگە بولمايدى؟ نەگە حالىقتىڭ ورتاسىنان تابىلىپ, ەل ۇكىمەتى ارقىلى قازاقستاندىقتارعا قولداۋ كورسەتپەيدى؟ مىنە, ماعان وسىنداي سان ساۋال مازا بەرمەي قويدى.
ويتكەنى بۇگىنگىدەي الەمدى جايلاعان ىندەتتىڭ الدىن الۋ جانە ونىمەن كۇرەس كەزەڭىندە بارلىعىن بىردەي مەملەكەتىمىز شەشەدى دەپ الاڭسىز وتىرۋعا بولمايدى. وسى ورايدا ءوزىم باسقارىپ وتىرعان بيزنەس قۇرىلىمدارىنىڭ جەتەكشىلەرىمەن كەڭەسىپ, دەرتتىڭ الدىن الۋعا ءبىز دە جۇمىلدىق. كومەك ەسەبىندە 1 ملن تەڭگە كولەمىندە قارجى بولدىك. بۇل سان عاسىرلىق تاريحى بار, رۋحى مىقتى قازاق ەلى ءوزىنىڭ جىگەرلى ازاماتتارىمەن تالاي قيىندىقتى باسىنان وتكەرگەندە بەرەكە-بىرلىگىمىزدىڭ ارقاسىندا كەدەرگىلەردى جەڭىپ شىققانىن ۇمىتپاعاننان قولعا الىنعان يگى ءىس ەدى. اتىراۋلىق فەرمەرلەر بىرلەسكەن ىستە بەلسەندى بولۋعا ءالى دە اتسالىسا بەرەدى. ايتپاعىم, حالقىمىزعا سىن ساعاتتا قولداۋ بولۋدا مۇمكىندىگى مول قالتالى ازاماتتاردىڭ قاتارى ءالى دە ارتسا ەكەن دەيمىن.
مۇرات سارمانوۆ,
«قازاقستان فەرمەرلەر وداعى» قوعامدىق بىرلەستىگى اتىراۋ وبلىستىق فيليالىنىڭ توراعاسى
