«جامان تۇماۋ» اۋىلعا دا جەتتى
قاراعاندى وبلىسىندا كوروناۆيرۋس ينفەكتسياسىن جۇقتىرعان تاعى ءبىر ادام بەلگىلى بولدى. ناۋقاستىڭ جاسى 53-تە, ول وسى ىندەتپەن اۋىرعان ادامدارمەن بايلانىستا بولعان ەكەن. ءساۋىردىڭ 14-ءشى كۇنىندە وبلىستا اتالعان دەرتكە شالدىققانداردىڭ سانى 78 ادام بولدى. وكىنىشتىسى سول, «جامان تۇماۋ» اۋىلعا دا جەتتى. كەشەگى كوروناۆيرۋس جۇقتىرعانداردىڭ ىشىندە شەت اۋدانىنداعى توعىز جولدىڭ تورابىندا ورنالاسقان ءبىر كەنتتە تۇراتىن ەر ادام دا بار. ەندى, «كوروناۆيرۋس بىزگە كەلگەنشە قاي زامان» دەپ, بەيعام جۇرگەن اۋىلدىڭ اڭعال قازاعىنا قيىن بولعالى تۇر.
بۇگىن ەكپەگەن ەرتەڭ نەسىن ورادى؟
كوروناۆيرۋس تا كەتەر, جاقسى كۇندەر دە جەتەر. ال شىنى كەرەك, بۇگىن استىق ەكپەسەڭىز, كۇنى ەرتەڭ اش قالۋىڭىز ابدەن مۇمكىن. جالپى, توتەنشە جاعداي كوكتەمگى دالا جۇمىستارىنا كەدەرگى كەلتىرمەۋى كەرەك. مىنە, وسى ماسەلەلەردى جەدەل شەشىپ, ناۋقاندىق جۇمىستاردى رەتتەۋ ءۇشىن قاراعاندى وبلىسىندا وڭىرلىك شتاب قۇرىلدى. بۇل تۋرالى وسى شتابتى باسقاراتىن وبلىس اكىمىنىڭ ورىنباسارى سەرىك شايداروۆ حابارلادى.
بيىل وبلىستا استىق وتكەن جىلمەن سالىستىرعاندا 50 مىڭ گەكتارعا ارتىق ءوسىرىلىپ, ونىڭ جالپى كولەمى 1,2 ملن گەكتار القاپتى قۇرايتىن بولادى. مۇنىڭ ىشىندە ءداندى داقىلدار الاتىن ۇلەس – 900 مىڭ گەكتار.
قازىرگى ۋاقىتتا ەگىس القابىنا شىعاتىن 12 مىڭ تراكتور, 193 ەگىس كەشەنى, 6 مىڭنان استام تۇقىم سەپكىش تەحنيكانىڭ 98% دايىن ەكەن.
وبلىس اكىمىنىڭ ورىنباسارى فەرمەرلەرگە 19 مىڭ توننا ارزانداتىلعان جانار-جاعارماي جەتكىزىلەتىنىن ءمالىم ەتتى. اگرارلىق نەسيە كورپوراتسياسى تاراپىنان كوكتەمگى دالا جۇمىستارىنا جىلدىق 5%-بەن 2,5 ملرد تەڭگە ءبولىنىپ, بۇگىنگە دەيىن وسى سومانىڭ 2,2 ملرد تەڭگەسى يگەرىلىپتى.
كارانتين قىزمەتتى ارزانداتتى
قاراعاندى وبلىسىندا ءساۋىر ايىنىڭ باسىنان باستاپ كوممۋنالدىق قىزمەتتەردىڭ تاريفتەرى 5%-عا تومەندەتىلگەن. سۋمەن جابدىقتاۋ جانە سۋ بۇرۋ, ەلەكتر جانە جىلۋ بەرۋ قىزمەتتەرى ارزاندادى. ال ايىپپۇل مەن وسىماقىلار ۋاقىتشا جويىلعان. بۇل تۋرالى تابيعي مونوپوليالاردى رەتتەۋ جونىندەگى دەپارتامەنت باسشى ارمان وتەگەنوۆ حابارلادى. دەپارتامەنت باسشىسى ءتاريفتىڭ تۇرعىندار ءۇشىن عانا تومەندەتىلگەنىن ايتتى. ال زاڭدى تۇلعالار مەن بيۋدجەتتىك ۇيىمدار قىزمەتتەردى بۇرىنعىسىنشا تولەيتىن بولادى.
– ءوڭىر ازاماتتارى ءتاريفتى تومەندەتۋ ەسەبىنەن جالپى قۇنى 160 ملن تەڭگە قاراجاتتى ۇنەمدەي الادى دەگەن ۇمىتتەمىز. مىسالى, 65 شارشى مەتر بولاتىن ءبىر پاتەردە ۇنەمدەۋ ايىنا شامامەن 600 تەڭگەنى قۇرايتىن بولادى, – دەدى ارمان وتەگەنوۆ.
وسىنىڭ الدىندا شاحتينسك تۇرعىندارىنان ەلەكتر ەنەرگياسى ءۇشىن تولەمنىڭ تىم ارتىپ كەتكەنى تۋرالى شاعىم تۇسكەن بولاتىن. بۇل جاعدايعا تۇسىنىك بەرگەن دەپارتامەنت باسشىسى تولەماقىنىڭ ءوسۋىن كارانتين كەزىندە ادامداردىڭ كوپ ۋاقىتىن ۇيدە وتكىزىپ, ەلەكتر قۇرالدارىن ءجيى پايدالانۋىمەن بايلانىستىردى.
قاراعاندى وبلىسى
