ويتكەنى وبلىستىڭ وڭتۇستىك وڭىرىندەگى 7 اۋداننىڭ تۇرعىندارىنا ساپالى قىزمەت كورسەتەتىن وبلىستىق كوپسالالى اۋرۋحانا دا مەگاپوليستە ورنالاسقان بولاتىن. بىراق وبلىستىق دەنساۋلىق ساقتاۋ باسقارماسى جەدەل شەشىم قابىلداپ, قالا ماڭىنداعى اۋدان تۇرعىندارىنا مەديتسينالىق كومەك كورسەتۋدىڭ جاڭا باعىتىن ۇسىنىپتى.
– الماتى قالاسىنا كىرىپ-شىعۋ توقتاتىلعاننان باستاپ وبلىس تۇرعىندارىنا مەديتسينالىق كومەك كورسەتۋدىڭ جاڭا ەرەجەسىن جاسادىق. بۇل بويىنشا قالا ماڭىنداعى اۋدانداردىڭ تۇرعىندارى ەندى وبلىستاعى كەز كەلگەن ەمحانا, اۋرۋحانالارعا كەدەرگىسىز تىركەلىپ, قاجەت مامانعا بارىپ قارالا الادى. ءبىرىنشى كەزەكتە جۇكتى ايەلدەردى جەدەل, قايتا تىركەۋگە الامىز. ناۋقاس بولسا, اۋماقتاعى تاڭداعان اۋرۋحاناعا جاتقىزىپ, ەمىن جالعاستىرۋعا مۇمكىندىك جاسادىق. ال الماتىمەن شەكارالاس اۋدانداردان قالاعا قاتىناپ ەم قابىلدايتىن ناۋقاستار ءۇشىن ارنايى جەدەل جاردەم كولىگىن شىعاردىق. مىسالعا, اۋدانداردان كوپسالالى اۋرۋحاناعا وزدەرى بارىپ گەمودياليز جاساتاتىن ناۋقاستار بار. ولار سوزىلمالى بۇيرەك جەتىسپەۋشىلىگى دياگنوزى بويىنشا ەمدەلىپ جۇرگەندەر. قازىر بۇل ناۋقاستاردى اۋداندىق اۋرۋحانادان الماتىداعى كوپسالالى كلينيكالىق اۋرۋحاناعا جەدەل جاردەم كولىگىمەن تاسىمالداۋعا كوشتىك. بۇل ادامداردىڭ قاۋىپسىزدىگى ءۇشىن جاسالعان شارا ءارى ىندەتتىڭ تارالماۋىنا كەپىل بولادى, – دەيدى وبلىستىق دەنساۋلىق ساقتاۋ باسقارماسىنىڭ باسشىسى باۋىرجان ىسقاق.
سونداي-اق الماتى قالاسى ماڭىنداعى قاراساي, ىلە, تالعار اۋداندارىنىڭ اۋماعىنا قويىلعان بلوك-بەكەتتەر مەن سانيتارلىق تەكسەرۋ ورىندارىندا وبلىس دارىگەرلەرى تاۋلىك بويىنا كەزەكشىلىك ەتۋدە. ءار مەديتسينالىق تەكسەرۋ پۋنكتىندە ءبىر مەزەتتە ءۇش مەديتسينا قىزمەتكەرى جۇمىس ىستەيدى ەكەن. ولار تەپلوۆيزور, مەديتسينالىق ماسكا جانە ارنايى كوستيۋمدەرمەن تولىق قامتاماسىز ەتىلگەن. دەنساۋلىق ساقتاۋ باسقارماسى بلوك-بەكەتتەگى كەزەكشىلىك اتقاراتىن قۇقىق قورعاۋ ورگاندارىنىڭ قىزمەتكەرلەرى مەن اكىمشىلىك قىزمەتكەرلەرىن مەديتسينالىق ماسكامەن قامتۋدى دا ۇيىمداستىرىپ وتىر.
ماسكا دەمەكشى, وبلىس اۋماعىندا جۇقپالى ىندەتپەن كۇرەس شارالارى كۇشىنە ەندى. تالاپقا ساي ەندى ادامداردىڭ كوشەدە, جۇمىس ورىندارىندا مەديتسينالىق ماسكا تاعىپ ءجۇرۋى مىندەتتەلدى. بۇل ءتارتىپ قوعامدىق كولىك پەن جەكە كولىكتەگى جولاۋشىلارعا دا ورتاق. ال بۇل جاعدايدا بەتپەردەگە دەگەن سۇرانىس ارتاتىنى انىق. قازىردىڭ وزىندە وبلىس اۋماعىندا ماسكا تاپشىلىعى بايقالۋدا.
ارينە وبلىستاعى ءوندىرىس ورىندارى مەديتسينالىق ماسكا ءوندىرىپ جاتىر. بارلىق اۋدانداردا ەرىكتەلەردىڭ باستاماسىمەن بەتپەردە تىگۋ ءىسى قولعا الىنىپ, تۇرعىندارعا تەگىن تاراتىلۋدا. اكىمدىكتىڭ ىنتالاندىرۋىمەن جەكە ادامدار كوپ رەتتى تۇتىنۋعا بولاتىن ماسكا تىگىپ, ءتيىمدى باعامەن ساتۋدى جولعا قويعان. تەگىن تاراتىلاتىن ماسكا سانى دا ارتىپ كەلەدى. مۇنداي كومەك ءبىرىنشى كەزەكتە الەۋمەتتىك جاعىنان قورعالماعان وتباسى مۇشەلەرى مەن اتقارۋشى قىزمەتتە جۇرگەن ماماندارعا كورسەتىلىپ جاتىر. مىسالى, تەك ءبىر عانا قاراتال اۋدانىنىڭ وزىندە شاعىن بيزنەس وكىلدەرى, ءبىلىم مەكەمەلەرى مەن ەرىكتىلەر ءوز كۇشتەرىمەن تاۋلىگىنە 3 مىڭداي كوپ رەت پايدالاناتىن ماسكا تىكتى. بۇل جۇمىس ىلە اۋدانىندا دا جولعا قويىلعان, وندا ءبىر تاۋلىكتە 20 مىڭ ماسكا دايىندالۋدا. ال تالدىقورعاندا جەكەمەنشىك ءدارىحانانىڭ باسشىسى 5 مىڭ ماسكانى حالىققا تەگىن تاراتقان.
جاقىندا وبلىس باسشىسى اماندىق باتالوۆ ماسكا تىگۋگە شاعىن بيزنەس نىساندارىنا مەملەكەتتىك تاپسىرىس بەرۋ جاعىن ويلاستىرۋدى قاراستىرىپ, جەكە گيگيەنالىق قۇرالدارمەن تۇرعىنداردى جەتكىلىكتى مولشەردە قامتاماسىز ەتۋ ماسەلەسىن ودان ءارى شيراتۋدى تاپسىرعان بولاتىن. الماتى وبلىسىندا تاۋلىگىنە ازىرگە 136 مىڭ ماسكا شىعارىلۋدا.
مەديتسينالىق ماسكا ءوندىرىسىن جولعا قويعان كاسىپورىنىڭ ءبىرى ىلە اۋدانىنداعى Dolce farm كومپانياسى. سەرىكتەستىك تاۋلىگىنە 70 مىڭ دانا بەتپەردە دايىنداپ, شىعارۋدا. وڭىردەگى مەديتسينا مەكەمەلەرىن بەتپەردەمەن قامتىپ وتىرعان كاسىپورىن قايىرىمدىلىق جاساۋعا دا بەلسەنە كىرىستى. الماتى وبلىسىنىڭ اۋماعىندا جۇقپالى ىندەتپەن كۇرەس شارالارى كۇشەيگەلى بەرى Dolce farm ءبىر عانا تالعار اۋدانىنا 17 مىڭ دانا بەتپەردەنى تەگىن بەرىپتى.
– وبلىستا ماسكا تاپشىلىعىن بولدىرماۋ ءۇشىن قولدان كەلگەننىڭ بارلىعىن جاساپ جاتىرمىز. سونىڭ ىشىندە Dolce farm سەرىكتەستىگىنىڭ ءوندىرىسى توقتاۋسىز جۇمىس ىستەپ تۇر. تاۋلىگىنە 75 مىڭ داناعا دەيىن بەتپەردە شىعارۋعا قۋاتى جەتەدى. كۇنى كەشەگە دەيىن 159 مىڭ دانا مەديتسينالىق ماسكانى قابىلداپ الدىق, – دەيدى وبلىستىق كاسىپكەرلىك جانە يندۋستريالدى-يننوۆاتسيالىق دامۋ باسقارماسىنىڭ باسشىسى رۋسلان قوجاسباەۆ.
الماتى وبلىسى
