ءتورتىنشى وقۋ توقسانىندا جەتى وقۋ اپتاسى بولسا, سونىڭ بەس اپتاسىنىڭ جۇكتەمەسى اقتوبە وبلىسىنىڭ ۇستازدارىنا بەرىلگەن. وسى ۋاقىت ارالىعىندا ولار جالپى سانى 70 ساباق وتكىزبەك. وسى ورايدا وسى ءىستىڭ باسى-قاسىندا جۇرگەن ايماقتاعى ءبىلىم بەرۋ وكىلدەرىنە جولىعىپ, جاڭا فورماتتا جۇرگىزىلەتىن دارىستەردىڭ ەرەكشەلىگى مەن ارتىقشىلىعى, ياكي كەم-كەتىك تۇستارى جونىندە ايتىپ بەرۋىن وتىنگەن ەدىك.
اقتوبە وبلىستىق عىلىمي-تاجىريبەلىك ورتالىعىنىڭ مەكتەپكە دەيىنگى جانە جالپى ورتا ءبىلىم بەرۋ ءبولىمىنىڭ باسشىسى گۇلميرا نۋكەەۆا ءوڭىر پەداگوگتارىنا قاشىقتان وقىتۋ تەحنولوگياسىن تەرەڭ ءارى جان-جاقتى تۇردە ءتۇسىندىرۋ ءۇشىن الدىن-الا كەشەندى جۇمىستار مەن ءىس-شارالار جۇرگىزىلگەنىن اتاپ كورسەتتى. جوعارىدا ايتىلعانداي, وبلىستاعى ەڭ ۇزدىك 10 پەداگوگتىڭ ءبىرى م.قۇسايىنوۆ اتىنداعى وبلىستىق دارىندى بالالارعا ارنالعان مامانداندىرىلعان مەكتەپ-ينتەرناتىنىڭ مۇعالىمى گۇلناز مىڭجاساروۆا 11-سىنىپتا وقيتىن وقۋشىلارعا بەينەساباق جۇرگىزەدى. ونىڭ ۇزاقتىعى نەبارى 10 مينۋت قانا. وسى قىسقا ۋاقىتقا نەگىزگى ويدى سىيعىزۋ وڭاي بولماسا كەرەك.
– ارينە بۇل وتە قىسقا ۋاقىت. ونىڭ التى مينۋتى جاڭا ساباقتى تۇسىندىرۋگە جۇمسالادى. ال قالعان 4 مينۋتتا جاڭا ساباقتى مەڭگەرتۋ ماقساتىندا ءتيىستى تاپسىرمالار بەرەمىز. ءارى ونىڭ جاۋاپتارىن دا ورىندايمىز. ءبىز ءۇشىن ەڭ ماڭىزدىسى, بەينەساباقتىڭ مازمۇنىن تەرەڭدەتە ءتۇسۋ بولىپ وتىر. بۇل رەتتە سۋرەتتەر مەن كەستەلەردى جانە بەينەروليكتەردى پايدالانىپ ءجۇرمىن. وسى ارقىلى وقۋشىلاردىڭ قىزىعۋشىلىعى مەن ىنتا-ىقىلاستارىن كوتەرىپ, ساباقتى تەز ءارى جەڭىل قابىلداۋلارىنا بار كۇش-جىگەرىمىزدى جۇمساۋعا ۇمتىلىپ كەلەمىز, دەدى ول.
سونداي-اق اقتوبە قالاسىنداعى №51 مەكتەپ-گيمنازيانىڭ مۇعالىمى ساۋلە ەرنازاروۆانىڭ ايتۋىنشا, 10 مينۋتتىڭ ىشىندە تاقىرىپتى بارلىق بالالار مەڭگەرە الاتىنداي دەڭگەيدە ءتۇسىندىرۋ جان-جاقتى ىزدەنىستى جانە از سوزگە كوپ ماعىنا سىيعىزۋدى تالاپ ەتەدى. سوندىقتان ول وقۋشى نازارىن اۋدارۋعا سۋرەتتەردى پايدالانۋعا باسىمدىق بەرەدى ەكەن. تاقىرىپتى ودان ءارى اشا ءتۇسۋ ءۇشىن قوسىمشا تاپسىرمالار بەرىپ, بالالارمەن كەرى بايلانىستار جاساۋ دا وزىق وقىتۋشىنىڭ ءىس-تاجىريبەسىنە ەنگەن.
اقتوبە
