ينستيتۋتتىڭ ايرىقشا دامۋ كەزەڭى جاس مامان ورەكەڭنىڭ ەڭبەك جولىنىڭ باستالۋىمەن تۇسپا – تۇس كەلدى. مىنە, سودان بەرى ورەكەڭنىڭ وسى ءبىر عانا ينستيتۋت قابىرعاسىندا سۋارمالى ەگىنشىلىكتىڭ عىلىمي نەگىزىن قالىپتاستىرۋداعى ەڭبەگى اۋىلشارۋاشىلىق سالاسىن دامىتۋدا ەرەكشە ورىن الدى. اتاپ ايتساق, سۋارمالى ەگىستىكتىڭ باستى داقىلدارى – كۇزدىك بيدايدىڭ, قانت قىزىلشاسىنىڭ, جۇگەرىنىڭ, جوڭىشقانىڭ اۋىسپالى ەگىس جۇيەسىندەگى جوعارى ءونىم الۋ تەحنولوگياسى جاساقتالدى. اۋىسپالى ەگىس جۇيەسى بويىنشا دا شارۋاشىلىق جاعدايىنا بايلانىستى بىرنەشە ەكونوميكالىق ءتيىمدى جوبالار ۇسىنىلدى. وسى تەحنولوگيالار تىزبەگى كەيىنگى زامان تالابىنا ساي ورگانيكالىق تازا ءونىم ءوندىرۋ باعىتىمەن سايكەستەندىرىلدى. ارام شوپتەرگە, زيانكەستەرگە, اۋرۋلارعا قارسى ۋلى زاتتاردى قولدانباي تابيعي تازا ءونىم ءوندىرۋ مۇمكىندىگى ۇزاق مەرزىمدى زەرتتەۋلەر ناتيجەسىندە انىقتالدى. وسى جاعدايدا «جاسىل تىڭايتقىشتاردى» راپس, قىشا, تۇيەجوڭىشقا, اسبۇرشاق ءتارىزدى وسىمدىكتەردىڭ جاسىل بالاۋساسىن توپىراققا ءسىڭىرۋ, سونىمەن قاتار كوپ جىلدىق جوڭىشقانى اۋىسپالى ەگىس جۇيەسىندە كەڭىنەن پايدالانۋ – ورگانيكالىق تازا ءونىم ءوندىرۋدىڭ نەگىزى جانە توپىراق قۇنارلىعىن ساقتاۋدىڭ كوزى ەكەنى انىقتالدى.
ورەكەڭ نەگىزىن قالاعان ۇزاق مەرزىمدى زەرتتەۋ الاڭى (عىلىمي ستاتسيونار) ينستيتۋتتىڭ بەتكە ۇستار, كورنەكتى, ەگىنشىلىك مادەنيەتى وتە جوعارى وبەكتىسىنىڭ ءبىرى بولدى. وسى جەردە كەزىندە وڭتۇستىك وڭىردە كەڭ تارالعان كۇزدىك بيدايدىڭ جاڭا «قارلىعاش» سورتىنان گەكتارىنان 115تس رەكوردتى ءونىم جينالدى. رەسپۋبليكا باسشىلارى, اۋىلشارۋاشىلىق قىزمەتكەرلەرى, شەتەلدىك دەلەگاتسيالار ءاردايىم وسى ورەكەڭنىڭ تاجىريبەلىك جۇمىستار اتقارىپ جۇرگەن الاڭىن باسقالارعا ۇلگى ەتتى.
ورەكەڭ ۇزاق جىلدار بويى ديسسەرتاتسيالىق كەڭەستىڭ حاتشىسى دا بولدى. جوعارى تالاپتىڭ ارقاسىندا جۇزدەگەن كانديداتتىق جانە دوكتورلىق جۇمىستار قورعالىپ, ءبارى بەكىتىلىپ, عىلىمي كادرلار دايارلاۋعا قوماقتى ۇلەسىن قوستى.
ارينە اۋىلشارۋاشىلىق سالاسىندا عىلىمي جوسپار قۇرۋ جانە ونى اتقارۋ تەك ءبىر عانا جەكە ادامنىڭ ءىسى ەمەس. ورەكەڭ وزىمەن قىزمەتتەس بولعان جانە قاتار وسكەن اتاقتى عالىمدارمەن ارقاشان تىعىز بايلانىستا بولدى. اتاپ ايتساق, م.ەرلەپەسوۆ, ە.امانتاەۆ, ءى.ابۋعاليەۆ, ۆ.جيگايلوۆ, ب.باسىبەكوۆ, م.رۋبەنشتەين, ە.زەنكوۆا, ر.ورازاليەۆ, ا.يورگانسكي, س.رامازانوۆا, ب.ساريەۆ, ا.پاك, ك.بالگابەكوۆ, م.سۇلەيمەنوۆا, ە.ريابينينا, د.سىدىك, ج.قوجاباەۆ, گ.مەيىرمان, تاعى باسقالارى ورەكەڭنىڭ عىلىمي ورتاسىن قۇرادى.
كەيىنگى ينستيتۋتتىڭ عالىمدار بۋىنى ا.اگەەنكو, ج.وسپانباەۆ, ش.باستاۋباەۆا, م.بەكباتىروۆ, ا.حيديروۆ ورەكەڭ قول جەتكىزگەن زەرتتەۋلەردىڭ ناتيجەلەرىن جاڭا دالدىك جانە ساندىق تەحنولوگيالار مەن تامشىلاپ سۋارۋ نەگىزىندە ودان ءارى جالعاستىرىپ, زاماناۋي ۇلگىدەگى ەگىنشىلىك جۇيەسىن قالىپتاستىرۋعا ات سالىسۋدا.
الماتى قالاسىنىڭ ىرگەسىندە ورنالاسقان عىلىمي قالاشىقتىڭ كورنەكتى اۋىل ازاماتى ورەكەڭ وزىنە دە, باسقاعا دا تالاپ قويا بىلگەن. ونىڭ نەگىزى ورەكەڭە ءتان شىنايىلىق جانە ەڭبەكقورلىق. وسىنداي كوپشىلىككە ۇلگى بولاتىن قاسيەتتەر وسى اۋلەتكە دە ءتان بولۋى كەرەك. ونىڭ تۋعان اعاسى – قازانتاەۆ قونىسبەك تە سىر ءوڭىرىنىڭ ارداقتىسى, ەلگە ەڭبەگى سىڭگەن پاراساتتى تۇلعا بولعان ادام.
ورەكەڭنىڭ بايبىشەسى بۇگىندە توقسان جاستى القىمداپ قالعان, جوعارى وقۋ ورنىندا ۇستازدىق قىزمەت اتقارعان, اۋىلىمىزدىڭ قادىرلىلەرىنىڭ ءبىرى. بالالارى گۇلميرا, قانىش, ءاليا جوعارى ءبىلىمدى, اكەنىڭ ەڭبەك جولىن جالعاستىرىپ جۇرگەن ازاماتتار.
مىنە, ورەكەڭنىڭ ومىردەن وتكەنىنە دە ءبىر جىل شاماسى بولىپ قالدى. ءوزارا اڭگىمەدە ورەكەڭنىڭ ەرەكشە مىنەزدەرىن, ارىپتەستەرىنە تالاپ قويا ءبىلۋىن, اتقارعان ەڭبەگىنىڭ قورتىندىسىن ءاردايىم ەسكە الىپ وتىرامىز. ۇجىمداعى ونىڭ ورنى تولماي تۇرعان سياقتانادى دا تۇرادى. اۋىلشارۋاشىلىعىنىڭ عىلىم دوكتورى, پروفەسسور ورىنبەك اعامىز وسىنداي ازامات بولعان. ينستيتۋت تاريحىندا ورەكەڭنىڭ ورنى ەرەكشە, ول تۋرالى ءالى دە بولسا جازىلارى حاق.
عاليوللا مەيىرمان,
اۋىل شارۋاشىلىعى عىلىمدارىنىڭ دوكتورى, پروفەسسور, ۇعا اكادەميگى
