ارينە, مۇنداعى ماقسات تۇرعىنداردى كوروناۆيرۋس ينفەكتسياسىنىڭ تارالىپ كەتۋىنەن ساقتاندىرۋ ءارى ونىڭ الدىن الۋ ەكەنى ايتپاسا دا تۇسىنىكتى. ايتسە دە ماسەلەنىڭ بۇلايشا قويىلۋى ەكىنشى ءبىر كەرەعار كورىنىستى تۋعىزىپ وتىر. ياعني, جوعارىدا كورسەتىلگەن ۋاقىتتا كوزدەگەن ايالداماسىنا جەتىپ قالۋعا اسىققان قالا تۇرعىندارىنىڭ قاتارى كوبەيىپ, ولاردىڭ قوعامدىق كولىككە توپتاسىپ, سىعىلىسىپ وتىرۋ كورىنىستەرى ورىن الا باستادى.
«قۋىرداقتىڭ كوكەسىن تۇيە سويعاندا كورەسىڭ» دەگەندەي, ىندەتتى ادامداردىڭ ءبىر-بىرىنە جۇقتىرۋى ءدال وسىنداي اراقاشىقتىق ساقتالماعان جاعدايدا ورىن الماسىنا كىم كەپىل؟ اقتوبە قالاسىنداعى «اۆتوپارك» جشس كاسىپورنى وكىلدەرى وسىعان بايلانىستى وبلىس باسشىسى وڭداسىن ورازالينگە اۆتوبۋستاردىڭ ءجۇرۋ كەستەسىن تاڭەرتەڭگى, تۇسكى جانە كەشكى ۋاقىتتارعا بولمەي-اق, كۇنى بويى جۇرگىزۋ جونىندە ۇسىنىس ءتۇسىردى. ولاردىڭ ويىنشا بۇل كەزدە جوعارىدا ايتىلعانداي كورىنىستەر تىيىلىپ, اۆتوبۋستار قوزعالىسى قالىپتى ارناسىنا تۇسپەك.
ءبىر ەسەپپەن بۇل ۇسىنىس-پىكىردى قولداي قويۋدىڭ دا ءجونى جوق سەكىلدى. ويتكەنى, جۇرگىنشىلەر قوعامدىق كولىكتىڭ ىشىندە ءبارىبىر ءبىر-بىرىنە ءتۇيىسىپ, تاقاسىپ قالىپ جۇرمەي مە؟ مۇنداي جايت توتەنشە جاعداي مەن كارانتين تارتىبىنە مۇلدەم قايشى ەكەندىگى تاعى دا بەلگىلى. كىم بىلەدى, مۇمكىن كارانتين ۋاقىتى اياقتالعانشا اقتوبە قالاسىندا قوعامدىق كولىكتەردىڭ جۇرۋىنە مۇلدەم تىيىم سالۋ قاجەت شىعار. قالاي دەگەندە دە, ءساۋىردىڭ 15 جۇلدىزى كۇنى بۇل ماسەلەنىڭ شەشىمى الىنباي قالدى. تەك «اۆتوپارك» جشس وكىلدەرى تاراپىنان ايتىلعان ۇسىنىس-تىلەكتەر وڭىرلىك شتابتىڭ وتىرىسىندا قارالاتىندىعى جونىندە ۇيعارىم جاسالدى.
