بلوك-بەكەت قىزمەتكەرلەرى اۆتوتەحنيكا, پروجەكتورلار, جەكە قورعانىس قۇرالدارى سياقتى بارلىق قاجەتتى زاتتارمەن جابدىقتالعان. بۇلارعا ايرىقشا جاۋاپكەرشىلىك جۇكتەلگەن, ويتكەنى بۇل جول رەسەيدىڭ قورعان قالاسىنان كەلەتىن كولىكتەردى باقىلايدى. سانيتارلىق نورمالارعا سايكەس دارىگەرلەر ءوتىپ جاتقان جۇرگىزۋشىلەردىڭ تەمپەراتۋراسىن ولشەيدى, پوليتسيا قىزمەتكەرلەرى قۇجاتتاردى تەكسەرەدى, جول قاۋىپسىزدىگى مەن قوعامدىق ءتارتىپتى قامتاماسىز ەتەدى.
مامليۋت اۋدانى پوليتسيا ءبولىمىنىڭ باستىعى, پوليتسيا پودپولكوۆنيگى مارات ءالجانوۆتىڭ ايتۋىنا قاراعاندا مامليۋت اۋدانىنا دا كارانتين ەنگىزىلگەن. كۇن سايىن پوليتسيا قىزمەتكەرلەرى ورتالىق اۋداندىق اۋرۋحانانىڭ دارىگەرلەرىمەن بىرگە بىرقاتار شارالاردى جۇرگىزەدى. ءبىزدىڭ ورتاق ماقساتىمىز – كوروناۆيرۋستىق ينفەكتسيانىڭ تارالۋىنا جول بەرمەۋ. مامليۋتكا قالاسىنا سەبەپسىز كىرۋگە جانە شىعۋعا تىيىم سالىنعان. سونداي-اق, پوليتسيا قىزمەتكەرلەرى ءۇي جاعدايىندا كارانتيندە وتىرعان تۇرعىنداردى كۇن سايىنعى باقىلاۋعا العان. كوشەلەردى باقىلايتىن پوليتسەيلەر دە ەرەكشە رەجىمدە جۇمىس ىستەۋدە.
وبلىستىق پد باستىعىنىڭ ءبىرىنشى ورىنباسارى, پوليتسيا پولكوۆنيگى قانات ايتباەۆ وسىنداي شارالار وبلىستىڭ بارلىق اۋداندارىندا جۇرگىزىلىپ جاتقانىن ايتتى. سوڭعى تاۋلىكتە وبلىستا توتەنشە جاعداي رەجىمىنىڭ 18 بۇزۋشىلىعى انىقتالعان, ولاردىڭ 6-ى وبلىس ورتالىعىندا جانە 12-ءسى اۋدانداردا ورىن الىپتى. سونىمەن بىرگە پولكوۆنيك كارانتينگە بايلانىستى ازاماتتاردان بارلىق شەكتەۋلەرگە تۇسىنىستىكپەن قاراۋدى, وزدەرىنىڭ جانە جاقىندارىنىڭ دەنساۋلىعىنا اباي بولۋدى جانە جەكە باستىڭ گيگيەناسىن قاتاڭ ساقتاۋدى سۇرايتىنىن جەتكىزدى.
سولتۇستىك قازاقستان وبلىسى
