جالپى, الماتى وبلىسىنىڭ پانفيلوۆ اۋدانى وتاندىق جۇگەرى وسىرۋشىلەردىڭ وتانى ىسپەتتى. ال وڭىردەگى ءونىم كولەمىنىڭ 33 پايىزىن وسى اۋدان بەرىپ وتىر ەكەن. قازىر دە جاركەنت ماڭىنداعى جەر ەمگەن جۇرت ەگىس باسىندا. جۇمىس قارقىن العان. بۇل ىسكە بىلەك سىبانا كىرىسكەندەردىڭ باسىندا «كوكتال اگرو» سەرىكتەستىگىنىڭ ديقاندارى تۇر. وتكەن جىلى شارۋاشىلىق جۇگەرىدەن مول ءونىم جيناعان. تابىستىڭ ءبىر سىرى كوكتەمگى دالا جۇمىسىنا تىڭعىلىقتى ازىرلەنۋ مەن كۇتىپ-باپتاۋ ءادىسىنىڭ وزىقتىعىندا جاتىر ەكەن. سەرىكتەستىك سوڭعى جىلدارى بارلىق ەگىس القاپتارىنداعى جۇمىسقا زاماناۋي تەحنولوگيا قولدانىپ ءجۇر. اگروتەحنيكالىق شاراسى دا عىلىمي جاڭالىققا نەگىزدەلىپ جۇرگىزىلەدى. مىسالعا, ەگىستىكتى تامشىلاتىپ سۋعارۋ ءادىسى شىعىندى ازايتىپ, ءونىمدى ارتتىرۋعا كوپ سەپتىگىن تيگىزىپتى. قازىر شارۋاشىلىق 1500 گەكتارعا جۇگەرى ەگۋدى باستادى. جوڭىشقا تۇقىمىن سەبۋ دە ءجۇرىپ جاتىر.
- مىنا تامشىلاتىپ سۋعارۋ ءادىسىنىڭ پايداسى كوپ ەكەن. وتكەن جىلى بۇعان انىق كوز جەتكىزدىك. سۋدى از جۇمساپ, ءونىمدى ارتىق الۋدى بىلدىك. بۇرىن ءبىز القاپتى سۋعارۋ ءۇشىن سەكۋندىنا 700 ليترگە دەيىن سۋ پايدالاناتىنبىز. جاڭا ءادىستى قولدانعاننان كەيىن بۇل شىعىن 100 ليترگە دەيىن ازايدى. ەسەسىنە, ءونىم كولەمى 2-3 ەسەگە كوبەيدى. باسقا شارۋالار جۇگەرىنىڭ گەكتارىنان 7,8 توننادان العاندا, ءبىزدىڭ ءار گەكتاردان ورعان جۇرەگىمىز 18 بەن 20 توننانىڭ اراسىندا بولدى, - دەيدى «كوكتال اگرو» سەرىكتەستىگىنىڭ باسشىسى جانىبەك وحانوۆ.
وسى تامشىلاتىپ سۋعارۋدىڭ ارقاسىندا شارۋاشىلىق ديقاندارى بىلتىر جوڭىشقانى ءتورت رەت ورىپ الىپتى. 300 گەكتارعا وسەتىن مال ازىعىنان جينالعان مۇنداي مول ءونىم بۇرىن-سوڭدى بولماعان-دى. جاڭا جۇيەنىڭ تاعى ءبىر ەرەكشەلىگى ادام ەڭبەگىن اسا قاجەت ەتپەيتىندىگىندە. ياعني, سۋارۋ جۇمىسى تسيرفلى جۇيەدە باسقارىلدى. جۇمىس ۇدەرىسىن كادىمگى ۇيالى تەلەفونعا قويىلعان قوسىمشا ارقىلى قاشىقتان-اق باسقارۋعا بولادى ەكەن. ول ءۇشىن ينتەرنەت بايلانىسى عانا كەرەك. باستاپقىدا ەگىس القاپتارىنداعى تەلەفون بايلانىسىنىڭ ءوزى قيىن بولىپتى. بىراق, شارۋاشىلىق باسشىسى بۇل ماسەلەنى جىلدام شەشكەن. قازىر «كوكتال اگرونىڭ» القاپتارىندا ءموبيلدى قۇرىلعى جۇمىس ىستەپ تۇر. بايلانىس تۇزەلدى, ينتەرنەت بار.
ەندى «كوكتال اگرو» باسشىلىعىنىڭ جاڭالىققا تولى تاجىريبيەسى اۋدانداعى باسقا دا شارۋاشىلىقتارعا دا جۇعىستى بولۋى ءتيىس. ال ەسەپ بويىنشا پانفيلوۆتا 5 مىڭعا جۋىق جەكە شارۋا قوجالىعى بار. توپىراق ءتىنى جىلي باستاعاندا وڭىردەگى تۇقىم سەبۋ ءىسى تولىق كۇشىنە ەنەدى. وعان دايىقتىق بار. اسىرەسە, جۇگەرى القابىنداعى ەڭبەك جەمىستى بولۋى كەرەك. تابىس تا سوعان قاراي ەسەلەنبەك. ايتپاقشى, بىلتىر اۋدان ديقاندارى 166 مىڭ توننا جۇگەرى جيناعان ەكەن.
